୫୦୦ ଟଙ୍କା ପାଇଁ ନଈ ବାଲିରେ ସପ୍ତମ ଶ୍ରେଣୀ ଛାତ୍ରଙ୍କୁ ଗାତରେ ଜୀଅନ୍ତା ପୋତିବା ନେଇ ଅଭିଯୋଗ

କୁଜଙ୍ଗ: ମାତ୍ର କିଛି ଟଙ୍କା ପାଇଁ ଜଣେ ସପ୍ତମ ଶ୍ରେଣୀ ଛାତ୍ରଙ୍କୁ ଗାତରେ ଜୀଅନ୍ତା ପୋତିବା ନେଇ ଅଭିଯୋଗ ହୋଇଛି। ଜଗତସିଂହପୁର ଜିଲ୍ଲା କୁଜଙ୍ଗ ଥାନା ଅନ୍ତର୍ଗତ ଜିଲ୍ଲାନାସୀ ଗାଁରେ ଏହି ଘଟଣା ଘଟିଛି।

ସୂଚନା ଅନୁସାରେ, ଗତ ବୁଧବାର ଦିନ ଜିଲ୍ଲାନାସୀ ଗାଁର ଜଣେ ସପ୍ତମ ଶ୍ରେଣୀ ଛାତ୍ରଙ୍କୁ ଅନ୍ୟ ଜଣେ ଛାତ୍ର ୫୦୦ ଟଙ୍କା ପାଇଁ ନଦୀ ପଠାରେ ଗାତ କରି ବେକ ପର୍ଯ୍ୟନ୍ତ ପୋତି ଦେଇଥିବା ଅଭିଯୋଗ ହୋଇଥିଲା।

ଏହି ଘଟଣାକୁ ନେଇ ଏକ ମାମଲା ରୁଜୁ ହେବା ସହ ଘଟଣାର ସତ୍ୟତା ପାଇଁ ପୁଲିସ୍‌ ନଦୀ ପଠାକୁ ଯାଇ ତଦନ୍ତ କରିଥିଲା।  ତେବେ ନଦୀ ପଠାରେ ଗାତ ଖୋଳା ଯାଇଥିବା ଭଳି କୌଣସି ସୁରାକ ମିଳିନଥିବା କୁଜଙ୍ଗ ଆଇଆଇସି କହିଛନ୍ତି। ସେମାନଙ୍କ ମଧ୍ୟରେ ଉକ୍ତ ଦିନ ମାର୍‌ପିଟ୍‌ ଓ ଝଗଡ଼ା ହୋଇଥିଲା। ଏନେଇ ଏକ ଅଭିଯୋଗ ହୋଇଛି ବୋଲି ଆଇଆଇସି କହିଛନ୍ତି। ସେପଟେ ଏକ ଟିମ୍ ନାବାଳକ ଛାତ୍ରଙ୍କ ଗାଁକୁ ଯାଇ ପଚରାଉଚରା କରିଛି।

ଅନ୍ୟପଟେ, ପୁଲିସ୍‌ ଘଟଣାର ତଦନ୍ତ ଜାରି ରଖିଛି।

You might also like