ଭୁବନେଶ୍ୱର: ଯୁକ୍ତ ଦୁଇ ପ୍ରଥମ ବର୍ଷ ଛାତ୍ରଛାତ୍ରୀଙ୍କ ପାଇଁ ଆରମ୍ଭ ହେବ ଭିଡିଓ କ୍ଲାସ । ମହାମାରୀ କରୋନା ଯୋଗୁଁ ପୂର୍ବବର୍ଷ ଭଳି ଏଥର ବି ଭିଡିଓ କ୍ଲାସ ଅନୁଷ୍ଠିତ ହେବ । ଏନେଇ ସବୁ ଉଚ୍ଚ ମାଧ୍ୟମିକ ସ୍କୁଲ ଅଧ୍ୟକ୍ଷଙ୍କୁ ଚିଠି ଲେଖିଲା DHSE । ଏଥିପାଇଁ ଆଗ୍ରହୀ ଓ ଅନୁଭବୀ ଶିକ୍ଷକଙ୍କ ତାଲିକା ମଧ୍ୟ ମାଗିଲା DHSE । ମେ’ ୨୧ ତାରିଖ ସୁଦ୍ଧା ଶିକ୍ଷକଙ୍କ ତାଲିକା ଦେବାକୁ DHSE ପକ୍ଷରୁ ନିର୍ଦ୍ଦେଶ ଦିଆଯାଇଛି । ତେବେ କରୋନା କାଳରେ ସ୍କୁଲ, କଲେଜ ସହ ଘରୋଇ କୋଚିଂ ସେଣ୍ଟର ସଂସ୍ଥା ତଥା ଘରୋଇ ଟ୍ୟୁସନ ମଧ୍ୟ ବନ୍ଦ ରହିଛି । ତେଣୁ ଛାତ୍ରଛାତ୍ରୀଙ୍କ ପାଠ ପଢ଼ାରେ ବଡ଼ ବ୍ୟାଘାତ ଘଟିଛି ।
ଗତ ବର୍ଷ ମଧ୍ୟ ଛାତ୍ରଛାତ୍ରୀଙ୍କ ପାଠପଢ଼ାରେ ଏଭଳି ବ୍ୟାଘତ ସୃଷ୍ଟି ହୋଇଥିବାରୁ ଦଶମ ଓ ଦ୍ୱାଦଶ ଶ୍ରେଣୀ ପିଲାଙ୍କ ପରୀକ୍ଷା ବାତିଲ କରାଯାଇଥିଲ । ସବୁଠାରୁ ବଡ଼ କଥା ହେଲା ପିଲାମାନେ ସ୍କୁଲ-କଲେଜ ବନ୍ଦ ଥିବାରୁ ପାଠ ପଢ଼ିପାରି ନଥିଲେ । ତେଣୁ ସେମାନେ ବାର୍ଷିକ ପରୀକ୍ଷାକୁ ବିରୋଧ କରି ରାଜରାସ୍ତାକୁ ଓହ୍ଲାଇଥିଲେ । ଯାହାକୁ ନେଇ ଗଣମାଧ୍ୟମରେ ଅନେକ ଚର୍ଚ୍ଚା ମଧ୍ୟ ହୋଇଥିଲା । ଖାଲି ସେତିକି ନୁହେଁ ସ୍କୁଲ-କଲେଜ ପିଲାଙ୍କ ବିକ୍ଷୋଭ ଭିଡିଓ ମଧ୍ୟ ଭାଇରାଲ ହୋଇଥିଲା ।
ଗତ ବର୍ଷ ମଧ୍ୟ ପିଲାଙ୍କ ପାଇଁ ଭିଡିଓ କ୍ଲାସ ବ୍ୟବସ୍ଥା କରାଯାଇଥିଲା । ବିଭିନ୍ନ ବିଷୟର ଅଧ୍ୟାପକ ଓ ଅଧ୍ୟାପିକାମାନେ ଛାତ୍ରୀଛାତ୍ରଙ୍କୁ ନେଇ ହ୍ୱାଟସ୍ଆପ ଗ୍ରୁପ୍ କରିଥିଲେ । ଏହା ମାଧ୍ୟମରେ ଅଧ୍ୟାପକମାନେ ଅନ୍ଲାଇନ କ୍ଲାସ ହୋଇଥିଲା । ଶିକ୍ଷକଙ୍କ ଦ୍ୱାରା ସବୁ ବିଷୟରେ ଶିକ୍ଷାଦାନର ଭିଡିଓ ରେକର୍ଡିଂ କରାଯାଇ ବିଭିନ୍ନ ପୋର୍ଟାଲରେ ଅପଲୋଡ୍ କରାଯାଇଥିଲା ।