ନୀଳଗିରିରେ ବଢ଼ିଚାଲିଛି ଭାଲୁ ମୃତ୍ୟୁ ସଂଖ୍ୟା

ବାଲେଶ୍ୱର(ରଶ୍ମୀରଞ୍ଜନ ଦାସ): ବାଲେଶ୍ୱର ଜିଲ୍ଲା ନୀଳଗିରିରେ ଭାଲୁ ମୃତ୍ୟୁ ବଢ଼ି ଚାଲିଛି। ଗତ ମାସକ ମଧ୍ୟରେ କେବଳ ନୀଳଗିରିରେ ୪ଟି ଭାଲୁଙ୍କ ମୃତ୍ୟୁ ହୋଇଛି। ଅନ୍ୟ ଏକ ଭାଲୁ ଅସୁସ୍ଥ ହୋଇପଡ଼ିଥିବା ମଧ୍ୟ ଦେଖିବାକୁ ମିଳିଛି। ଏହାକୁ ନେଇ ପରିବେଶବିତଙ୍କ ମଧ୍ୟରେ ଘୋର ଅସନ୍ତୋଷ ଦେଖାଦେଇଛି।

ସୂଚନା ଅନୁସାରେ, ନୀଳଗିରି ଅଞ୍ଚଳରେ ମାସକ ମଧ୍ୟରେ ୪ଟି ଭାଲୁଙ୍କ ମୃତ୍ୟୁ ହୋଇଥିବାବେଳେ୨ ମାସରେ ଏହି ସଂଖ୍ୟା ୭ରେ ପହଞ୍ଚିଛି।ଚଲଣାପାଳ ନିକଟରେ ଗୋଟିଏ ଭାଲୁକୁ ଲୋକେ ପିଟି ପିଟି ମାରି ଦେଇଥିବା ସୂଚନା ମିଳିଛି। କାଠଗୋଚ୍ଛିରେ ଅନ୍ୟ ଏକ ଭାଲୁର ମୃତ୍ୟୁ ହୋଇଥିବାବେଳେ ଢୋଲପୁର ଗାଁରେ ଗୋଟିଏ ଭାଲୁ ଅସୁସ୍ଥ ହୋଇ ପଡ଼ିଥିଲା। ଭାଲୁଙ୍କ ସୁରକ୍ଷା ପ୍ରସଙ୍ଗ ନେଇ ପରିବେଶବିତ୍‌ ଉଦ୍‌ବେଗ ପ୍ରକାଶ କରିଛନ୍ତି।

ଜଙ୍ଗଲ ଅବକ୍ଷୟ ଓ ପଥର ବ୍ଲାଷ୍ଟିଂ ଭାଲୁ ମୃତ୍ୟୁର ପ୍ରମୁଖ କାରଣ ପାଲଟିଛି। ନୀଳଗିରି, କୁଲଢ଼ିଆ ଅଭୟାରଣ୍ୟ, ଧୋବଶୀଳା ଜଙ୍ଗଲ ଓ ସ୍ୱର୍ଣ୍ଣଚୂଡ଼ ପାହାଡ଼ରେ ଜଙ୍ଗଲରୁ ଭାଲୁ ଜନବସତି ମୁହାଁ ହେଉଛନ୍ତି। ପଥର ମାଫିଆଙ୍କ ଅବାଧ ବିଚରଣ ଯୋଗୁ ଭାଲୁ ଜନବସତି ମୁହାଁ ହୋଇ ମୃତ୍ୟୁମୁଖରେ ପଡୁଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି।

ତେବେ ବ୍ୟବଚ୍ଛେଦ ରିପୋର୍ଟ ଆସିଲେ ଭାଲୁ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ। ଅନ୍ୟପଟେ ଭାଲୁ ମୃତ୍ୟୁର ପ୍ରକୃତ କାରଣ ଖୋଜିବା ସହ ଲୋକଙ୍କୁ ସଚେତନ କରିବା ଉପରେ ବନବିଭାଗ ଗୁରୁତ୍ୱ ଦେଇଛି।

 

You might also like