ପାର୍କ ପରି ସଜେଇ ହୋଇଛି ସରକାରୀ ସ୍କୁଲ : ଭଳି କି ଭଳି ଫୁଲ ଫୁଟିଛି, ପନିପରିବା ବି ଫଳିଛି

ସୁବର୍ଣ୍ଣପୁର: କରୋନା ବଦଳାଇଦେଲା ସ୍କୁଲର ଚିତ୍ର । ପାର୍କର ଭ୍ରମ ସୃଷ୍ଟି କରୁଛି ସ୍କୁଲ । ଶିକ୍ଷକଙ୍କ ପ୍ରୟାସ କ୍ରମେ ଶିକ୍ଷାନୁଷ୍ଠାନ ଏବେ ପାଲଟି ଯାଇଛି ମନୋରମ ଉଦ୍ୟାନ । ଭଳିକି ଭଳି ଫୁଟ ଫୁଟିଛି, ପନିପରିବା ବି ଫଳିଛି । ସ୍କୁଲ ପାଚେରୀରେ ଅଙ୍କା ହୋଇଛି ଆଖି ଲାଖି ଗଲା ପରି ଚିତ୍ର । ସ୍କୁଲ ଖୋଲିବା ପରେ ଛାତ୍ରଛାତ୍ରୀ ମାନେ ଶିକ୍ଷାଲାଭ କରିବା ସହିତ ମନୋରମ ପରିବେଶକୁ ଉପଭୋଗ କରି ସଚେତନତାର ବାର୍ତ୍ତା  ପାଇବେ । ପ୍ରଧାନ ଶିକ୍ଷକଙ୍କ ଏହି ପ୍ରୟାସ ପାଇଁ  ଜିଲ୍ଲା ପ୍ରଶାସନ ଠାରୁ ଆରମ୍ଭ କରି ସାଧାରଣ ଲୋକେ ତାଙ୍କର ଭୁରିଭୁରି ପ୍ରଶଂସା କରୁଛନ୍ତି ।

ସୁବର୍ଣ୍ଣପୁର ଜିଲ୍ଲା ଡୁଗୁଂରିପାଲି ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରର ଦୃଶ୍ୟ ଦେଖିଲେ ଲୋକେ ଘଡ଼ିଏ ଅଟକି ଯାଉଛନ୍ତି । ମୁଖ୍ୟ ଫାଟକଠାରୁ ଆରମ୍ଭ କରି ସ୍କୁଲ ପରିସର ସବୁଜ ବନାନୀରେ ପରିପୂର୍ଣ୍ଣ ହୋଇଛି । କେବଳ ସବୁଜ ବନାନୀ କାହିଁକି ୧୦ ପ୍ରକାରର ପରିବା ଗଛ ସମେତ ୩୦ ପ୍ରକାରର ଫୁଲ ଗଛ ଲଗାଯାଇଛି । ସେହିପରି ସ୍କୁଲର କାନ୍ଥରେ ୱାଲ ପେଟିଂ  ମାଧ୍ୟମରେ ପୁରୀ ମନ୍ଦିର, ଲିଙ୍ଗରାଜ ମନ୍ଦିର, କୋଣାର୍କ, ଲାଲକିଲ୍ଲା ସହିତ ପରିବେଶ ସଚେତନ ପାଇଁ ବିଭିନ୍ନ ପ୍ରକାରର ସଚେତନତାର ବାର୍ତ୍ତା ମଧ୍ୟ ଦିଆଯାଇଛି ।

