ବଜ୍ରପାତ ନେଲା ୧୧ ଜୀବନ, ଡଙ୍ଗାବୁଡ଼ି ୨ ନିଖୋଜ

ଭୁବନେଶ୍ୱର: ଗତକାଲି ସନ୍ଧ୍ୟାରେ ହୋଇଥିବା ଝଡ଼ତୋଫାନ ଓ ବଜ୍ରପାତ ଯୋଗୁ ରାଜ୍ୟର ବିଭିନ୍ନ ସ୍ଥାନରେ ୧୧ ଜଣଙ୍କ ମୃତ୍ୟୁ ହୋଇଛି। ଏଥିସହ ଦୁଇଟି ସ୍ଥାନରେ ଡଙ୍ଗା ବୁଡି ଦୁଇ ଜଣ ନିଖୋଜ ହୋଇଯାଇଛନ୍ତି।

ଝଡ଼ତୋଫାନ ଓ ବଜ୍ରପାତ ଯୋଗୁ ସୁନ୍ଦରଗଡ଼ରେ ୨ଜଣଙ୍କ ମୃତ୍ୟୁ ହୋଇଥିବାବେଳେ, ଭଞ୍ଜନଗରରେ ୨ଜଣ ଓ ଢେଙ୍କାନାଳରେ ୨ଜଣଙ୍କ ମୃତ୍ୟୁ ଘଟିଛି। ସେହିପରି ଜଗତସିଂହପୁରର ବାଲିକୁଦାରେ ଜଣେ, ପୁରୀ କୃଷ୍ଣପ୍ରସାଦର ଖୋଲଗଞ୍ଜ ଗାଁରେ ଜଣଙ୍କ ମୃତ୍ୟୁ ହୋଇଛି। ନବରଙ୍ଗପୁର ମଇଦାଲପୁର ଥାନା ଅଞ୍ଚଳରେ ମଧ୍ୟ ଜଣଙ୍କ ମୃତ୍ୟୁ ହୋଇଛି। କେନ୍ଦୁଝରରେ ଜଣେ ଓ କଣ୍ଟାବାଞ୍ଜିରେ ଜଣଙ୍କ ମୃତ୍ୟୁ ଘଟିଛି।

ଝଡ଼ତୋଫାନ ଯୋଗୁ ଦେବଗଡ଼ର ରେଙ୍ଗାଳି ଡ୍ୟାମ୍‌ରେ ଡଙ୍ଗା ବୁଡ଼ି ଜଣେ ବ୍ୟକ୍ତି ନିଖୋଜ ହୋଇଯାଇଛନ୍ତି। ଗୋଟିଏ ଡଙ୍ଗାରେ ୫ ମତ୍ସ୍ୟଜୀବୀ ଜଳଭଣ୍ଡାର ଭିତରକୁ ମାଛ ମାରିବାକୁ ଯାଇଥିବା ବେଳେ ଡଙ୍ଗା ବୁଡ଼ିଯାଇଥିଲା। ସେମାନଙ୍କ ମଧ୍ୟରୁ ୩ ଜଣ  ପହଁରି ପହଁରି କୂଳକୁ ଆସିଥିବା ବେଳେ ଜଣଙ୍କୁ ଦମକଳ ବାହିନୀ ଉଦ୍ଧାର କରିଛି। ଅନ୍ୟଜଣେ ଏବେ ବି ନିଖୋଜ ଅଛନ୍ତି। ନିଖୋଜ ମତ୍ସ୍ୟଜୀବୀ ହେଲେ ପଟୁ ଧିବର। ଦମକଳ ବାହିନୀ ଘଟଣାସ୍ଥଳରେ ସର୍ଚ୍ଚ ଅପରେସନ ଚଲାଇଛି।

ଅପରପକ୍ଷେ ବାଙ୍କୀ ମହାନଦୀରେ ଦେବୀଦ୍ୱାର ନିକଟରେ ଡଙ୍ଗା ବୁଡ଼ିଯିବାରୁ ଜଣେ ନିଖୋଜ ଅଛନ୍ତି। ନିଖୋଜ ଜଣକ ହେଉଛନ୍ତି ଗୟଳବାଙ୍କ ଗାଁର ରଞ୍ଜିତ ଦଳେଇ। ଏହି ଘଟଣାରେ ରଞ୍ଜିତଙ୍କ ବାପା ରଘୁ ଦଳେଇ ପହଁରି ପହଁରି କୂଳକୁ ଚାଲି ଆସିଥିଲେ। ସେମାନେ ମହାନଦୀକୁ ମାଛ ମାରିବାକୁ ଯାଇଥିଲେ। ଦମକଳ ବାହିନୀ ପହଞ୍ଚି ଖୋଜାଖୋଜି ଆରମ୍ଭ କରିଥିଲେ ବି ନିଖୋଜଙ୍କୁ ଠାବ କରିପାରିନି।

You might also like