୧୧ରୁ ୧୫ ରାଜଧାନୀରେ ହେବ ମେକ୍ ଇନ୍ ଓଡ଼ିଶା କନ୍‌କ୍ଲେଭ୍

ଭୁବନେଶ୍ୱର: ଆସନ୍ତା ନଭେମ୍ବର ୧୧ରୁ ୧୫ ମଧ୍ୟରେ ଭୁବନେଶ୍ୱରରେ ହେବ ମେକ୍ ଇନ୍ ଓଡ଼ିଶା କନ୍‌କ୍ଲେଭ୍। ଏଥିରେ ପୁଞ୍ଜିନିବେଶକାରୀଙ୍କୁ ଆକୃଷ୍ଟ କରିବାକୁ ଆସନ୍ତା ୮ ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୁମ୍ବାଇ ଗସ୍ତ କରିବେ। ସେହି ଦିନ ମୁଖ୍ୟମନ୍ତ୍ରୀଙ୍କର ମୁମ୍ବାଇରେ ଏକ ରୋଡ୍ ସୋ’ର କାର୍ଯ୍ୟକ୍ରମ ମଧ୍ୟ ରହିଛି। ପରେ ପୁଞ୍ଜିନିବେଶକାରୀଙ୍କ ସହିତ ଆଲୋଚନା ହେବାନେଇ ସ୍ଥିର କରାଯାଇଛି।

ଏ ନେଇ ସମସ୍ତ ବିଭାଗ ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏକ ସମୀକ୍ଷା ବୈଠକ କରିଛନ୍ତି। ଓଡ଼ିଶାରେ ପୁଞ୍ଜି ନିବେଶ କରିବାକୁ ବିଦେଶର ଶିଳ୍ପୋଦ୍ୟୋଗୀଙ୍କ ମଧ୍ୟରେ ଆଗ୍ରହ ସୃଷ୍ଟି କରିବା ଉଦ୍ଦେଶ୍ୟରେ ଏକ ପ୍ରତିନିଧି ଦଳ ଜାପାନ, ଦକ୍ଷିଣ କୋରିଆ ଓ ଚୀନ ମଧ୍ୟ ଗସ୍ତ କରିବ। ବୈଠକ ପରେ ଶିଳ୍ପ ସଚିବ ସଞ୍ଜୀବ ଚୋପ୍ରା ଗଣମାଧ୍ୟମକୁ ଏହି ସୂଚନା ଦେଇଛନ୍ତି।

ଚଳିତ ବର୍ଷ ୧୨ଟି କ୍ଷେତ୍ର ଫୋକସ୍‌ରେ ରହିଥିବା କଥା ସେ କହିଛନ୍ତି। ଏଥିରେ ଫୁଡ୍ ପ୍ରୋସେସିଂ, ସିଏସ୍ଆର୍, ଏମ୍ଏସ୍ଏମ୍ଇ, ପ୍ରତିରକ୍ଷା ମ୍ୟାନୁଫ୍ୟାକଚରିଂ ଆଦି କ୍ଷେତ୍ର ରହିଛି। ଗତ ଥର ରାଜ୍ୟରେ ପୁଞ୍ଜି ବିନିଯୋଗ ପାଇଁ ପ୍ରସ୍ତାବ ଦେଇଥିବା ୧୨୪ଟି କମ୍ପାନୀ ମଧ୍ୟରୁ ୭୨ଟି କମ୍ପାନୀକୁ ସିଙ୍ଗଲ୍ ଓ୍ୱିଣ୍ଡୋ କ୍ଲିୟରାନ୍ସ ମିଳିଥିବା ମଧ୍ୟ ଶିଳ୍ପ ସଚିବ କହିଛନ୍ତି।

You might also like