ସୋର(ନିରଞ୍ଜନ ବେହେରା) : ଉପକୂଳିଆ ଲୋକଙ୍କୁ ଡରାଇଲାଣି ସମ୍ଭାବ୍ୟ ବାତ୍ୟା ୟାସ । ଆସନ୍ତା ୨୬ ତାରିଖରେ ବାଲେଶ୍ବରରେ ‘ୟାସ’ ଲ୍ୟାଣ୍ଡଫଲ କରିପାରେ ବୋଲି ଅନୁମାନ କରାଯାଉଛି । ତେବେ ବାତ୍ୟାକୁ ନେଇ ଚିନ୍ତାରେ ରହିଛନ୍ତି ସ୍ଥାନୀୟ ଲୋକେ । ଜିଲ୍ଲାରେ ଥିବା କେଉଁ ବାତ୍ୟା ଆଶ୍ରୟସ୍ଥଳୀରେ ବିଦ୍ୟୁତ ବ୍ୟବସ୍ଥା ନାହିଁ ତ ଆଉ କେଉଁଠି ବାତ୍ୟା ଆଶ୍ରୟସ୍ଥଳୀ ଅପରିଷ୍କାର ହୋଇ ପଡିରହିଛି । ଗୋଟିଏ ପଟେ କରୋନା ମହାମାରୀ ସମସ୍ତଙ୍କୁ ଛଟପଟ କରାଉଥିବା ବେଳେ ଅନ୍ୟପଟେ ବାତ୍ୟା ୟାସରେ କେମିତି ରହିବେ ତାହା ଏବେ ସବୁଠୁ ବଡ଼ ଚିନ୍ତା ବିଷୟ ।
ବାଲେଶ୍ୱର ଜିଲ୍ଲା ରେମୁଣା ବ୍ଲକ ତାଳପଦା ବ୍ଲକର ଜାମୁକା ମୁହାଁଣ ଓ ବାହାନଗା ବ୍ଲକର ପଞ୍ଚୁବିଶା ଓ ବାଉଁଶଆଡିଆ ବାତ୍ୟା ଆଶ୍ରୟସ୍ଥଳୀରେ ବିଭିନ୍ନ ପ୍ରକାରର ଅବ୍ୟବସ୍ଥା ଦେଖିବାକୁ ମିଳିଛି । ଲୋକଙ୍କ ପାଇଁ ଲକ୍ଷ ଲକ୍ଷ ଟଙ୍କାରେ ନିର୍ମିତ ବାତ୍ୟା ଆଶ୍ରୟସ୍ଥଳୀରେ ଏବେ ପରିତ୍ୟକ୍ତ ହୋଇ ପଡିରହିଛି । ବାତ୍ୟା ଆସୁଥିବା ବେଳେ ବାତ୍ୟା ଆଶ୍ରୟସ୍ଥଳୀରେ ପିଇବା ପାଣି ସୁବିଧା ନାହିଁ କି ବିଦ୍ୟୁତ ବ୍ୟବସ୍ଥା ନାହିଁ । ଆବଶ୍ୟକୀୟ ଜିନିଷ ପତ୍ର ଗୁଡିକ ଏଣେତେଣେ ପଡ଼ି ରହିଛି । କିଛି ଆଶ୍ରୟସ୍ଥଳୀରେ ମଦ ବୋତଲ ପଡ଼ିରହିଛି । ଆଉ ୬ ଦିନ ପରେ ବାଲେଶ୍ବର ଜିଲ୍ଲାର ଲ୍ୟାଣ୍ଡଫଲ କରିପାରେ ବାତ୍ୟା ୟାସ । ହେଲେ ରହିବା ଉପଯୋଗୀ ନାହିଁ କୌଣସି ବି ବାତ୍ୟାଆଶ୍ରୟ ସ୍ଥଳୀ ।
ବାତ୍ୟା ଆଶ୍ରୟସ୍ଥଳୀ ଗୁଡିକ ଜନସାଧାରଣଙ୍କ ବ୍ୟବହାର ପାଇ ହୋଇଥିବା ଏବେ ସେଠାରେ ପକ୍ଷୀ ରହିବା ଆରମ୍ଭ କଲେଣି । ରକ୍ଷଣାବକ୍ଷେଣ ଅଭାବରୁ ପକ୍ଷୀ ମାନେ ପାଇଖାନାରେ ରହୁଥିବା ଦେଖିବାକୁ ମିଳିଛି । ଲୋକେ ବାତ୍ୟା ହେଲେ ସେହି ସ୍ଥାନରେ କିପରି ରହିବେ ତାହା ଏବେ ଚିନ୍ତାର ବିଷୟ ପାଲଟିଛି । ବାତ୍ୟା ସମୟରେ ପାଣି ଦରକାର ପଡିଲେ ମଧ୍ୟ ପାଣିରେ ସୁବିଧା ନାହିଁ । ଅବ୍ୟବସ୍ଥା ଭିତରେ ଥିବା ବାତ୍ୟା ଆଶ୍ରୟସ୍ଥଳୀ ଗୁଡିକୁ ଯଥା ଶୀଘ୍ର ପରିଷ୍କାର ପରିଚ୍ଛନ୍ନ କରିବା ସହିତ ବିଦ୍ୟୁତ ସଂଯୋଗ କଲେ ବାତ୍ୟା ଆଶ୍ରୟସ୍ଥଳୀ ଗୁଡିକରେ ଅସମୟରେ ଲୋକେ ସାହାରା ନେଇପାରିବେ ବୋଲି ଦାବି ହୋଇଛି ।