ଚିଲିକାରେ ୨ ମାସରେ ମଲେଣି ୪ ଡଲ୍‌ଫିନ

ବଢୁଛି ଚିନ୍ତା, ଅଧିକାରୀ କହୁଛନ୍ତି ‘ନିମୋନିଆ’

ବ୍ରହ୍ମଗିରି ( ରବିନାରାୟଣ ପୂଜାରୀ) : ସୌନ୍ଦର୍ଯ୍ୟର ଗନ୍ତାଘର ଚିଲିକାର ଅନ୍ୟତମ ପ୍ରମୁଖ ଆର୍କଷଣ ହେଲା ଡଲଫିନ।। ହେଲେ ବର୍ଷ ଆରମ୍ଭରୁ ଡଲଫିନଙ୍କ ମୃତ୍ୟୁ ସଂଖ୍ୟା ଚିନ୍ତା ବଢାଇଛି। ଜାନୁୟାରୀ ଓ ଫେବୃୟାରୀରେ ୪ଟି ବିରଳ ଇରାୱାଡି ଡଲଫିନର ମୃତ୍ୟୁ ହୋଇଛି।  ଚିଲିକାରେ ଏହି ପ୍ରଜାତିର ଡଲଫିନଙ୍କ ମୃତ୍ୟୁ ସଂଖ୍ୟା ଏବେ ସ୍ୱେଚ୍ଛାସେବୀ ଓ ବନବିଭାଗର ଚିନ୍ତା ବଢାଇଛି।

ଚଳିତବର୍ଷ ଆରମ୍ଭରୁ ଏଯାଏଁ ଡଲଫିନଙ୍କ ମୃତ୍ୟୁ ସଂଖ୍ୟା ୪ ଛୁଇଁଲାଣି। ଡଲଫିନ ଗଣନା ତଥ୍ୟ କହୁଛି, ୨୦୧୫ରେ ୧୩୪ଟି ଡଲଫିନ ଥିବା ବେଳେ ୨୦୧୭ରେ ଏହା କମି ୧୨୧ରେ ପହଞ୍ଚିଥିଲା। ୨୦୧୮ରେ ଡଲଫିନ ସଂଖା ବଢି ୧୫୫ରେ ପହଞ୍ଚିଛି। ହେଲେ ମୃତ୍ୟୁହାରକୁ ଯଦି ଦେଖିବା ୨୦୧୫ରେ ୮ଟି, ୨୦୧୭ରେ ୬ଟି, ୨୦୧୮ରେ ୫ଟି  ଡଲ୍‌ଫିନର ମୃତ୍ୟୁ ହୋଇଛି। କିନ୍ତୁ ୨୦୧୯ ଆରମ୍ଭରୁ ୨ମାସ ଭିତରେ ମୃତ୍ୟୁସଂଖ୍ୟା ୪ରେ ପହଞ୍ଚିଲାଣି। ଯାହାକୁ ନେଇ ଗଭୀର ଉଦ୍‌ବେଗ ପ୍ରକାଶ କରିଛନ୍ତି ସ୍ଥାନୀୟ ବୁଦ୍ଧିଜୀବୀ। ଉଚ୍ଚଶଦ୍ଦ ସମ୍ପନ୍ନ ବୋଟ ଚାଲିବା,ମାତ୍ରାଧିକ ମୋବିଲ, ଡିଜେଲ ପାଣିରେ ମିଶିବା, ଚିଲିକାରେ ଜଳପତ୍ତନର ହ୍ରାସ ମଧ୍ୟ ପ୍ରମୁଖ କାରଣ ବୋଲି କୁହାଯାଉଛି।

ବ୍ରହ୍ମଗିରି ଅତିରିକ୍ତ ପ୍ରାଣୀଧନ ଚିକିତ୍ସକଙ୍କ କହିବା ଅନୁଯାୟୀ, ନିମୋନିଆ ଯୋଗୁ ଡଲଫିନଗୁଡ଼ିକ ମୃତ୍ୟୁମୁଖରେ ପଡୁଛନ୍ତି। ଏନେଇ ସାତପଡା ରେଞ୍ଜ ଅଧିକାରୀ କହୁଛନ୍ତି, ଡଲଫିନର ବ୍ୟବଚ୍ଛେଦ ରିର୍ପୋଟ ଉଚ୍ଚପଦାଧିକାରୀଙ୍କ ପାଖକୁ ପଠାଯାଇଛି। ଯାହା ନିର୍ଦ୍ଦେଶ ଆସିବ ତଦନୁଯାୟୀ ପଦକ୍ଷେପ ନିଆଯିବ।

You might also like