’ସ୍ତ୍ରୀର ଇଚ୍ଛା ବିରୁଦ୍ଧରେ ଯୌନ ସମ୍ପର୍କ ରଖିବା ବୈବାହିକ ଦୁଷ୍କର୍ମ’

କୋଚି : ସ୍ତ୍ରୀର ଶରୀର ସ୍ୱାମୀର ସମ୍ପତ୍ତି ନୁହେଁ । ଜୀବନସାଥୀର ଇଚ୍ଛା ବିରୁଦ୍ଧରେ ଯୌନ ସମ୍ପର୍କ ରଖିବା ବୈବାହିକ ଦୁଷ୍କର୍ମ ବୋଲି କହିଛନ୍ତି କେରଳ ହାଇକୋର୍ଟ । ଛାଡ଼ପତ୍ର ମଞ୍ଜୁର କରିବାକୁ ଫ୍ୟାମିଲି କୋର୍ଟର ନିଷ୍ପତ୍ତିକୁ ଚ୍ୟାଲେଞ୍ଜ କରିଥିଲେ ସଂପୃକ୍ତ ବ୍ୟକ୍ତି । ତେବେ ତାଙ୍କର ଦୁଇଟି ଆବେଦନକୁ ଖାରଜ କରି ଏପରି ଟିପ୍ପଣୀ ଦେଇଛନ୍ତି ଉଚ୍ଚ ନ୍ୟାୟାଳନ । ଜଷ୍ଟିସ୍ ମୋହମ୍ମଦ ମୁସ୍ତାକ୍ ଏବଂ ଜଷ୍ଟିସ୍ କୋସର ଏଡାପାଗାଥଙ୍କ ଏକ ବେଞ୍ଚ କହିଛନ୍ତି, ବିବାହ ଏବଂ ଛାଡପତ୍ର ଧର୍ମ ନିରପେକ୍ଷ ଆଇନ ଅନ୍ତର୍ଗତ ହେବା ଉଚିତ । ବର୍ତ୍ତମାନ ଦେଶର ବିବାହ ଆଇନକୁ ନବୀକରଣ କରିବାର ସମୟ ଆସିଛି । ପୁଣି ଥରେ ବିବାହ ପାଇଁ ନୂଆ ନିୟମ ପ୍ରଣୟନ ଜରୁରୀ ।

୧୯୯୫ରେ ଏହି ଦମ୍ପତି ବିବାହ କରିଥିଲେ ଏବଂ ସେମାନଙ୍କର ଦୁଇଟି ସନ୍ତାନ ଅଛନ୍ତି । ସ୍ୱାମୀ ପେଶାରେ ଜଣେ ଡାକ୍ତର । ବିବାହ ସମୟରେ ଶ୍ୱଶୁରଙ୍କ ଠାରୁ ୫୦୧ ସୁନା ମୁଦ୍ରା, କାର ଏବଂ ଫ୍ଲାଟ ଯୌତୁକ ଆକାରରେ ନେଇଥିଲେ । ହେଲେ ଅଭିଯୁକ୍ତ ସ୍ୱାମୀ ତାଙ୍କ ସ୍ତ୍ରୀଙ୍କୁ ଟଙ୍କା ରୋଜଗାର ମେସିନ୍ ଭଳି ବ୍ୟବହାର କରିଥିଲେ ବୋଲି ଅଦାଲତ ଜାଣିବାକୁ ପାଇଛନ୍ତି । ବୈବାହିକ ଜୀବନ କିପରି ଖୁସିରେ କଟିବ, ସେଥିପାଇଁ ସ୍ତ୍ରୀ ମଥାପାତି ସ୍ୱାମୀର ସମସ୍ତ ନିର୍ଯ୍ୟାତନା ସହୁଥିଲେ । ଗାଳିଗୁଲଜ, ମାଡ଼ କଳି ଶୁଣି ମଧ୍ୟ ସ୍ୱାମୀ ପାଖରେ ପଡ଼ି ରହୁଥିଲେ । କିନ୍ତୁ ନିର୍ଯ୍ୟାତନା ଯେତେବେଳେ ସହନଶୀଳତାର ସୀମା ଛୁଇଁଲା, ସେତେବେଳେ ସେ ଛାଡପତ୍ର ପାଇଁ ନିଷ୍ପତ୍ତି ନେଇଥିଲେ । ଦଣ୍ଡବିଧାନ ଆଇନ ଅନୁଯାୟୀ ବୈବାହିକ ଦୁଷ୍କର୍ମକୁ ଆଇନ ସ୍ୱୀକୃତି ଦିଏ ନାହିଁ । ତେଣୁ ବୈବାହିକ ଦୁଷ୍କର୍ମ  ଛାଡପତ୍ର ଦାବି କରିବା ପାଇଁ ଏକ ସଠିକ କାରଣ ବୋଲି ବେଞ୍ଚ କହିଛନ୍ତି ।

Also Read

ପୂର୍ବରୁ ଗ୍ୟାସ୍‌ କନେକ୍ସନ ନେଇଥିଲେ ମିଳିବ ଏହି ସୁବିଧା

ମହିଳା ହକି ମୁଖ୍ୟ କୋଚ୍ ପଦରୁ ଇସ୍ତଫା ଦେଲେ ସୋର୍ଡ ମାରିନ

ରାଜ୍ୟରେ ୧୦୯୬ ନୂଆ କରୋନା ସଂକ୍ରମିତ ଚିହ୍ନଟ, କଟକରେ କମୁଛି ସଂକ୍ରମଣ

କ୍ରୁରତା ଆଧାରରେ ଛାଡପତ୍ର ପାଇଁ ଆବେଦନକୁ ସ୍ୱୀକାର କରିଥିବା ପରିବାର କୋର୍ଟର ନିଷ୍ପତ୍ତି ବିରୋଧରେ ସ୍ୱାମୀଙ୍କ ଆବେଦନକୁ କୋର୍ଟ ଖାରଜ କରିଦେଇଛନ୍ତି । ଏହା ବ୍ୟତୀତ ସ୍ୱାମୀ ଦ୍ୱାରା ମିଳିତ ଅଧିକାର ମାଗୁଥିବା ଅନ୍ୟ ଏକ ଆବେଦନକୁ କୋର୍ଟ ଖାରଜ କରିଦେଇଛନ୍ତି । ଜୁଲାଇ ୩୦ ଏକ ନିର୍ଦ୍ଦେଶରେ କୋର୍ଟ କହିଛନ୍ତି, ପତ୍ନୀଙ୍କ ଶରୀରକୁ ତାଙ୍କ ସମ୍ପତ୍ତି ବୋଲି ଭାବିବା ଏବଂ ତାଙ୍କ ଇଚ୍ଛା ବିରୁଦ୍ଧରେ ଯୌନ ସମ୍ପର୍କ ରଖିବା ବୈବାହିକ ବଳାତ୍କାର  ।