ତେଜୁଛି ଶ୍ରୀକାନ୍ତ-ନିରଞ୍ଜନ କଳି ; ଶୃଙ୍ଖଳା କଥା କହି ଶ୍ରୀକାନ୍ତଙ୍କୁ ଟାର୍ଗେଟ୍ କଲେ ତାରା

ଭୁବନେଶ୍ୱର : ହାଟରେ ପଡ଼ି ଦାଣ୍ଡରେ ଗଡ଼ିଲାଣି କଂଗ୍ରେସ କନ୍ଦଳ। ତାରା-କୃଷ୍ଣ କଳି ପରେ ଏବେ ଶ୍ରୀକାନ୍ତ-ନିରଞ୍ଜନ ବିବାଦ ଘନୀଭୂତ ହେବାରେ ଲାଗିଛି। ଶ୍ରୀକାନ୍ତଙ୍କୁ ଆଜି ପୁଣି ଟାର୍ଗେଟ୍ କରିଛନ୍ତି ବିରୋଧୀ ଦଳ ମୁଖ୍ୟ ସଚେତକ ତାରା ପ୍ରସାଦ ବାହିନୀପତି। ଅନୁସୂଚିତ ଜାତି ଓ ଜନଜାତି ମଧ୍ୟରୁ ମୁଖ୍ୟମନ୍ତ୍ରୀ ପ୍ରାର୍ଥୀ କରାଯାଉ ବୋଲି ଶ୍ରୀକାନ୍ତ କରିଥିବା ଅପିଲ୍‌କୁ ଦଳ ବିରୋଧୀ କହିବା ସହ ଦଳୀୟ ନିୟମ ନ ମାନିଲେ ପାର୍ଟିରୁ ବିଦା ହେବା ଦରକାର ବୋଲି କହିଛନ୍ତି।

ସେପଟେ ପିସିସି ଶୃଙ୍ଖଳା କମିଟି ପୂର୍ବତନ ଅଧ୍ୟକ୍ଷା ସନ୍ଧ୍ୟା ମହାପାତ୍ର ତାରାଙ୍କୁ ପୁରୁଣା ଦିନର କଥା ମନେପକାଇ ଦେଇଛନ୍ତି। ପ୍ରସାଦ ହରିଚନ୍ଦନ ପିସିସି ସଭାପତି ଥିବାବେଳେ ତାରା ଅନେକ ଥର ଏଭଳି ବିଶୃଙ୍ଖଳା କରିଛନ୍ତି ଓ ସେ ସଂକ୍ରାନ୍ତରେ ଏଆଇସିସିକୁ ଅବଗତ କରାଯାଇଛି। ତେଣୁ ତାରା ଏଭଳି ମନ୍ତବ୍ୟ ଦେବା ହାସ୍ୟାସ୍ପଦ ବୋଲି ସନ୍ଧ୍ୟା କହିଛନ୍ତି।

ସେପଟେ ଏହି ପ୍ରସଙ୍ଗରେ ଆଜି ମୁହଁ ଖୋଲିଛନ୍ତି ଦଳର ବରିଷ୍ଠ ନେତା ତଥା ପିସିସି ପ୍ରଚାର କମିଟି ଅଧ୍ୟକ୍ଷ ଭକ୍ତ ଦାସ। କହିଛନ୍ତି କଂଗ୍ରେସ ଏକ ବିରାଟ ଦଳ। ଏଥିରେ ବିଭିନ୍ନ ସମୟରେ ଛୋଟ ବଡ଼ ବିଶୃଙ୍ଖଳା ସୃଷ୍ଟି ହୋଇଥାଏ। ଏହାର ଅର୍ଥ ନୁହେଁ ଯେ ସବୁବେଳେ ଶୃଙ୍ଖଳା କମିଟି ବସିବ।

ସେ ଆହୁରି ମଧ୍ୟ କହିଛନ୍ତି, ଯଦି ଛୋଟ ଛୋଟ କଥା ବିଶୃଙ୍ଖଳା, ତେବେ ଏଆଇସିସିର ନିର୍ଦ୍ଦେଶକୁ ଅବମାନନା କରିବା ମଧ୍ୟ ବିଶୃଙ୍ଖଳା। ତେଣେ ବରିଷ୍ଠ ନେତା ସୁରେଶ ରାଉତରାୟ ମଧ୍ୟ ଶ୍ରୀକାନ୍ତଙ୍କୁ ସାନଭାଇ ବୋଲି ସମ୍ବୋଧନ କରିବା ସହ ଦଳ ବଡ଼, ବ୍ୟକ୍ତି ନୁହେଁ ବୋଲି କହିଛନ୍ତି।

ନିର୍ବାଚନ ଯେତିକି ପାଖଉଛି, କଂଗ୍ରେସ କନ୍ଦଳ ସେତିକି ବଢୁଛି। ଆଗକୁ ପୁଣି ରାହୁଲ ଗାନ୍ଧିଙ୍କ ଓଡ଼ିଶା ଗସ୍ତ କାର୍ଯ୍ୟକ୍ରମ ରହିଛି। ତା ପୂର୍ବରୁ କଂଗ୍ରେସ୍‌ର ଘରୋଇ କଳି ଥମୁଛି ନା ବଢୁଛି ତାହା ଏବେ ଚର୍ଚ୍ଚାର ବିଷୟ ପାଲଟିଛି।

You might also like