ଭୁବନେଶ୍ୱର : ସାର ଯୋଗାଣ ନେଇ କୃଷି ମନ୍ତ୍ରୀଙ୍କୁ ରାଜ୍ୟ ବିଜେପିର ଟାର୍ଗେଟ୍ । ପ୍ରେସମିଟ୍ କରି ରାଜ୍ୟ ବିଜେପି ସାଧାରଣ ସମ୍ପାଦକ ଗୋଲକ ମହାପାତ୍ର କହିଛନ୍ତି, ମିଥ୍ୟା ତଥ୍ୟ ଦେଇ ଓଡ଼ିଶା ଲୋକଙ୍କୁ ଭ୍ରମିତ କରୁଛନ୍ତି ମନ୍ତ୍ରୀ ଅରୁଣ ସାହୁ । ଗତ ୩ ବର୍ଷ ଭିତରେ ରାଜ୍ୟକୁ ଅଧିକ ସାର ପ୍ରଦାନ କରିଛନ୍ତି କେନ୍ଦ୍ର ସରକାର । ତଥ୍ୟକୁ ଆଧାରରେ ରାଜ୍ୟ ପାଖରେ ଆବଶ୍ୟକତା ଠାରୁ ଅଧିକ ସାର ମହଜୁଦ୍ ରହିଛି । ହେଲେ ଏ ସମ୍ପର୍କରେ ଅଜଣା ମନ୍ତ୍ରୀ ଅରୁଣ ସାହୁ ସାରର ଅଭାବ ଥିବା ନେଇ କେନ୍ଦ୍ର ସରକାରଙ୍କୁ ଚିଠି ଲେଖିଛନ୍ତି  ।

ଓଡ଼ିଶା ପାଇଁ ୨୦୨୦-୨୧ରେ ୫.୬୫ ଲକ୍ଷ ମେଟ୍ରିକ ଟନ୍ ସାର ଆବଶ୍ୟକ ଥିବାବେଳେ କେନ୍ଦ୍ର ଦେଇଛି ୬.୬୬ ମେଟ୍ରିକ ଟନ୍ । ସେହିପରି ସିଧାସଳଖ ଡିବିଟି ମାଧ୍ୟମରେ ଲୋକଙ୍କ ପାଖରେ ୫.୨୭ ଲକ୍ଷ ମେଟ୍ରିକ ଟନ୍ ରିଆ ସାର ଲୋକଙ୍କ ପାଖରେ ପହଁଚିଛି । ସାରର ଆବଶ୍ୟକତା ପୂରଣ କରିବା ସତ୍ତ୍ବେ କୃଷି ମନ୍ତ୍ରୀ କେନ୍ଦ୍ର ନିକଟକୁ କିପରି ଚିଠି ଲେଖିଲେ ବୋଲି ପ୍ରଶ୍ନ କରିଛନ୍ତି ରାଜ୍ୟ ବିଜେପି ସାଧାରଣ ସମ୍ପାଦକ । ମନ୍ତ୍ରୀଙ୍କ ଚିଠିରେ ଯଥାର୍ଥତା କିଛି ରହିଲା ନାହିଁ ବୋଲି ସେ କହିଛନ୍ତି । ରାଜ୍ୟ ସରକାରଙ୍କ ତ୍ରୁଟିପୂର୍ଣ୍ଣ ନୀତି ଯୋଗୁଁ ଚାଷୀ ହଇରାଣ ହେଉଥିବା ଅଭିଯୋଗ କରିଛନ୍ତି ଗୋଲକ  । ସେପଟେ ବିଜେପିର ପ୍ରେସମିଟ୍ ଉପରେ ମନ୍ତ୍ରୀ ଅରୁଣ ସାହୁ କିମ୍ବା ସରକାରୀ ଦଳର ପ୍ରତିକ୍ରିୟା ମିଳିପାରିନାହିଁ  ।

ସେପଟେ ରବି ଧାନ କିଣାବିକାରେ ବ୍ୟାପକ  ଅବ୍ୟବସ୍ଥା ହେଉଥିବା ଅଭିଯୋଗ ଆସିଛି । ମୌସୁମୀ ବର୍ଷାରେ ମଣ୍ଡିରେ ଭିଜୁଛି ଧାନ। ହନ୍ତସନ୍ତ ହେଉଛନ୍ତି ଚାଷୀ । ମିଲର ଓ ସରକାରଙ୍କ ମଧୁ ଚନ୍ଦ୍ରିକା ଯୋଗୁଁ ଏଭଳି ସ୍ଥିତି ଉପୁଜିଥିବା ଅଭିଯୋଗ ଆଣିଛି  କଂଗ୍ରେସ । ଏ ନେଇ ସାମ୍ବାଦିକ ସମ୍ମିଳନୀ କରି ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି ପ୍ରଦେଶ କିଷାନ କଂଗ୍ରେସ ସଭାପତି  । ୧୭ ଲକ୍ଷ ମେଟ୍ରିକ୍ ଟନ୍ ଧାନ କିଣିବା ପାଇଁ ସରକାର ଘୋଷଣା କରିଥିଲେ । ଜୁନ୍ ୩୦ରେ ଧାନ କିଣା ଅବଧି ସରିବାକୁ ଥିବା ବେଳେ ଏବେ ସେତିକି ପରିମାଣର ଧାନ କିଣାଯିବା ନେଇ ଆଶା ଦିଶୁନାହିଁ । ଚାଷୀଙ୍କ ହାତରେ ଆଉ ମାତ୍ର ୭ ଦିନ ସମୟ ଥିବାରୁ କିପରି ଧାନ କିଣା ସମ୍ଭବ ହେବ ବୋଲି କଂଗ୍ରେସ ପ୍ରଶ୍ନ କରିଛି ।

 

Other Stories