ଧାନ କିଣା ଲାଗି ବିଳମ୍ବରେ ମିଳୁଛି ଟୋକନ୍‌

ମୟୂରଭଞ୍ଜ: ଧାନ କିଣା ବେଳେ ଟୋକନ୍‌ ପ୍ରଦାନରେ ଅନିୟମିତତା ଏବଂ ବିଳମ୍ବକୁ ନେଇ ତାତିଛନ୍ତି ଚାଷୀ।  ଉତ୍ତ୍ୟକ୍ତ ଚାଷୀ ମୟୂରଭଞ୍ଜ ଜିଲା ଉଦଳା  ବ୍ଲକ ଖଲାଡ଼ି ଲ୍ୟାମ୍ପସ୍‌ରେ ତାଲା ପକାଇଛନ୍ତି। ସେମାନେ ଲ୍ୟାମ୍ପସ୍‌ରେ ତାଲା ପକାଇବା ସହ ଏମ୍‌ଡି ଓ ଏଆରସିଏସ୍‌ଙ୍କୁ ଘେରିଥିଲେ ।

ଚାଷୀମାନଙ୍କ କହିବା ଅନୁଯାୟୀ, ପୂର୍ବରୁ ହଜାରେ କୁଇଣ୍ଟାଲ ଧାନ ବିକ୍ରି କରିବା ପାଇଁ ଲ୍ୟାମ୍ପସ୍‌ କର୍ତ୍ତୃପକ୍ଷ କହିଥିଲେ। କିନ୍ତୁ ହଜାରେ କୁଇଣ୍ଟାଲ ଧାନ ବଦଳରେ ୬ ଶହ କୁଇଣ୍ଟାଲ୍‌ର ଟୋକନ୍‌ ପ୍ରଦାନ କରାଯିବାରୁ  ଉତ୍ତେଜନା ସୃଷ୍ଟି ହୋଇଥିଲା। ମିଲର ଏବଂ ଏମ୍‌ଡିଙ୍କ ମଧୁଚନ୍ଦ୍ରିକାରେ ଶହ ଶହ  କୁଇଣ୍ଟାଲ୍‌ ଧାନ  କାଗଜପତ୍ରରେ ବିକ୍ରି କରାଯାଉଥିବା ଚାଷୀ ଅଭିଯୋଗ କରିଛନ୍ତି।

ଧାର୍ଯ୍ୟ ଦିବସରେ ସଠିକ୍ ପରିମାଣରେ ଧାନ କିଣା ଯାଉନଥିବା ଚାଷୀ ଅଭିଯୋଗ କରିଛନ୍ତି। ଏମିତିକି, ଲ୍ୟାମ୍ପସ୍‌ରେ କଟ୍‌ନୀ ଛଟ୍‌ନୀର ପରିମାଣ ମଧ୍ୟ ଅଧିକ ରହିଛି। ଏହା ଚାଷୀଙ୍କ ମୁଣ୍ଡ ବିନ୍ଧାର କାରଣ ପାଲଟିଛି।   ଏଥିରେ  ଅତିଷ୍ଠ ହୋଇ  ଖଲାଡ଼ି ଲ୍ୟାମ୍ପସ୍‌ ଏମ୍‌ଡି ବିପ୍ଳବ ରାଉତଙ୍କୁ ଚାଷୀମାନେ ଲ୍ୟାମ୍ପସ୍‌ କାର୍ଯ୍ୟାଳୟରେ ତାଲା ପକାଇ ଦେଇଥିଲେ।   ସେମାନେ ଉପଖଣ୍ଡ ସମବାୟ ସହକାରୀ ନିବନ୍ଧକଙ୍କୁ କାର୍ଯ୍ୟାଳୟରେ ମଧ୍ୟ ଘେରିଥିଲେ।

 

You might also like