ଯାଜପୁର (ଅଭୟ କୁମାର ପତି) : ଜନ୍ମରୁ ନାହିଁ ମଳ ଦ୍ୱାର । ପେଟ ବାଟେ ହେଉଛି ମଳତ୍ୟାଗ । ୮ ବର୍ଷ ହେବ ଏମିତି କଷ୍ଟରେ ବିତୁଛି ଯାଜପୁର ଜିଲ୍ଲା ସୁକିନ୍ଦା ବ୍ଲକ କାକୁଲ ପ୍ରଧାନଙ୍କ ଜୀବନ । ମଳଦ୍ୱାର ଅପରେସନ ପାଇଁ ମାଆଙ୍କ ପାଖରେ ନାହିଁ ଧନ ମୂଲ ଲାଗି ୨ ପୁଅଙ୍କ ପେଟ ପୋଷନ୍ତି। ସେପଟେ ସ୍ୱାମୀ ପିଲା ମାଆଙ୍କୁ ଛାଡ଼ି କେଉଁ ଆଡ଼େ ଚାଲି ଯାଇଛନ୍ତି । ଏଣୁ ପ୍ରଶାସନ ନିକଟରେ ପୁଅର ଅପରେସନ ଲାଗି ଆକୁଳ ନିବେଦନ କରିଛନ୍ତି ମାଆ କୁନି ପ୍ରଧାନ।
ଯାଜପୁର ଜିଲ୍ଲା ସୁକିନ୍ଦା ବ୍ଲକ ସାରଙ୍ଗପୁର ପଞ୍ଚାୟତର ପ୍ରଧାନ ସାହିରେ ଦୟନୀୟ ଅବସ୍ଥାରେ ବିତୁଛି ୮ ବର୍ଷିୟ କାକୁଲ ପ୍ରଧାନଙ୍କ ଜୀବନ । ଜନ୍ମବେଳେ ମଳ ଦ୍ୱାର ନଧିବାରୁ ଦାନଗଦି ମେଡ଼ିକାଲରେ ପେଟ ବାଟେ ମଳଦ୍ୱାର ବ୍ୟବସ୍ଥା ହୋଇଥିଲା । ଏ ମଧ୍ୟରେ ୮ ବର୍ଷ ବିତିଛି, ତେବେ କାକୁଲଙ୍କ ଆଉ ମଳଦ୍ୱାର ଲାଗି ଅପରେସନ ହୋଇନି । ମାଆ କୁନି ଦିନ ମଜୁରିଆ ହୋଇଥିବା ବେଳେ ସ୍ୱାମୀ ୩ ବର୍ଷ ହେବ କୁଆଡ଼େ ଛାଡ଼ି ଚାଲିଯାଇଛନ୍ତି । ଏମିତିରେ ପିଲାଙ୍କୁ ୨ ଓଳା ଖାଇବା ଯୋଗାଡ଼ରେ ଥିବା କୁନି କାକୁଲର ଚିକିତ୍ସା ପାଇଁ ସମର୍ଥ ନୁହଁନ୍ତି। ସରକାରୀ ସ୍ତରରେ ସହାୟତା ଲାଗି ସେ ନିବେଦନ କରିଛନ୍ତି ।
ବ୍ୟୟ ବହୁଳ ଅସ୍ତ୍ରୋପଚାର ଲାଗି ଅସମର୍ଥ ଥିବା କୁନିଙ୍କ ଗୁହାରୀ ଶୁଣି ଶିଶୁ ସୁରକ୍ଷା ୟୁନିଟ ଡାକ୍ତରଙ୍କ ସହ କାକୁଲଙ୍କୁ ଭେଟିଛନ୍ତି । କାକୁଲ ଚିକିତ୍ସା କଟକ ଶିଶୁ ଭବନରେ କରାଯିବ ଓ ମୁଖ୍ୟମନ୍ତ୍ରୀ ରିଲିଫ ଫଣ୍ଡରୁ ତାଙ୍କୁ ସହାୟତା ଦିଆଯିବ ବୋଲି ପ୍ରତିଶ୍ରୁତି ଦେଇଛି ଶିଶୁ ସୁରକ୍ଷା ୟୁନିଟ୍ ।
ଶିଶୁ ସୁରକ୍ଷା ୟୁନିଟ୍ ଠାରୁ ପ୍ରତିଶ୍ରୁତି ମିଳିବା ପରେ କୁନିଙ୍କ ମନରେ ନୂତନ ଆଶା ଜାଗ୍ରତ ହୋଇଛି। ତା ପୁଅ ପୁଣି ହସି ଖେଳିପାରିବ ବୋଲି ଆଶା ବାନ୍ଧି ରହିଛି ମାଆ।