ଭୁବନେଶ୍ୱର: ମାଟ୍ରିକ୍ ଓ ଯୁକ୍ତ ଦୁଇ ପରେ ଏବେ ୟୁଜି-ପିଜି ପରୀକ୍ଷାକୁ ନେଇ ଦ୍ୱନ୍ଦ୍ୱ । ପରୀକ୍ଷା ହେବ ନା ନାହିଁ ? ଯଦି ହେବ କେମିତି ଓ କେତେବେଳେ ? କାରଣ ସାଧାରଣ ସମୟରେ ଏବେ ସୁଦ୍ଧା ଶେଷ ସେମିଷ୍ଟର ପରୀକ୍ଷା ଆରମ୍ଭ ହୋଇଯାଇଥାଏ । ମାତ୍ର କରୋନା ଯୋଗୁଁ ଅନଲାଇନରେ ପାଠପଢା ଚାଲିଥିବା ବେଳେ ଏଯାଏଁ କୋର୍ସ ସରିନି ।
ସେହିପରି ଅନେକ ଛାତ୍ରଛାତ୍ରୀ ଏସୁବିଧାରୁ ବି ବଞ୍ଚିତ ହୋଇଛନ୍ତି । ତେବେ ଆସନ୍ତା ଶନିିବାର ଉଚ୍ଚଶିକ୍ଷା ବିଭାଗ ଡାକିଥିବା କୁଳପତି ସମ୍ମିଳନୀରେ ପିଲାଙ୍କ ପାଠପଢା ଓ ପରୀକ୍ଷା ନେଇ କିଛି ନିଷ୍ପତ୍ତି ନିଆଯିବ ବୋଲି ଆଶା କରାଯାଉଛି।
କେମିତି ହେବ ୟୁଜି-ପିଜି ଫାଇନାଲ୍ ସେମିଷ୍ଟର ପରୀକ୍ଷା ? କରୋନା କାଳରେ ଅନଲାଇନରେ ପରୀକ୍ଷା କରିବ କି ଉଚ୍ଚ ଶିକ୍ଷା ବିଭାଗ ? ନା ବିକଳ୍ପ ମାର୍କିଂ ବ୍ୟବସ୍ଥା କରାଯିବ ? ସେପଟେ ଗ୍ରୀଷ୍ମ ଅବକାଶ ପରେ ଜୁନ୍ ପହିଲାରୁ ଆରମ୍ଭ ହୋଇଛି ଦ୍ୱିତୀୟ ପର୍ଯ୍ୟାୟ ଅନ୍ଲାଇନ୍ କ୍ଲାସ୍ । ତେଣୁ କୋର୍ସ ସରିନାହିଁ । ସେହିପରି କମ୍ପୁଟର, ଆଣ୍ଡ୍ରଏଡ୍ ଫୋନ ଓ ଇଣ୍ଟରନେଟ୍ ସୁବିଧା ନଥିବାରୁ ଉପାନ୍ତ ଅଞ୍ଚଳର ବହୁ ଛାତ୍ରଛାତ୍ରୀ ଅନ୍ଲାଇନ୍ କ୍ଲାସରୁ ବଞ୍ଚିତ ହୋଇଛନ୍ତି । ଫଳରେ ସବୁଠାରୁ ବେଶୀ ଚିନ୍ତାରେ ଅଛନ୍ତି ଯୁକ୍ତ ତିନି ଓ ପିଜି ଶେଷ ସେମିଷ୍ଟର ପରୀକ୍ଷାର୍ଥୀ ।
ଆହୁରି ପଢନ୍ତୁ : ରାଜ୍ୟରେ ବାତିଲ ହେଲା ଯୁକ୍ତ ଦୁଇ ପରୀକ୍ଷା।
ଗତବର୍ଷ ୟୁଜି ଓ ପିଜିର କେବଳ ଶେଷ ସେମିଷ୍ଟର ପରୀକ୍ଷା ହୋଇଥିଲା । ତାପୁଣି ଅନଲାଇନ୍ରେ । ଅନ୍ୟ ସେମିଷ୍ଟର ଛାତ୍ରଛାତ୍ରୀଙ୍କୁ କ୍ଲାସ୍ ପ୍ରମୋସନ ଦିଆଯାଇଥିଲା । ତେବେ ପାଠପଢା ଓ ପରୀକ୍ଷା ଦ୍ୱନ୍ଦ୍ୱ ଦୂର ପାଇଁ ଆସନ୍ତା ଶନିବାର ଉଚ୍ଚଶିକ୍ଷା ବିଭାଗ କୁଳପତି ସମ୍ମିଳନୀ ଡାକାଇଛି । କୋର୍ସ କେତେ ଆଗେଇଛି ଓ ପରୀକ୍ଷା କେମିତି କରାଯିବ ସେନେଇ ଏଥିରେ ଆଲୋଚନା ହେବ । ଏନେଇ ବିଶ୍ୱବିଦ୍ୟାଳୟଗୁଡିକ ତରଫରୁ ମତାମତ ରଖାଯିବ ।
ତେବେ ରାଜ୍ୟରେ ପ୍ରାୟ ୮୫୦ ଡିଗ୍ରୀ କଲେଜ ରହିଛି । ୧୧ଟି ବିଶ୍ୱବିଦ୍ୟାଳୟ ଅଧିନରେ ଏସବୁ କଲେଜ ପରିଚାଳିତ ହେଉଛନ୍ତି । ତେବେ ପରୀକ୍ଷା ପରିଚାଳନା ନେଇ ୟୁଜିସି ପକ୍ଷରୁ ଏଯାଏଁ କୌଣସି ନିଷ୍ପତ୍ତି ନିଆଯାଇନାହିଁ । ତେଣୁ ଉଚ୍ଚ ଶିକ୍ଷା ବିଭାଗ ୟୁଜିସି ନିଷ୍ପତ୍ତିକୁ ଅପେକ୍ଷା କରିବ ବୋଲି ଆଶା କରାଯାଉଛି ।