ନିର୍ଭୟ ଓ ପରାକ୍ରମୀ କାରଗିଲ ଗର୍ଲ ’ଗୁଞ୍ଜନ୍ ସକସେନା”

କାରଗିଲ ଯୁଦ୍ଧର ବୀରଙ୍ଗନା ଗୁଞ୍ଜନ୍ ସକସେନା । ମନରେ ତିଳେମାତ୍ରେ ଭୟ ନଥିଲା । ଶତ୍ରୁ ଆଖିରେ ଆଖି ମିଶାଇ ବିମାନ ଉଡ଼ାଉଥିଲେ । ଏକମାତ୍ର ମହିଳା ଭାବେ ଭାରତର ପକ୍ଷରୁ ଲଢ଼େଇ କରିଥିଲେ ଭାରତ ମାତାର ସୁପୁତ୍ରୀ । କାରଗିଲ ବିଜୟ ଦିବସରୁ ୨୨ ବର୍ଷ ପୂରି ଥିବା ବେଳେ ଦେଶବାସୀ ବୀରପୁତ୍ରଙ୍କ ସ୍ମୃତିଚାରଣ କରି ଗୌରବାନ୍ୱିତ ମନେ କରୁଛନ୍ତି । ଶତ୍ରୁ ଦେଶ ପାକିସ୍ତାନର ନଜର ଭାରତ ଉପରେ ଥିବାବେଳେ ନିଜ ଜୀବନକୁ ବାଜି ଲଗାଇ ଦେଶକୁ ସୁରକ୍ଷା ଦେବା ସହ ମାଟି ମା’ର ମହତ ରଖିଥିଲେ ଭାରତୀୟ ବୀର ଯବାନ । ଆଉ ସେମାନଙ୍କ ମଧ୍ୟରେ ସାମିଲ ଥିଲେ କାରଗିଲ ଗର୍ଲ ଗୁଞ୍ଜନ୍ ।

ଭାରତର ପାଇଲଟ ଦଳରେ ଏକମାତ୍ର ମହିଳା ଥିଲେ ଗୁଞ୍ଜନ୍ । ୧୯୯୯ ରେ ଗୁଞ୍ଜନଙ୍କୁ ମାତ୍ର ୨୫ ବର୍ଷ ବୟସ ହୋଇଥିଲା । ଆଉ ସେତେବେଳ ତାଙ୍କର ପୋଷ୍ଟିଂ ୧୩୨ ଫରୱାର୍ଡ ଏରିଆ କଣ୍ଟ୍ରୋଲ୍ (FAC) ରେ ହୋଇଥିଲା । ଯୁଦ୍ଧ ଆରମ୍ଭରୁ ହିଁ ତାଙ୍କୁ ଶ୍ରୀନଗର ଯିବାକୁ କୁହାଯାଇଥିଲା । ତେବେ ସେନା ଅଧିକାରୀଙ୍କ ଝିଅ ଗୁଞ୍ଜନଙ୍କ ପାଇଁ ଏହା କୌଣସି କଷ୍ଟସାଧ୍ୟ କାମ ନଥିଲା । ଯୁଦ୍ଧରେ ଯୋଗ ଦେବା ପୂର୍ବରୁ ଫୋନ୍ ମାଧ୍ୟମରେ ସେ ପିତାମାତାଙ୍କୁ ଏ ସମ୍ପର୍କରେ ସୂଚନା ଦେଇଥିଲେ । ଜଣେ ସେନା ଅଧିକାରୀ ହୋଇଥିବାରୁ ତାଙ୍କ ପିତା ଜଣେ ଯବାନର କର୍ତ୍ତବ୍ୟକୁ ଭଲଭାବେ ହୃଦୟଙ୍ଗମ କରିଥିଲେ ଓ ଝିଅକୁ ଖୁସି ଖୁସି ଯୁଦ୍ଧକୁ ଯିବାପାଇଁ ଅନୁମତି ଦେଇଥିଲେ ।

ଭାରତ ଓ ପାକିସ୍ତାନ ଯୁଦ୍ଧ ଆରମ୍ଭ ହେବା ପୂର୍ବରୁ କାହାକୁ ଜଣାନଥିଲା ଏହା ଏତେ ଭୟଙ୍କର ରୂପ ନେବ । ଶ୍ରୀନଗରରେ ସେତେବେଳେ ଚାରୋଟି ହେଲିକପ୍ଟର ମୁତୟନ ଥିଲା । ଆଉ ସେଥିମଧ୍ୟରୁ ହେଲିକପ୍ଟର ଚିତା ଉଡାଉଥିଲେ ଗୁଞ୍ଜନ । ଦଶ ଜଣ ପାଇଲଟଙ୍କ କ୍ରୁରେ ସେ ଏକମାତ୍ର ମହିଳା ଥିଲେ । ଆଉ ଏଥିପାଇଁ ସହକର୍ମୀଙ୍କୁ କିଛି ସମୟ ପାଇଁ ଏହାକୁ ପସନ୍ଦ କରିନଥିଲେ । କିନ୍ତୁ ସମୟ ଅତିବାହିତ ହେବା ପରେ ସମସ୍ତେ ଗୁଞ୍ଜନଙ୍କ ଭୂମିକାକୁ ବୁଝିପାରିଥିଲେ ।

Also Read

ପାକିସ୍ତାନ ଇଲାକାକୁ କବ୍‌ଜା କରିବା ପାଇଁ ଆମକୁ ଅନୁମତି ମିଳିବାର ଥିଲା-ପୂର୍ବ ସେନାଧ୍ୟକ୍ଷ

କାହିଁକି ହାଇଦରକୁ କରାଗଲା ଏନ୍‌କାଉଣ୍ଟର ? ଏତଲାରେ ଉଲ୍ଲେଖ କଲା ପୋଲିସ୍‌

ଲଢୁଆ ପୁଅ ପାଇଁ କାନ୍ଦୁଛି ମା’, ଝୁରୁଛି ଗାଁ

୩ ହଜାର ଫୁଟ ଉଚ୍ଚତାରେ ଗୁଞ୍ଜନ ହେଲିକପ୍ଟରକୁ ହେଲିପ୍ୟାଡରେ ଅବତରଣ କରିପାରୁଥିଲେ ଗୁଞ୍ଜନ, ଯାହା କୌଣସି ନବାଗତ ପାଇଲଟଙ୍କ ପାଇଁ ସହଜ ନଥିଲା । ପାକିସ୍ତାନୀ ସେନାର ଗୁଳିବର୍ଷଣ ଭିତରେ ଆହତ ସୈନିକଙ୍କୁ ଯୁଦ୍ଧଭୂମିରୁ ନେଇ ବେସ୍‍ କ୍ୟାମ୍ପରେ ପହଞ୍ଚାଉଥିଲେ । ଏହା ସହିତ ସେନା ନିକଟରେ ଔଷଧ, ଖାଦ୍ୟ ଏବଂ ଅନ୍ୟାନ୍ୟ ଜରୁରୀ ଜିନିଷ ପହଞ୍ଚାଉଥିଲେ । ଲଗାତାର ୨୦ଦିନ ଧରି କାରଗିଲ ଯୁଦ୍ଧଭୂମିରେ ଚିତା ହେଲିକପ୍ଟର ଉଡାଇଥିଲେ ଗୁଞ୍ଜନ ।