କଟକରେ ହେବ ଦୁର୍ଗାପୂଜା, ବିନା ଶ୍ରଦ୍ଧାଳୁରେ ପୂଜା ପାଇବେ ମା’

କଟକ: କୋଭିଡ ସଂକ୍ରମଣକୁ ଦୃଷ୍ଟିରେ ରଖି କଟକରେ ଦୁର୍ଗାପୂଜା କଟକଣା ଜାରି କରାଯାଇଥିଲା । ଚଳିତ ବର୍ଷ କୌଣସି ମଣ୍ଡପରେ ହେବନି ଦୁର୍ଗା ପୂଜା ବୋଲି କୁହାଯାଇଥିଲା। ହେଲେ ନିଜ ଘର ଭିତରେ ଦୁର୍ଗା ପୂଜା କରିପାରିବେ ବୋଲି କଟକ ଜିଲ୍ଲାପାଳ କହିଥିଲେ।

ଏହାକୁ ନେଇ କଟକବାସୀଙ୍କ ମଧ୍ୟରେ ବିଷାଦର ଛାଇ ଖେଳି ଯାଇଥିଲା। ଦୁର୍ଗାପୂଜାକୁ ଅନୁମତି ଦେବା ପାଇଁ କଟକ ବାଲୁବଜାର ପୂଜା କମିଟି ପକ୍ଷରୁ ହାଇକୋର୍ଟରେ ଆବେଦନ କରାଯାଇଥିଲା।  ୫ଶହ ବର୍ଷର ପରମ୍ପରାକୁ ଦୃଷ୍ଟିରେ ରଖି ଅନୁମତି ଦେବାକୁ ଆବେଦନ କରାଯାଇଥିଲା।

ତେବେ ଆଜି କଟକରେ ଦୁର୍ଗପୂଜା ଆୟୋଜନକୁ ନେଇ ଜିଲ୍ଲାପାଳଙ୍କ ସୂଚନା ଦେଇଛନ୍ତି।  ମନ୍ଦିର ପରି ପୂଜା ମଣ୍ଡପରେ ପୂଜା ପାଇବେ ମୃଣ୍ମୟୀ ପ୍ରତିମା ।   ତେବେ ସାର୍ବଜନୀନ ପୂଜାକୁ ଅନୁମତି ମିଳି ନାହିଁ ବୋଲି  ଗତକାଲି ଓଟିଭିକୁ ଫୋନ ଯୋଗେ କହିଥିଲେ ଜିଲ୍ଲାପାଳ ଭବାନୀ ଶଙ୍କର ଚୟନୀ। କରୋନା ସ୍ଥିତିକୁ ଦୃଷ୍ଟିରେ ରଖି ଶ୍ରଦ୍ଧାଳୁଙ୍କ ବିନା ମା’ ମଣ୍ଡପରେ ପୂଜା ପାଇବେ ବୋଲି କହିଥିଲେ।

ମଣ୍ଡପରେ ବା ମନ୍ଦିରରେ ଯେଭଳି ଦେବୀଙ୍କ ପୂଜା କରାଯାଉଛି ସେହିଭଳି ମାଙ୍କ ପୂଜା ହୋଇପାରିବ।  କୌଣସି ସ୍ଥାନରେ ଜନ ସମାଗମ ପାଇଁ ଅନୁମତି ଦିଆଯାଇ ପାରିବ ନାହିଁ। ତେବେ ସାମୁହିକ ନୁହେଁ ବ୍ୟକ୍ତିଗତ ସ୍ତରରେ ଯିଏ ଚାହିଁବ ପୂଜା କରିପାରିବ ବୋଲି ଜିଲ୍ଲାପାଳ ସୂଚନା ଦେଇଛନ୍ତି।

କଟକ ବାଲୁବଜାରରେ ହୋଇ ଆସୁଥିବା ୫୦୦ ବର୍ଷର ପୁରୁଣା ପୂଜା ପରମ୍ପରା ବଞ୍ଚାଇ ରଖିବାକୁ ହାଇକୋର୍ଟରେ ଜନସ୍ୱାର୍ଥ ମାମଲା ଦାଏର କରିଛି ବାଲୁବଜାର ପୂଜା କମିଟି । ପ୍ରଶାସନର ନିୟମ-କାନୁନ ଓ କାଇଦା-କଟକଣା ଭିତରେ ପରମ୍ପରା ବଞ୍ଚି ରହୁ ବୋଲି କମିଟି ଦାବି ରଖିଛି। ଦେବୀଙ୍କ ମୃଣ୍ମୟୀ ମୂର୍ତ୍ତି ନିର୍ମାଣ ସହ ଅକ୍ଟୋବର ୨୧ ରୁ ୨୭ ଯାଏଁ ଦୁର୍ଗାପୂଜା ଆୟୋଜନ ପାଇଁ କୋର୍ଟ ଅନୁମତି ଦେବାକୁ ନିବେଦନ କରିଛି । କମିଟି ଦୁର୍ଗାପୂଜା ପାଇଁ ପ୍ରସିଦ୍ଧ କଟକ ସହରରେ ପ୍ରାୟ ଦେଢ଼ ଶହରୁ ଅଧିକ ମଣ୍ଡପରେ ପୂଜା ପାଇଥାନ୍ତି ଜଗତଜନନୀ ।

 

You might also like