କଣ୍ଟାବାଞ୍ଜି(ଅନ୍ତିମ ପାଣିଗ୍ରାହୀ) : ଚୋରା ମଦ ବେପାରୀ ସକ୍ରିୟ । ସଙ୍କଟ ସମୟରେ ଗାଁ ଗାଁରେ ବେଶ ଜମୁଛି ମଦ ବେପାର । କଙ୍କଡାକୁ ଗୋଳି ପାଣି ସୁହାଇଲା ଭଳି ଚୋରା ମଦ ବ୍ୟମସାୟୀଙ୍କୁ ଲକଡାଉନ୍ ସୁହାଇଛି । ବେଆଇନ ଭାବରେ ମହୁଲ ଫୁଲକୁ ପ୍ରଥମେ ଗରମ ପାଣିରେ ଶିଝାଇ ଦିଆଯାଉଛି, ଆଉ ସେଥିରେ ବିଷାକ୍ତ କେମିକାଲ ମିଶାଇ ମଦ ବିକ୍ରି କରୁଛନ୍ତି ମଦ ବେପାରୀ । ତୁରେକେଲା ବ୍ଲକର ବିଭିନ୍ନ ଗ୍ରାମରେ ଏପରି ଦେଖିବାକୁ ମିଳିଛି ।
ଦୀର୍ଘ ଦିନ ହେଲା ବେଆଇନ ଭାବରେ ମଦ ବିକ୍ରି କରୁଥିବା ଅଭିଯୋଗ ହେଉଥିଲା । ଅବକାରୀ ବିଭାଗ ପକ୍ଷରୁ ଗତ କାଲି ଦିନ ୪ ଟା ସମୟରେ ତୁରେକେଲା ବ୍ଲକର ଢୋଲମାନ୍ଦଲ, କନ୍ଦାଗାଡ, ବାହାବଲ, ଗଇନ୍ଦିମାଲ, ଗବରା, ମହୁଲପାର୍ଟି ଗ୍ରାମରେ ଚଢ଼ାଉ କରାଯାଇଥିଲା । ଚଢ଼ାଉ ସମୟରେ କନ୍ଦାଗାଡ, ବାହାବଲ ଓ ଗବରାରେ ପାଞ୍ଚ ଜଣଙ୍କ ଘରୁ ମଦ ଜବତ ହୋଇଛି । ସେମାନଙ୍କ ଘରୁ ମହୁଲ, ୧୦୦ ଲିଟର ମଦ ଓ ମଦ ରଖିଥିବା ବିଭିନ୍ନ ଜିନିଷକୁ ଜବତ କରିଥିଲା ଅବକାରୀ ବିଭାଗ ।
ଏହାସହ ମଦ ବିକ୍ରି କରୁଥିବା ପାଞ୍ଚ ଜଣଙ୍କ ନାଁରେ ସିଆରପିସି ଆକ୍ଟ ଅନୁସାରେ ମାମଲା ରୁଜୁ କରିଛି ପୋଲିସ୍ । ମହୁଲରେ ବିଭିନ୍ନ ବିଷାକ୍ତ କେମିକାଲ ମିଶାଇବା ଫଳରେ ବିଷାକ୍ତ ମଦ ପିଇ ଲୋକେ ମୃତ୍ୟୁ ହେବାର ସମ୍ଭାବନା ରହିଛି । ତୁରେକେଲା ବ୍ଲକର ଆହୁରି ଅନେକ ଗାଁ ରହିଛି ଯେଉଁଠି ବେଆଇନ ଭାବରେ ରନ୍ଧା ମଦ ବିକ୍ରି କରାଯାଇଛି । ତେଣୁ ମଦ ବେପାରୀଙ୍କୁ ତୁରନ୍ତ ଗିରଫ କରିବା ପାଇଁ ସାଧାରଣରେ ଦାବି ହେଉଛି ।