ଗାଡ଼ି କିଣିବା ପାଇଁ ସରକାରୀ ଚାକିରିଆଙ୍କୁ ବିନା ସୁଧରେ ମିଳିବ ଋଣ !

ଭୁବନେଶ୍ୱର: ରାଜ୍ୟରେ ଇଲେକ୍ଟ୍ରି ଗାଡ଼ିର ନିର୍ମାତା ଓ ଗ୍ରାହକଙ୍କୁ ମିଳିବ ପ୍ରୋତ୍ସାହନ।  ଏ ନେଇ ଆସନ୍ତା ମାସକ ମଧ୍ୟରେ ସ୍ୱତନ୍ତ୍ର ନୀତି ଆଣିବେ ରାଜ୍ୟ ସରକାର। ରାଜ୍ୟରେ ଇ-ଯାନ ଚଳାଚଳ ତ୍ୱରାନ୍ୱିତ କରିବାକୁ ବିପୁଳ ରିହାତି ଓ ପ୍ରୋତ୍ସାହନ ଦିଆଯିବ।

ଇ-ଯାନ ନିମନ୍ତେ ପବ୍ଲିକ୍ ଚାର୍ଜିଂ ଷ୍ଟେସନ ସ୍ଥାପନ ପାଇଁ ଶିଳ୍ପ ବିଭାଗ ପକ୍ଷରୁ ରିହାତି ବ୍ୟବସ୍ଥା ହେବ। ଇ-ଯାନ ନିର୍ମାତାଙ୍କୁ ସୁବିଧାରେ ଜମି ଆବଣ୍ଟନ ସହ ସବ୍‌ସିଡି ପ୍ରଦାନ ପାଇଁ ଶିଳ୍ପ ବିଭାଗ ବ୍ୟବସ୍ଥା କରିବ।  ଇ-ରିକ୍ସା ଚାଳନାକୁ ଗୁରୁତ୍ୱ ଦେବା ସହ ନିର୍ମାତାଙ୍କ ପାଇଁ ଆକର୍ଷଣୀୟ ଯୋଜନା ଆଣିବା କ୍ଷେତ୍ରରେ ଶିଳ୍ପ ବିଭାଗ ପଦକ୍ଷେପ ଗ୍ରହଣ କରିବ।

ଇ-ଯାନ ଯାତ୍ରୀଙ୍କ ପାଇଁ ପ୍ରତି ୨୦ରୁ ୩୦ କିଲୋମିଟରରରେ ଚାର୍ଜିଂ ପଏଣ୍ଟ ବ୍ୟବସ୍ଥା କରାଯିବ।  ଇଲେକ୍ଟ୍ରି ବସ, ୪ ଓ ୩ ଚକିଆ ଯାନର କ୍ରୟ ଓ ଚାର୍ଜିଂ ଷ୍ଟେସନ ପ୍ରତିଷ୍ଠା ପାଇଁ ସରକାର ରିହାତି ପ୍ରଦାନ କରିବେ।  ଇ-ଯାନ ନିର୍ମାତାଙ୍କ ପାଇଁ ଜିଏସ୍‌ଟି ଛାଡ, ଋଣରେ ସୁଧ ରିହାତି, ଷ୍ଟାମ୍ପ ଡ୍ୟୁଟି ଛାଡ ଭଳି ବ୍ୟବସ୍ଥା ରହିବ ।

ଏଥିସହ ସେମାନଙ୍କୁ ପ୍ରୋତ୍ସାହନ ରାଶି ମଧ୍ୟ ଦିଆଯିବ ।  ଇ-ଯାନର ମୂଲ୍ୟରେ ୧୫ ପ୍ରତିଶତ ଯାହାକି ସର୍ବାଧିକ ୧ ଲକ୍ଷ ଟଙ୍କା ପର୍ଯ୍ୟନ୍ତ ସବସିଡି ଯୋଗାଣ ପାଇଁ ବ୍ୟବସ୍ଥା ହେବ।  ସରକାରୀ ଚାକିରିଆଙ୍କ ମଧ୍ୟରେ ଇ-ଯାନର ବହୁଳ ବ୍ୟବହାର ଲାଗି ବିନା ସୁଧରେ ଋଣ ଦେବାକୁ ଅର୍ଥ ବିଭାଗ ବ୍ୟବସ୍ଥା କରିବ।  ଏହାସହ ଇ-ଯାନ ଗୁଡିକର ମାଗଣା ପାର୍କିଂ, ଚାର୍ଜିଂ ପଏଣ୍ଟରେ ରହିବା ସୁବିଧା, ବ୍ୟକ୍ତିଗତ ଓ ବାଣିଜ୍ୟିକ ବିଲ୍ଡିଂ, ଆପାର୍ଟମେଣ୍ଟରେ ଚାର୍ଜିଂ ପଏଣ୍ଟ ସୁବିଧା, ସହରାଞ୍ଚଳରେ ଚାର୍ଜିଂ ଷ୍ଟେସନର ଭିତ୍ତିଭୂମି ବିକାଶ କରାଯିବ।  ପ୍ରଥମ ୧୦୦୦ଟି ଚାର୍ଜିଂ ଷ୍ଟେସନ ସ୍ଥାପନ ପାଇଁ ଅନୁଦାନ ଯୋଗାଇ ଦିଆଯିବ।

 

You might also like