PUBG ପାଇଁ ପ୍ରାଣ ଗଲା !

ବାସୁଦେବପୁର: PUBG ଖେଳିବାକୁ ବାରଣ କରିବାରୁ ଜଣେ ୨୦ ବର୍ଷୀୟ ଯୁବକ ଆତ୍ମହତ୍ୟା କରିଥିବା ସୂଚନା ମିଳିଛି। ଘଟଣା ଘଟିଛି ଭଦ୍ରକ ଜିଲ୍ଲା ଧାମରା ଅଞ୍ଚଳରେ। ଯୁବକଙ୍କ ଘର ଚାନ୍ଦବାଲି ବ୍ଲକ୍‌ ଅନ୍ତର୍ଗତ ପାଣିଝରିଆ ଅଞ୍ଚଳରେ। 

ସୂଚନା ଅନୁସାରେ, ସମ୍ପୃକ୍ତ ଯୁବକ ଜଣକ ତାଙ୍କ ମାମୁଙ୍କ ସହ ଧାମରା ଅଞ୍ଚଳରେ ଥିବା ଏକ ଚିଙ୍ଗୁଡ଼ି ଘେରିରେ କାମ କରୁଥିଲେ। ଯୁବକ ଜଣକ ସବୁବେଳେ ମୋବାଇଲ୍‌ରେ ପବ୍‌ଜି ଖେଳୁଥିବାରୁ ତାଙ୍କ ମାମୁ ତାଙ୍କ ଉପରେ ବିରକ୍ତି ପ୍ରକାଶ କରୁଥିଲେ। ଏହି କାରଣକୁ ନେଇ  ଗତକାଲି ତାଙ୍କ ମାମୁ ରାଗି ଯାଇ ତାଙ୍କ ଉପରେ ବିରକ୍ତି ପ୍ରକାଶ କରିଥିଲେ। 

ଏ ନେଇ ଯୁବକ ଜଣକ ମଧ୍ୟ ରାଗି ଯାଇଥିଲେ। ଶେଷରେ ଧାମରା ଅଞ୍ଚଳରେ ଥିବା ମାଉସୀଙ୍କ ଘରକୁ ଚାଲି ଯାଇଥିଲେ। ବହୁ ଖୋଜାଖୋଜି ପରେ ଭଣଜା ତା‘ ମାଉସୀ ଘରେ ଥିବା ମାମୁ ଜାଣିବାକୁ ପାଇଥିଲେ। 

ସେଠାକୁ ଯାଇ ଭଣଜାକୁ ବୁଝାଇଥିଲେ ମାମୁ। ଯୁବକଙ୍କ ମଉସା-ମାଉସୀ  ମଧ୍ୟ PUBG ଖେଳିବାକୁ ବାରଣ କରିବା ସହ ତାଙ୍କୁ ବୁଝାଇଥିଲେ। ବୁଝାଶୁଝା ପରେ ଶେଷରେ ମାଉସୀ ଘରେ ମୋବାଇଲ୍‌ ରଖି ଯୁବକ ଜଣକ ମାମୁଙ୍କ ସହ ପୂର୍ବ ସ୍ଥାନକୁ ଫେରି ଯାଇଥିଲେ। ଉଭୟ ମାମୁ ଭଣଜା ରାତିରେ ଖାଇସାରି ଶୋଇଥିଲେ। ହେଲେ ଆଜି ସକାଳେ ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଥିଲା।

ଏ ନେଇ ମାମୁ ପୋଲିସକୁ ସୂଚନା ଦେଇଛନ୍ତି।

You might also like