ବାହା ବେଦୀରୁ ୧୪ ବର୍ଷର ନାବାଳିକାକୁ ଉଦ୍ଧାର କଲା CWC ଟିମ୍

ଝାରସୁଗୁଡା: ୧୪ ବର୍ଷର ନାବାଳିକାକୁ ବିବାହ ବେଦୀରୁ ଉଦ୍ଧାର କରି ବାଲ୍ୟ ବିବାହକୁ ପଣ୍ଡ କଲା CWC । ଝାରସୁଗୁ଼ଡା ଜିଲ୍ଲ ସଦର ବ୍ଲକର କଟାପାଲିରେ ଏକ ବିବାହ ଉତ୍ସବରୁ ସଂପୃକ୍ତ ନାବାଳିକାକୁ ଉଦ୍ଧାର କରାଯାଇଛ। ଝାରସୁଗୁଡ଼ା ବେଲପାହଡା ଅଞ୍ଚଳର ପ୍ରଦୀପ ଦାସଙ୍କର ବଲାଙ୍ଗିର ଦେଓଗାଁ ଅ଼ଞ୍ଚଳର ଜଣେ ନବମ ଶ୍ରେଣୀ ଛାତ୍ରୀଙ୍କ ସହ ବିବାହ ସ୍ଥିର ହୋଇଥିଲା । ବାଲ୍ୟ ବିବାହ ଆଇନତଃ ଅପରାଧ ବୋଲି ଜାଣିସୁଦ୍ଧା ପ୍ରଦୀପଙ୍କ ପରିବାର ପକ୍ଷରୁ ଏହି ବିବାହକୁ ବିଧିବଦ୍ଧ ଭାବେ ଆୟୋଜନ କରାଯାଇଥିଲା । ତେବେ କୌଣସି ସୂତ୍ରରୁ ଖବର ପାଇ ଝାରସୁଗୁଡ଼ା ଶିଶୁ ସୁରକ୍ଷା ସମିତି, ଚାଇଲ୍ଡ ଲାଇନ ଓ ପୋଲିସର ମିଳିତ ଟିମ୍ ବିବାହ ସ୍ଥଳରେ ପହଞ୍ଚି ଥିଲେ ବି ଆଗୁଆ ଖବର ପାଇ ବରପକ୍ଷ ଲୋକେ ସ୍ଥାନ ପରିବର୍ତ୍ତନ କରିଥିଲେ । ହେଲେ ପରେ ବର ଓ କନ୍ୟାଙ୍କ ପରିବାର ଲୋକଙ୍କ ମୋବାଇଲ ଫୋନ୍  ଟ୍ରାକିଂ  କରି କଟାପାଲି ଅଞ୍ଚଳରେ ଲୁଚାଛପାରେ ଚାଲିଥିବା ବିବାହ ଉତ୍ସବରୁ ନାବାଳିକାକୁ ଉଦ୍ଧାର କରାଯାଇଥିଲା । ଏହି ସମୟରେ ଉଭୟ ବର ଓ କନ୍ୟା ପକ୍ଷ ଲୋକେ ଫେରାର ହୋଇଯାଇଥିଲେ । ଉଦ୍ଧାର ପରେ ସଂପୃକ୍ତ ନାବାଳିକାକୁ ଶିଶୁ ସୁଧା ଗୃହରେ ରଖାଯାଇଛି।

ସେହିପରି ନୟାଗଡ଼ ବାଣୀଗୋଛା ଅଞ୍ଚଳରେ ମଧ୍ୟ ନାବାଳିକାଙ୍କ ବିବାହ ପଣ୍ଡ ହୋଇଛି।  ପୋଲିସ ଓ ଚାଇଲ୍ଡ ଲାଇନ ସଦସ୍ୟ ପହଞ୍ଚିବାରୁ ଏହି ବେଆଇନ୍‌ କାର୍ଯ୍ୟରେ ରୋକ ଲାଗିଥିଲା। ଦଶପଲ୍ଲା ଥାନା ସିମିଳି ସାହି ଗାଁର ବରୁଣ ମୁଦୁଲିଙ୍କ ସହ ନାବାଳିକାଙ୍କ ବିବାହ ସ୍ଥିର ହୋଇଥିଲା । ମନ୍ଦିରରେ ବିବାହ ହେଉଥିବା ଖବର ପାଇ ଚାଇଲ୍ଡ ଲାଇନ୍ ସଦସ୍ୟ ପହଞ୍ଚି ବିବାହ ଅଟକାଇଥିଲେ।

You might also like