ଖୁସି ଖବର; ରାଜ୍ୟରେ ଆରମ୍ଭ ହେଲା ଆଣ୍ଟିବଡି କକଟେଲ୍ ଥେରାପି, ଏହାଦ୍ୱାରା ଟ୍ରମ୍ପ ହୋଇଥିଲେ ସୁସ୍ଥ

ଭୁବନେଶ୍ୱର: ଓଡ଼ିଶାରେ ଆରମ୍ଭ ହେଲା ଆଣ୍ଟିବଡି କକଟେଲ୍ ଥେରାପି । ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଜଣେ ୮୨ ବୟସ୍କ କୋଭିଡ୍ ରୋଗୀଙ୍କୁ ପ୍ରଥମ କରି ଏହି ଚିକିତ୍ସା ପ୍ରଦାନ କରାଯାଇଛି । ଗତ ମେ’ ମାସରେ ଏହି ଚିକିତ୍ସାକୁ ଭାରତରେ ଅନୁମତି ମିଳିଥିଲା ।

ଗତବର୍ଷ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କରୋନାରେ ଆକ୍ରାନ୍ତ ହୋଇଥିବା ସମୟରେ ତାଙ୍କୁ ମଧ୍ୟ ଏହି ଥେରାପି ଦିଆଯାଇଥିଲା । ଏହି ଆଣ୍ଟିବଡି କକଟେଲ୍ ମୁଖ୍ୟତଃ ଏକ ଇଂଜେକ୍ସନ ଯାହାକି କ୍ୟାସିରିଭାମ୍ବ ଓ ଆଇଡେଭିମ୍ୟାବ୍ ସମିଶ୍ରଣରେ ପ୍ରସ୍ତୁତ କରାଯାଇଛି । ଆମେରିକା ଓ ୟୁରୋପରେ ଏହି ଚିକିତ୍ସା ପଦ୍ଧତିର ବହୁଳ ବ୍ୟବହାର କରାଯାଉଛି । ୧୨ବର୍ଷରୁ ଅଧିକ ବୟସର ଯେକେହି କୋଭିଡ୍ ସଂକ୍ରମିତ ହେବାର ୭ରୁ ୮ ଦିନ ମଧ୍ୟରେ ଆଣ୍ଟିବଡ଼ି କକଟେଲ୍ ଚିକିତ୍ସା କରାଗଲେ ୭୦ରୁ ୮୦ ପ୍ରତିଶତ ରୋଗୀଙ୍କୁ ହସପିଟାଲ ଯିବାକୁ ପଡିବ ନାହିଁ । ଏନେଇ ବିଭିନ୍ନ ପରୀକ୍ଷଣରୁ ସ୍ପଷ୍ଟ ହୋଇଥିବା ଡାକ୍ତର ଓ ବିଶେଷଜ୍ଞମାନେ ମଧ୍ୟ ସୂଚନା ଦେଇଥିଲେ ।

ଆଣ୍ଟିବଡି କକ୍ଟେଲ ରୋଗ ବିରୁଦ୍ଧରେ ଲଢୁଥିବା ଏକ ପ୍ରୋଟିନ୍ ଯାହାକୁ କୁତ୍ରିମ ଉପାୟରେ ଲାବରୋଟୋରୀରେ ପ୍ରସ୍ତୁତ କରାଯାଏ । ଦେଶର ଅନେକ ସ୍ଥାନ ସହ ଏବେ ଭୁବନେଶ୍ୱର ଆପୋଲୋ ହସ୍ପିଟାଲରେ ଏହି ଥେରାପି ଆରମ୍ଭ ହୋଇଛି । ଏହି ଚିକିତ୍ସା ପଦ୍ଧତି ଆଗକୁ ବହୁ ଜୀବନ ବଞ୍ଚାଇବ ବୋଲି ଆଶା କରାଯାଉଛି ।

You might also like