ଚମ୍ପୂଆ: ମଶାଣିରେ ମୃତକଙ୍କ ମୁହଁ ଦେଖାଇବାକୁ ୫ ହଜାର ଟଙ୍କା ଲାଞ୍ଚ ମାଗିବା ଅଭିଯୋଗ । ଲାଞ୍ଚ ମାଗୁଛନ୍ତି ଅନ୍ତିମ ସଂସ୍କାର କରୁଥିବା କର୍ମଚାରୀ । କେନ୍ଦୁଝର ଜିଲ୍ଲା ଚମ୍ପୁଆ ଅଞ୍ଚଳର ଏନେଇ ଏକ ଭିଡ଼ିଓ ଏବେ ଭାଇରାଲ୍ ହେବାରେ ଲାଗିଛି ।
ମିଳିଥିବା ସୂଚନା ଅନୁଯାୟୀ, ଚମ୍ପୁଆ ବ୍ଲକ୍ କାଳିକାପ୍ରସାଦ ପଞ୍ଚାୟତ କୃଷ୍ଣପୁର ଅଞ୍ଚଳର ଜଣେ ମହିଳା ଅସୁସ୍ଥ ହେବା ପରେ ତାଙ୍କୁ ଚମ୍ପୁଆ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରୁ ରାଙ୍କି କୋଭିଡ୍ ଡାକ୍ତରଖାନାକୁ ପଠାଇ ଦିଆଯାଇଥିଲା । ତେବେ ଚିକିତ୍ସାଧିନ ଅବସ୍ଥାରେ ସଂପୃକ୍ତ ମହିଳାଙ୍କର ମୃତ୍ୟୁ ହୋଇଥିଲା । ପରେ ଦାହ ସଂସ୍କାର ପାଇଁ ଅଣାଯାଇଥିଲା ମଶାଣିକୁ । ସେଠାରେ ପହଞ୍ଚିଥିଲେ ମୃତ ମହିଳାଙ୍କର ଆତ୍ମୀୟ ସ୍ୱଜନ ।
ଏହି ସମୟରେ ଅନ୍ତିମ ସଂସ୍କାର କରୁଥିବା ଜଣେ କର୍ମଚାରୀ ମୃତ ମହିଳାଙ୍କର ମୁହଁ ଦେଖାଇବାକୁ ତାଙ୍କ ପୁଅଙ୍କୁ ୫ହଜାର ଟଙ୍କା ଲାଞ୍ଚ ଦାବି କରିଥିଲେ । ଏହି ଭିଡିଓ ଏବେ ଭାଇରାଲ୍ ହେବାରେ ଲାଗିଛି । ସେହି ମୋବାଇଲ୍ ଭିଡ଼ିଓରେ କର୍ମଚାରୀ ଜଣକ ଫଟୋ ଉଠାଇବାକୁ ବି ମନା କରୁଛନ୍ତି । କିନ୍ତୁ ମୃତକଙ୍କ ସମ୍ପର୍କୀୟ ନମାନିବାରୁ ଏହାକୁ ନେଇ ଯୁକ୍ତିତର୍କ ପରେ କର୍ମଚାରୀ ଜଣକ ୧୦ ହଜାର କିମ୍ବା ଲକ୍ଷେ ଟଙ୍କା ଦେଲେ ବି ମୃତଦେହ ଦେଖାଇ ଦିଆଯିବନି ବୋଲି ସଫା ସଫା ମନା କରିଦେଉଛନ୍ତି ।
ତେବେ ଏହି ଭିଡିଓଟି ଭାଇରାଲ ହେବା ପରେ ସିଦ୍ଧେଶ୍ୱର ନାୟକ ନାମକ ଜଣେ କର୍ମଚାରୀ କହିଛନ୍ତି, ମୃତକଙ୍କ ପରିବାର ଲୋକ ଜବରଦସ୍ତ କରିବାରୁ ସେ ବିରକ୍ତି ଭାବରେ ଏମିତି କଥା ଛଳରେ କହିଥିଲେ । ତାଙ୍କର ସେଭଳି କୌଣସି ମନ୍ଦ ଉଦ୍ଦେଶ୍ୟ ନଥିଲା ବୋଲି ସ୍ପଷ୍ଟ କରିଛନ୍ତି । ତେବେ ଏନେଇ କୌଣସି ପ୍ରଶାସନିକ ଅଧିକାରୀ କିମ୍ବା ଅଭିଯୋଗକାରୀଙ୍କ ପ୍ରତିକ୍ରିୟା ମିଳିପାରିନାହିଁ ।