୬ ମାସ ପରେ ସରିବ ଡେଡ୍‌ ଲାଇନ୍, ଚିର୍ମା ବ୍ରିଜ୍‌ର ପିଲର ଉଠିଲାନି: ହତାଶ ହେଲେ ୪୦ ଗାଁର ଲୋକେ

ନବରଙ୍ଗପୁର(ନବଘନ ବିଷୋୟୀ): କଚ୍ଛପ ଗତିରେ ଚାଲିଛି ଇନ୍ଦ୍ରାବତୀ ନଦୀରେ ଚିର୍ମା ବ୍ରିଜ୍ ନିର୍ମାଣ। ଫଳରେ ଗମନାଗମନ ପାଇଁ ପ୍ରତିଦିନ କାଠ ଧଡ଼ାରେ ଯିବାଆସିବା କରୁଛନ୍ତି କୋରାପୁଟ ଜିଲ୍ଲା କୋଟପାଡ଼ ବ୍ଲକ ଓ ନବରଙ୍ଗପୁର ଜିଲ୍ଲା କୋଷାଗୁମୁଡ଼ା ବ୍ଲକର ଲୋକେ । ୨୦୧୬ ମସିହାରୁ କାମ ଆରମ୍ଭ ହୋଇଥିଲେ ବି ୩ ବର୍ଷ ମଧ୍ୟରେ ବ୍ରିଜର ପିଲାର୍ ବି ଉଠିନି । ସେପଟେ ଡେଡ୍-ଲାଇନ୍ ସରିବାକୁ ଅଛି ଆଉ ମାତ୍ର ୬ ମାସ। ହେଲେ କେବେ ବ୍ରିଜ୍ କାମ ସରିବ, ସେନେଇ ଦେଖାଦେଇଛି ଅନିଶ୍ଚିତତା ।

ଇନ୍ଦ୍ରାବତୀ ନଦୀ ଉପରେ ନିର୍ଭର କରନ୍ତି କୋରାପୁଟ ଜିଲ୍ଲାର କୋଟପାଡ଼ ବ୍ଲକ ଓ ନବରଙ୍ଗପୁରର କୋଷାଗୁମୁଡ଼ା ବ୍ଲକର ୪୦ରୁ ଅଧିକ ଗାଁ । ନଦୀ ଆରପାଖେ ବଜାର, ହାଟ । ତେଣୁ ନଦୀ ପାର ହୋଇ ନ ଗଲେ ଘରେ ଚୁଲି ଜଳିବା କଷ୍ଟ ।

ବାଧ୍ୟ ହୋଇ ଲୋକେ ନିଜେ ନଦୀରେ କାଠ ଧଡ଼ା ବାନ୍ଧି ବିପଜ୍ଜନକ ଭାବେ ଯିବା ଆସିବା କରୁଛନ୍ତି। ସବୁଠାରୁ କଷ୍ଟ ବର୍ଷା ଦିନରେ। କାରଣ ବର୍ଷା ଦିନେ ଧଡ଼ା ବୁଡ଼ି ଯାଏ। ବହୁକଷ୍ଟରେ ଲୋକେ ଡଙ୍ଗାରେ ନଦୀ ପାର ହୁଅନ୍ତି । ଆଉ ଯଦି ଡଙ୍ଗା ନ ମିଳେ ତେବେ ଜୀବନଧାରା ଏକପ୍ରକାର ଠପ୍ ହୋଇଯାଏ।

ଏହାକୁ ଦୃଷ୍ଟିରେ ରଖି ଦୁଇଟି ଜିଲ୍ଲାବାସୀଙ୍କ ଗମନାଗମନର ସୁବିଧା ପାଇଁ ଚିର୍ମା ପଞ୍ଚାୟତରେ ବ୍ରିଜ୍ କରାଯାଉଛି । ହେଲେ ଏହା ଶେଷ ହେବାର ନାଁ ନେଉନାହିଁ। ୨୦୧୬ରୁ କାମ ଆରମ୍ଭ ହୋଇଥିଲେ ବି ଏଯାଏଁ ବ୍ରିଜ୍‌ର ପିଲର ବି ଉଠିନି ।  ଠିକାଦାରଙ୍କ ମନମୁଖୀ କାର୍ଯ୍ୟ ଓ ବିଭାଗୀୟ ଅଧିକାରୀଙ୍କ ଆନ୍ତରିକତା ଅଭାବରୁ କାମ ଆଗେଇ ପାରୁନଥିବା ଅଭିଯୋଗ କରିଛନ୍ତି ଗ୍ରାମବାସୀ

ଇନ୍ଦ୍ରାବତୀ ନଦୀ ଉପରେ ବ୍ରିଜ ନିର୍ମାଣ ଲାଗି ଭିତ୍ତିପ୍ରସ୍ତର ସ୍ଥାପନ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ସେତେବେଳେ ଏଥିପାଇଁ ୧୬ କୋଟି ଟଙ୍କା ବ୍ୟୟବରାଦ ହୋଇଥିଲା । ହେଲେ ବିଡ଼ମ୍ବନା, ଡେଡ୍‌ ଲାଇନ ସରିବାକୁ ଆଉ ମାତ୍ର ୬ ମାସ ବାକି ଥିବା ବେଳେ  ବ୍ରିଜର ପିଲର ବି ଉଠିନି।  କାମ ମନ୍ଥର ଗତିରେ ଚାଲିଥିବାରୁ ନିର୍ଦ୍ଧାରିତ ସମୟରେ କାମ ଶେଷ ହେବ ନାହିଁ ବୋଲି ସ୍ୱୀକାର କରିଛନ୍ତି  ନିର୍ବାହୀ ଯନ୍ତ୍ରୀ ସୁଦାମ ଚରଣ ମହାପାତ୍ର।

You might also like