ଶନିବାରଠାରୁ ଟିକାକରଣ ଆରମ୍ଭ; ରାଜ୍ୟରେ ସରିଛି ପ୍ରସ୍ତୁତି

ଭୁବନେଶ୍ୱର:  ଆସନ୍ତା ଶନିବାରଠାରୁ ଆରମ୍ଭ ହେବାକୁ ଯାଉଥିବା କୋଭିଡ୍ ଟିକାକରଣ ପାଇଁ ତତ୍ପରତା ପ୍ରକାଶ ପାଇଛି। ସାରା ଦେଶରେ ଏଥିପାଇଁ ୫ ହଜାର ସେସନ୍ ସାଇଟ୍ ବା ଟିକାରଣ କେନ୍ଦ୍ର ଚିହ୍ନଟ ହୋଇଥିବା ବେଳେ ଓଡ଼ିଶାରେ ୧୬୦ଟି ଟିକାକରଣ ସେଣ୍ଟର ରହିଛି। ପ୍ରତି ଜିଲ୍ଲାରେ ଏଥିଲାଗି ବ୍ୟବସ୍ଥା ହୋଇଛି। ପ୍ରତି ସେଣ୍ଟରରେ ୧୦୦ ଜଣ ଲେଖାଏଁ ସ୍ୱାସ୍ଥ୍ୟକର୍ମୀଙ୍କୁ ଟିକା ଦିଆଯିବ। ଏସବୁର ସୁପରିଚାଳନା ଲାଗି ଆସନ୍ତାକାଲି ପ୍ରଧାନମନ୍ତ୍ରୀ, ସବୁ ରାଜ୍ୟର ମୁଖ୍ୟମନ୍ତ୍ରୀମାନଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ମଧ୍ୟ ରହିଛି।

କରୋନା ଟିକାକରଣ ପାଇଁ ସଜବାଜ  ହେଉଛି ଦେଶ ସହିତ ଆମ ରାଜ୍ୟ ଓଡ଼ିଶା। ଦୁଇ ପର୍ଯ୍ୟାୟ ଡ୍ରାଏ ରନ୍ ସଫଳତାର ସହ ସଂପନ୍ନ ହେବାପରେ ଆସନ୍ତା ୧୬ ତାରିଖରୁ କୋଭିଡ୍ ଭ୍ୟାକ୍ସିନେସନ୍ ଆରମ୍ଭ ହେବ। ଦେଶର ୫ ହଜାର କେନ୍ଦ୍ରରେ ସ୍ୱାସ୍ଥ୍ୟକର୍ମୀମାନଙ୍କୁ କୋଭିଡ୍ ଟିକା ଦିଆଯିବ।

ଦେଶର ୫ ହଜାର ଟିକାକରଣ କେନ୍ଦ୍ର ମଧ୍ୟରୁ ଓଡ଼ିଶାରେ ପ୍ରାୟ ୧୬୦ଟି କେନ୍ଦ୍ର ରହିଛି। ସୂଚନା ଅନୁସାରେ ମୟୂରଭଞ୍ଜ ଜିଲ୍ଲାରେ ସର୍ବାଧିକ ୧୦ଟି କେନ୍ଦ୍ର, କଟକ, ପୁରୀ ଓ ଗଞ୍ଜାମରେ ୮ଟି ଲେଖାଏଁ ଏବଂ ଭୁବନେଶ୍ୱର ମହାନଗର ନିଗମରେ ୫ଟି ଟିକାକରଣ କେନ୍ଦ୍ର ରହିବ। ପ୍ରତି ଜିଲ୍ଲାର ଉପଖଣ୍ଡସ୍ତରୀୟ ହସ୍ପିଟାଲ୍, ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଓ ଘରୋଇ ହସ୍ପିଟାଲ୍‌କୁ ଏହି ଅଭିଯାନରେ ସାମିଲ କରାଯାଇଛି। ତେବେ ଯେଉଁଠି ଡ୍ରାଏ ରନ୍ ହୋଇଥିଲା ସେଠାରେ ହିଁ ଟିକାକରଣ ଉପରେ ଗୁରୁତ୍ୱ ଦିଆଯାଉଛି।

