ସେଲଟର ହୋମ୍‌ରେ ନିର୍ଯାତନାକୁ ନେଇ ସାଂଘାତିକ ଅଭିଯୋଗ

ଗୁଡ୍ ନ୍ୟୁଜ୍ ଇଣ୍ଡିଅା ସଂସ୍ଥା ଧର୍ମ ପରିବର୍ତ୍ତନ କରୁଥିଲା

ଢେଙ୍କାନାଳ : ବେଲଟିକିରି ସେଲଟର୍ ହୋମ୍‌ ନିର୍ଯାତନା ମାମଲାକୁ ନେଇ ରାଜ୍ୟ ସରକାରଙ୍କ ଉପରେ ବର୍ଷିଛି ବିଜେପି। ଗୁଡ୍ ନ୍ୟୁଜ୍ ଇଣ୍ଡିଅା ସଂସ୍ଥା ନାଁରେ ସାଂଘାତିକ ଅଭିଯୋଗ ଅାଣିଛନ୍ତି ବିଜେପି ମହିଳା ସଭାନେତ୍ରୀ ପ୍ରଭାତୀ ପରିଡ଼ା। ସେଲ୍‌ଟର ହାଉସ୍ ପାଇଁ କଡ଼ା ନିୟମ ଥିବା ସତ୍ତ୍ୱେ ରାଜ୍ୟ ସରକାରଙ୍କ ଖାମଖିଅାଲି ପାଇଁ ବେଧଢ଼କ ଭାବେ ସଂସ୍ଥା ତା କାୟା ବିସ୍ତାର କରିଛି।

ଅାଶ୍ରୟ ଗୃହ ନାଁରେ ଅାଦିବାସୀଙ୍କୁ ଠକି ଧର୍ମ ପରିବର୍ତ୍ତନ କରାଯାଉଛି। ଅାଦିବାସୀ ବହୁଳ ଅଞ୍ଚଳରେ ଏହାର ପରିମାଣ ଅଧିକ ଥିବା କହିଛନ୍ତି ପ୍ରଭାତୀ। କେବଳ ଯେ ଝିଅ ନୁହଁନ୍ତି, ଛୋଟ ବୟସର ପୁଅଙ୍କୁ ବି ନିର୍ଯାତନା ଦିଅାଯାଉଛି ବୋଲି ସେ ଅଭିଯୋଗ କରିଛନ୍ତି।

ଖାଲି ଏତିକି ନୁହଁ, ବେଲଟିକିରି ସେଲଟର୍ ହୋମ୍‌ରୁ ବିଦେଶକୁ ନାବାଳିକା ଚାଲାଣ ହେଉଥିବା ନେଇ ସେ ସନ୍ଦେହ ପ୍ରକଟ କରିଛନ୍ତି। ଏହାଛଡ଼ା ଭଦ୍ରକ ନନ୍ଦପୁର ସେଲ୍‌ଟର ହୋମ୍‌କୁ ସରକାର ସ୍ୱୀକୃତି ଦେଇଛନ୍ତି। ହେଲେ ଏନେଇ କିପରି ମନ୍ତ୍ରୀ ମନା କରୁଛନ୍ତି ତାକୁ ନେଇ ପ୍ରଶ୍ନ ଉଠାଇଛନ୍ତି ସେ।

ଘଟଣାକୁ ନେଇ ମନ୍ତ୍ରୀ ଇସ୍ତଫା ଦିଅନ୍ତୁ ବୋଲି ଦାବି କରିଛନ୍ତି ପ୍ରଭାତୀ। ସେପଟେ ଘଟଣାକୁ ନେଇ ପ୍ରତିକ୍ରିୟା ରଖିଛନ୍ତି ମନ୍ତ୍ରୀ ପ୍ରଫୁଲ ସାମଲ। ମୁଖ୍ୟମନ୍ତ୍ରୀ ଚାହିଁଲେ ସେ ଇସ୍ତଫା ଦେବେ। ଏହାକୁ ନେଇ ରାଜନୀତିକରଣ କରାଯାଉଥିବା ସେ କହିଛନ୍ତି।

ସେପଟେ ସେଲଟର ହୋମ୍ ଘଟଣା ପରେ ପ୍ରଶାସନ ତତ୍ପର ହୋଇଉଠିଛି। ବିଭିନ୍ନ ସ୍ଥାନରେ ଥିବା ଗୁଡ୍ ନ୍ୟୁଜ୍ ଇଣ୍ଡିଅାର ଶାଖାରେ ଚଢ଼ାଉ। ଭଦ୍ରକ ଜିଲ୍ଲା ତିହିଡ଼ି ବ୍ଲକ ନନ୍ଦପୁର ସେଲ୍‌ଟର୍ ହୋମ୍‌ରେ ଜିଲ୍ଲା ପ୍ରଶାସନ ପକ୍ଷରୁ ଚଢ଼ାଉ କରାଯାଇଛି। ଉପଜିଲ୍ଲାପାଳ ସୁଚାରୁ ବଳ, ଜିଲ୍ଲା ଶିଶୁ ମଙ୍ଗଳ ସମିତି ଡ୍ରିମ୍ ସେଲ୍‌ଟର୍‌ରେ ଚଢ଼ାଉ କରି ଅନ୍ତେବାସୀଙ୍କୁ ପଚରା ଉଚରା କରିଛି।

ଏହି ଅାଶ୍ରମରେ ଏବେ ୧୬୪ ଜଣ ଅନ୍ତେବାସୀ ରହୁଛନ୍ତି। ସେମାନଙ୍କ ମଧ୍ୟରେ ୭୯ ଜଣ ଝିଅ ହୋଇଥିବା ବେଳେ ୮୫ ଜଣ ପୁଅ ଅଛନ୍ତି। ସେହିପରି ମୟୂରଭଂଜ ଜିଲ୍ଲା ଉଦଳା ବ୍ଲକ ଚୁଳିଅା ପୋଷିରେ ଥିବା ଗୁଡ୍ ନ୍ୟୁଜ୍ ଡ୍ରିମ୍ ହାଉସ୍ ସେଲ୍‌ଟର ହୋମ୍‌ରେ ମଧ୍ୟ ରେଡ୍ କରିଛି ଜିଲ୍ଲା ପ୍ରଶାସନ। ଉପଜିଲ୍ଲାପାଳଙ୍କ ନେତୃତ୍ୱରେ ୫ ଜଣିଅା ଟିମ୍ ରେଡ୍ କରି ଅନ୍ତେବାସୀଙ୍କୁ ପଚରା ଉଚରା କରିଛନ୍ତି। ଏହି ସେଲ୍‌ଟରର ହୋମ୍‌ରେ ୬୧ ଜଣ ଅନ୍ତେବାସୀ ରହୁଛନ୍ତି। ଏହାର ମଂଜୁରୀ ଅବଧି ୮ ମାସ ତଳୁ ଶେଷ ହୋଇଥିବା ଜଣାପଡ଼ିଛି। ସେହିପରି ରାଇରଙ୍ଗପୁର ସେଲ୍‌ଟର୍ ହୋମ୍‌ରେ ମଧ୍ୟ ରେଡ୍ ହୋଇଛି।

You might also like