ପ୍ରଧାନଶିକ୍ଷକ କରମ ଚନ୍ଦ୍ର ବାରିକ କରୋନା କାଳରେ ସମୟର ସଦୁପୋଯୋଗ କରି ବିଦ୍ୟାଳୟର ପରିବେଶକୁ ଅତି ସୁନ୍ଦର କରି ଗଢି ତୋଳିଛନ୍ତି । ତେବେ କେବଳ ପ୍ରଧାନଶିକ୍ଷକ ନୁହେଁ ସ୍କୁଲ କମିଟି, ସରପଞ୍ଚ, ଶିକ୍ଷାବିତମାନେ ଏକତ୍ରୀତ ହୋଇ ତଥା ସରକାରଙ୍କ ମୋ ସ୍କୁଲ ଅଭିଯାନ ସହଯୋଗରେ ବିଦ୍ୟାଳୟର ପରିବେଶକୁ ଏପରି ପାର୍କରେ ପରିଣ୍ତ କରିଛନ୍ତି । ଏହି ସୈାର୍ନ୍ଦଯ୍ୟଭରା ପରିବେଶକୁ ଦେଖି ଏଇ ରାସ୍ତାଦେଇ ଯାଉଥିବା ପଥିକ ମଧ୍ୟ ଘଡିଏ ଅଟକି ଯିବାପାଇଁ ବାଧ୍ୟ ହେଉଛି । ସେହି ରାସ୍ତା ଦେଇ ଯାଉଥିବା ଲୋକେ ସୁନ୍ଦର ସୁନ୍ଦର ଫୁଳ ଗଛ ସହ ସେଲ୍ଫି ନେଉଛନ୍ତି  । ଏଠିକାର ପ୍ରାକୃତିକ ପରିବେଶ ରାସ୍ତାଦେଇ ଯାଉଥିବା ବାଟୋଇଙ୍କୁ ସତରେ ଆନମନା କରିଦେଉଛି ।

କରୋନା ମହାମାରୀ ପାଇଁ ସରକାର ସମସ୍ତ ଶିକ୍ଷାନୁଷ୍ଠାନ ଗୁଡିକୁ ବନ୍ଦ କରିଦେଇଥିଲେ । ଛାତ୍ରଛାତ୍ରୀ ଗୋଟିଏ ବର୍ଷ ହେଲା ସ୍କୁଲକୁ ଆସୁନଥିଲେ । ଆଉ ପ୍ରଧାନ ଶିକ୍ଷକ ହାଡଭଙ୍ଗା ପରିଶ୍ରମ କରି ଦୈନିକ ସ୍କୁଲକୁ ଆସି ଏଇ ମଣିଷ ତିଆରି କାରଖାନାରେ ଏକ ସୁନ୍ଦର ପରିବେଶ ସୃଷ୍ଟି କରିପାରିଛନ୍ତି ।

ସରକାରୀ ସ୍କୁଲ ଗୁଡିକୁ ଘରୋଇ ବିଦ୍ୟାଳୟ ଠାରୁ ଅତ୍ୟଧିକ ସରସ ସୁନ୍ଦର କରିବା ପାଇଁ ସରକାର ଅନେକ ପ୍ରୟାସ କରୁଛନ୍ତି । କିନ୍ତୁ ଅନେକ ସ୍ଥାନରେ ଏହାର ସଫଳ ରୂପାୟନ ଦେଖିବାକୁ ମିଳିପାରିନି ।  ଆଗାମୀ ଦିନରେ ଏହି ମଣିଷ ତିଆରି କାରଖାନାରେ ଛାତ୍ରଛାତ୍ରୀ ମାନେ କେବଳ ନିଜ ପାଠପଢା ସହ ପରିବେଶ ଉପରେ ମଧ୍ୟ ଅନେକ ଶିକ୍ଷାଲାଭ କରିପାରିବେ । ଛାତ୍ରଛାତ୍ରୀଙ୍କ ଭବିଷ୍ୟତ ପାଇଁ ତାହା ଉଚିତ୍ ଦିଗ୍‌ଦର୍ଶନ ଦେବା ସହିତ ସମାଜକୁ ମଧ୍ୟ କିଛି ସନ୍ଦେଶ ଦେବ ।  ଶିକ୍ଷକଙ୍କ ଏହି କାମ ଅନ୍ୟ ସ୍କୁଲର ଶିକ୍ଷକଙ୍କ ପାଇଁ ଏକ ଉଦାହରଣ ସୃଷ୍ଟି କରିପାରିଛନ୍ତି ।

 

 

You might also like