ଓଡ଼ିଶାକୁ ଆଉ ଏକ ହଜାର କୋଟି ଟଙ୍କା ସହାୟତା ରାଶି ଘୋଷଣା କଲେ ପ୍ରଧାନମନ୍ତ୍ରୀ

ଭୁବନେଶ୍ୱର : ଫୋନି କ୍ଷୟକ୍ଷତିର ସହାୟତା ପାଇଁ ଓଡ଼ିଶାକୁ ଆଉ ଏକ ହଜାର କୋଟି ଟଙ୍କା ସହାୟତା ରାଶି ଘୋଷଣା କରିଛନ୍ତି ପ୍ରଧାନମନ୍ତ୍ରୀ ମୋଦି। ଏହା ସହିତ ଫୋନିରେ ମୃତ୍ୟୁ ହୋଇଥିବା ବ୍ୟକ୍ତିଙ୍କ ପରିବାରକୁ ମିଳିବ ୨ ଲକ୍ଷ ଟଙ୍କା।  ଆହତଙ୍କୁ ମିଳିବ ୫୦ ହଜାର ଟଙ୍କା।  ଆକାଶମାର୍ଗରୁ କ୍ଷୟକ୍ଷତି ଓ ସମୀକ୍ଷା ପରେ ମୋଦି କହିଛନ୍ତି, ୧୪ ହଜାର ଗାଁ ପ୍ରଭାବିତ ହୋଇଛି।

୧୨ ଲକ୍ଷ ଲୋକଙ୍କୁ ନିରାପଦ ଜାଗାକୁ ସ୍ଥାନାନ୍ତର କରିଥିବାରୁ ରାଜ୍ୟ ସରକାରଙ୍କୁ ପ୍ରଶଂସା କରିଛନ୍ତି। ଏବେ ପାଣି, ବିଜୁଳି, ସ୍ୱାସ୍ଥ୍ୟ ସେବାକୁ ଗୁରୁତ୍ୱ ଦିଆଯାଉଛି। ଏଥିପାଇଁ କେନ୍ଦ୍ର ସରକାରଙ୍କ ପକ୍ଷରୁ ମେସିନ, ଆର୍ଥିକ ସହାୟତା ସହ ପର୍ଯ୍ୟାପ୍ତ ମାନବ ସମ୍ବଳ ଯୋଗାଇ ଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି ମୋଦି।

ବାତ୍ୟା ଭଳି ଦୁର୍ବିପାକର ମୁକାବିଲା ପାଇଁ ସ୍ଥାୟୀ ଯୋଜନା କରାଯିବ। ଏଥିପାଇଁ ଓଡ଼ିଶାକୁ ବ୍ଲୁ ପ୍ରିଣ୍ଟ ପ୍ରସ୍ତୁତି ପାଇଁ କୁହାଯାଇଛି। ପୁନରୁଦ୍ଧାର ପାଇଁ ପିଏମ୍ଓ ଟିମ୍ ଭୁବନେଶ୍ୱରରେ ରହି ଏହାର ତର୍ଜମା କରିବେ। ଏହା ପରେ କେନ୍ଦ୍ରୀୟ ଟିମ୍ ଆସିବ ଓ ଓ ବିସ୍ତୃତ ଭାବେ କ୍ଷୟକ୍ଷତି ଆକଳନ କରାଯିବ ବୋଲି ମୋଦି କହିଛନ୍ତି।

ଆଜି ପ୍ରଧାନମନ୍ତ୍ରୀ ବାୟୁସେନା ବିମାନରେ ପହଞ୍ଚିବା ପରେ ସ୍ୱତନ୍ତ୍ର ହେଲିକପ୍ଟରରେ ଆକାଶ ମାର୍ଗରୁ ସ୍ଥିତି ପରଖିଥିଲେ। ପ୍ରଧାନମନ୍ତ୍ରୀଙ୍କ ସହ ରାଜ୍ୟପାଳ ଗଣେଶୀ ଲାଲ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଆକାଶ ମାର୍ଗରୁ କ୍ଷୟକ୍ଷତିର ଆକଳନ କରିଥିଲେ। ଏହାପରେ ପ୍ରଧାନମନ୍ତ୍ରୀ ବରିଷ୍ଠ ଅଧିକାରୀଙ୍କ ସହ ବିମାନବନ୍ଦରରେ ଫୋନି କ୍ଷୟକ୍ଷତି ସମ୍ପର୍କରେ ଆଲୋଚନା କରିଥିଲେ ।

ଏହି ବୈଠକରେ ରାଜ୍ୟପାଳ ଗଣେଶୀ ଲାଲ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ବିଭିନ୍ନ ବିଭାଗର ଅଧିକାରୀମାନେ ଉପସ୍ଥିତ ଥିଲେ। ଫୋନିର ମୁକାବିଲା ପାଇଁ କେନ୍ଦ୍ର ସରକାର ପୂର୍ବରୁ ୩୪୧ କୋଟି ଟଙ୍କାର ଆଗୁଆସହାୟତା ଘୋଷଣା କରିଥିଲେ।

You might also like