ମେ’ ୨୦ ଅପରାହ୍ଣ କିମ୍ବା ସନ୍ଧ୍ୟାରେ ଦୀଘା-ହାତି‌ଆ ମଧ୍ୟରେ ଉପକୂଳ ଅତିକ୍ରମ କରିବ ‘ଅମ୍ପନ୍’

ଭୁବନେଶ୍ୱର: ବଙ୍ଗୋପସାଗରରେ ସୃଷ୍ଟ ସିଭିୟର୍‌ ସାଇକ୍ଲୋନିକ୍‌ ଷ୍ଟର୍ମ ‘ଅମ୍ପନ୍’ ଆଜି ଭୋର ସମୟରେ ଅତି ଭୀଷଣ ରୂପ ଧାରଣ କରିଛି। ଅର୍ଥାତ୍‌ ଏହା ଏକ୍ସଟ୍ରିମ୍‌ଲି ସିଭିୟର୍‌ ସାଇକ୍ଲୋନିକ୍ ଷ୍ଟର୍ମରେ ପରିଣତ ହୋଇଛି। ଏହାପରେ ଏହା ଆହୁରି ଅଧିକ ଘନୀଭୂତ ହେବାରେ ଲାଗିଛି।

ମେ’ ୨୦ ତାରିଖ ଅପରାହ୍ଣ କିମ୍ବା ସନ୍ଧ୍ୟାରେ ଅମ୍ପନ୍‌ ପଶ୍ଚିମବଙ୍ଗର ଦୀଘା ଓ ବାଂଲାଦେଶର ହାତି‌ଆ ଦ୍ୱୀପ ମଧ୍ୟରେ ଉପକୂଳ ଅତିକ୍ରମ କରିବାର ସମ୍ଭାବନା ରହିଛି।  ସେହି ସମୟରେ ପବନର ବେଗ  ଘଣ୍ଟାପ୍ରତି ୧୫୫-୧୬୫ କି.ମି. ରହିପାରେ।  ସମୁଦ୍ର ମଧ୍ୟରେ ଆଉ ୧୨ ଘଣ୍ଟା ପର୍ଯ୍ୟନ୍ତ ରହି ଶକ୍ତିଶାଳୀ ହେବା ପାଇଁ ବଳ ଯୋଗାଡ଼ିବ। ଏହାପରେ ଏହା ସାମାନ୍ୟ ଦୁର୍ବଳ ହେବ। ଏନେଇ ଭାରତୀୟ ପାଣିପାଗ ବିଭାଗ ପୂର୍ବାନୁମାନ କରିଛି। 

ଯେତେବେଳେ ଏହା ଦୀଘା -ହାତି‌ଆ  ଉପକୂଳ ଦେଇ ଅତିକ୍ରମ କରିବ ସେହି ସମୟରେ  ଓଡ଼ିଶା ଉପକୂଳବର୍ତ୍ତୀ ଅଞ୍ଚଳରେ ପବନର ବେଗ ଘଣ୍ଟାପ୍ରତି ୧୧୦-୧୩୫ କି.ମି. ପର୍ଯ୍ୟନ୍ତ ରହିବାର ସମ୍ଭାବନା ରହିଛି। ଏନେଇ ଆଇଏମ୍‌ଡି ଡିଜି ମୃତ୍ୟୁଞ୍ଜୟ ମହାପାତ୍ର ସୂଚନା ଦେଇଛନ୍ତି।

ଆସନ୍ତା ୧୨ ଘଣ୍ଟା ମଧ୍ୟରେ ଏହା ଅଧିକ ଘନୀଭୂତ ହୋଇ ସୁପର ସାଇକ୍ଲୋନ୍‌ରେ ପରିଣତ ହୋଇପାରେ। ଏନେଇ ଆଇଏମ୍‌ଡି ଡିଜି କହିଛନ୍ତି। ଘଣ୍ଟା ପ୍ରତି ୨୨୦ରୁ ୨୬୫ କି.ମି. ବେଗରେ ପବନ ବହିବା ନେଇ ସମ୍ଭାବନା ରହିଛି। ଏବେ ଏହା ଘଣ୍ଟାକୁ ୧୩ କି.ମି. ବେଗରେ ଗତି କରିବା ସହ ଉତ୍ତର-ଉତ୍ତର-ପୂର୍ବ ଦିଗକୁ ମୁହାଁଉଛି।

You might also like