ପ୍ରତି କେନ୍ଦ୍ରରେ ୧୦୦ ଜଣ ଲେଖାଏଁ ସ୍ୱାସ୍ଥ୍ୟକର୍ମୀଙ୍କୁ ଟିକା ଦିଆଯିବ। ପରବର୍ତ୍ତୀ ସମୟରେ ଟିକାର ଉପଲବ୍ଧତା ଦେଖି ଟିକାକରଣ ବ୍ୟବସ୍ଥା କରାଯିବ ବୋଲି ପରିବାର କଲ୍ୟାଣ ନିର୍ଦ୍ଦେଶକ ବିଜୟ ପାଣିଗ୍ରାହୀ ସୂଚନା ଦେଇଛନ୍ତି। ଟିକା ଉତ୍ପାଦନ କରୁଥିବା କମ୍ପାନିଠାରୁ ଓଡ଼ିଶାକୁ ସିଧାସଳଖ ଭ୍ୟାକ୍ସିନ ଆସିବ ପ୍ରଥମ ପର୍ଯ୍ୟାୟରେ ୩ ଲକ୍ଷ ୨୮ ହଜାର ସ୍ୱାସ୍ଥ୍ୟକର୍ମୀ ଟିକା ନେବେ। ଆଜି ସମସ୍ତ ଟିକରାଣ କେନ୍ଦ୍ର ଓ ହିତାଧିକାରୀଙ୍କ ତାଲିକା ୱେବ୍‌ସାଇଟ୍‌ରେ ଅପଲୋଡ୍ କରାଯିବ।

ତେବେ ରାଜ୍ୟରେ କରୋନା ଟିକା ପହଞ୍ଚିବା କ୍ଷଣି ରାଜ୍ୟ ସରକାର ତୁରନ୍ତ ଟିକାକରଣର ବ୍ୟବସ୍ଥା କରିବେ। ଏଥିପାଇଁ ସବୁ ପ୍ରକାର ବ୍ୟବସ୍ଥା କରାଯାଇଛି। କୋଭିଡ୍ ଟିକା ନେବା ପରେ ହିତାଧିକାରୀଙ୍କୁ ସଂପୃକ୍ତ ସେଣ୍ଟରରେ ଅଧଘଣ୍ଟା ଅପେକ୍ଷା କରିବାକୁ ପଡ଼ିବ। କୌଣସି ପାର୍ଶ୍ୱ ପ୍ରତିକ୍ରିୟା ହେଉଛି କି ନାହିଁ ତାର ଅନୁଧ୍ୟାନ କରାଯି।ବ ସେଥିପାଇଁ ପ୍ରତି ଟିକାକରଣ କେନ୍ଦ୍ରରେ ଆଡ୍‌ଭର୍ସ ଇଭେଣ୍ଟ ଫଲୋଇଂ ଇମ୍ୟୁନାଇଜେସନ୍ ବା AEFI କିଟ୍ ରଖିବାକୁ ନିର୍ଦ୍ଦେଶ ରହିଛି।

ସେପଟେ ଟିକା ଯୋଗାଣ ସମୟରେ ତାର ନିରାପତ୍ତା ଉପରେ ଧ୍ୟାନ ଦେବାକୁ ମଧ୍ୟ ଅତିରିକ୍ତ ମୁଖ୍ୟାଶାସନ ସଚିବ ସବୁ ଜିଲ୍ଲାପାଳ ଓ ପୌର କର୍ତ୍ତୃପକ୍ଷମାନଙ୍କୁ ଚିଠି ଲେଖିଛନ୍ତି। ଅନ୍ୟପଟେ ଆସନ୍ତାକାଲି ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀମାନଙ୍କ ସହ ଭିଡିଓ କନ୍‌ଫରେନେସିଂ ଜରିଆରେ ଟିକାକରଣ ଉପରେ ଆଲୋଚନା କରିବେ।

ସେପଟେ ସ୍କୁଲ୍ ଖୋଲିବାର ଦୁଇ ଦିନ ପରେ ଗଜପତି ଜିଲ୍ଲାରେ ୩୧ ଜଣ କୋଭିଡ୍ ପଜିଟିଭ୍ ଚିହ୍ନଟ ହେବା ଚିନ୍ତା ବଢ଼ାଇଛି। ସେଥିମଧ୍ୟରୁ ୨୬ ଜଣ ଶିକ୍ଷକ ଶିକ୍ଷୟିତ୍ରୀ ରହିଥିବା ବେଳେ ୨ଜଣ ଛାତ୍ର ଅଛନ୍ତି ଆକ୍ରାନ୍ତଙ୍କୁ ସ୍କୁଲ୍ ଆସିବାକୁ ବାରଣ କରାଯାଇଛି।

ରିପୋର୍ଟ; ପାରଳାଖେମୁଣ୍ଡିରୁ ଆଦର୍ଶ ଦାଶ , ଝାରସୁଗୁଡାର ଭାଗୀରଥି ସାହୁ ଓ ଭୁବନେଶ୍ୱରରୁ ହରିହର ଚାନ୍ଦ

You might also like