ରିପୋର୍ଟ ନେଗେଟିଭ୍‌ ଆସିଲେ ଖେଳାଯିବ ମ୍ୟାଚ୍‌

ନୂଆଦିଲ୍ଲୀ: ଭାରତ-ଶ୍ରୀଲଙ୍କା ଟି-ଟ୍ୱେଣ୍ଟି ସିରିଜ ଘୁଞ୍ଚିଲା । ଭାରତୀୟ ଅଲରାଉଣ୍ଡର କ୍ରୁଣାଲ୍ ପାଣ୍ଡ୍ୟା କୋଭିଡ୍ ପଜିଟିଭ୍ ଚିହ୍ନଟ ହେବା ପରେ ଏହି ନିଷ୍ପତି ନିଆଯାଇଛି । ଦ୍ୱିିତୀୟ ମ୍ୟାଚକୁ ଘୁଞ୍ଚାଇ ଦିଆଯାଇଛି । କ୍ରୁଣାଲ ପଜିଟିଭି ବାହାରିବା ପରେ ଉଭୟ ଟିମ୍‌ର ଅନ୍ୟ ସମସ୍ତ ଖେଳାଳି ଏବେ ଆଇସୋଲେସନରେ ରହିଛନ୍ତି । ଯେଉଁ ଖେଳାଳିମାନେ କ୍ରୁଣାଲଙ୍କ ସଂସ୍ପର୍ଶରେ ଆସିଛନ୍ତି, ସେମାନଙ୍କୁ ମନିଟର୍ କରାଯିବ । ଯଦି ଅନ୍ୟ ସମସ୍ତ ଖେଳାଳିଙ୍କ ରିପୋର୍ଟ ନେଗେଟିଭ୍ ଆସେ, ତେବେ ଆସନ୍ତାକାଲି ତଥା ବୁଧବାର ଦ୍ୱିତୀୟ ଟି-ଟ୍ୱେଣ୍ଟି ମ୍ୟାଚ୍ ଆୟୋଜନ ହେବ । ପ୍ରଥମ ମ୍ୟାଚରେ ଭାରତ ଦମଦାର ବିଜୟ ସହ ୧-୦ରେ ଆଗୁଆ ରହିଛି ।

ଶ୍ରୀଲଙ୍କା ଗସ୍ତରେ ଭାରତର ପ୍ରଦର୍ଶନ ଭଲ ରହିଆସିଛି । ତିନିମ୍ୟାଚ୍ ବିଶିଷ୍ଟ ଦିନିକିଆ ସିରିଜକୁ ୨-୧ରେ ଜିତିବା ପରେ ଭାରତ ଟି-୨୦ ସିରିଜରେ ୧-୦ରେ ଆଗୁଆ ରହିଛି । ଶ୍ରୀଲଙ୍କାର ବ୍ୟାଟିଂ କୋଚ୍ ଓ ଭିଡିସ ଆନାଲିଷ୍ଟ କୋଭିଡ୍‌-୧୯ ପଜିଟିଭ୍ ଚିହ୍ନଟ ହେବା ପରେ ଦିନିକିଆ ସିରିଜକୁ ସ୍ଥଗିତ କରାଯାଇଥିଲା । ଏବେ ଭାରତୀୟ ଖେଳାଳି ପଜିଟିଭ୍ ହେବା ପରେ ଟି-୨୦ ସିରିଜ୍ ଉପରେ ସଙ୍କଟ ଦେଖା ଦେଇଛି ।

Also Read

ଆଲିମ୍ପିକ୍ସରେ ଆଜିର ମ୍ୟାଚ୍‌ ବିରେନ୍ଦ୍ର ଲାକ୍ରା ଏବଂ ରୋହିଦାସଙ୍କ ପାଇଁ ଥିଲା ବେଶ ସ୍ମରଣୀୟ, ଜାଣନ୍ତୁ କାହିଁକି...

ପୁରଣ ହେଲା ମୀରାବାଈ ଚାନୁଙ୍କ ଆଶା, କେନ୍ଦ୍ରମନ୍ତ୍ରୀଙ୍କ ସହ ଖାଇଲେ ପିଜ୍ଜା

ବିଶ୍ୱ ଐତିହ୍ୟ ତାଲିକାରେ ସ୍ଥାନ ପାଇଲା ଧୋଲାବିରା

ନିକଟରେ ଇଂଲଣ୍ଡରେ ଭାରତୀୟ ଶିବିରରେ ମଧ୍ୟ କରୋନା ପ୍ରବେଶ କରିଥିଲା । ଯୁବ ୱିକେଟ କିପର ବ୍ୟାଟ୍ସମ୍ୟାନ୍ ଋଷଭ ପନ୍ତ ପଜିଟିଭ୍ ବାହାରିବା ପରେ ସେ ଲଣ୍ଡନରେ ରହିଥିଲେ ଏବଂ ବାକି ଭାରତୀୟ ଟିମ୍ ପ୍ରାକ୍ଟିସ୍ ମ୍ୟାଚ୍ ଖେଳିବା ପାଇଁ ଡରହାମ୍ ଚାଲିଯାଇଥିଲେ ।

ଶ୍ରୀଲଙ୍କା ଗସ୍ତରେ ଥିବା ପୃଥ୍ୱୀ ଶ’ ଓ ସୂର୍ଯ୍ୟକୁମାର ଯାଦବ ଇଂଲଣ୍ଡ ଯିବେ । ଦୁହିଁଙ୍କୁ ଭାରତୀୟ ଟେଷ୍ଟ ସ୍କ୍ୱାଡ୍‌ରେ ସାମିଲ୍ କରାଯାଇଛି । ଯେହେତୁ ଏବେ ଭାରତର ଜଣେ ଖେଳାଳି କରୋନାରେ ଆକ୍ରାନ୍ତ ହୋଇଛନ୍ତି, ତେଣୁ ପୃଥ୍ୱୀ ଓ ସୂର୍ଯ୍ୟ ଇଂଲଣ୍ଡ ଗସ୍ତ କରିବେ ନା ନାହିଁ, ତାକୁ ନେଇ ସନ୍ଦେହ ଦେଖା ଦେଇଛି । ଉଭୟ ପୃଥ୍ୱୀ ଓ ସୂର୍ଯ୍ୟକୁମାର ଏବେ ଶ୍ରୀଲଙ୍କାରେ ଅଛନ୍ତି ଏବଂ ଦୁହିଁଙ୍କର ଇଂଲଣ୍ଡ ଯାତ୍ରାକୁ ମଧ୍ୟ ସ୍ଥଗିତ କରାଯିବାର ସମ୍ଭାବନା ରହିଛି ।