LIVE TV
ଦିସପୁର: ଦମ୍ପତିଙ୍କ ନିଆରା ବାହାଘର କାର୍ଡ । ଗତ କିଛି ଦିନ ହେଲାଣି ବିବାହ ଋତୁ ଚାଲିଛି । ଏହି ସମୟରେ ବାହାଘର ସମୟର ନୃତ୍ୟ ତଥା ଅନ୍ୟାନ୍ୟ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଗୋଟେ ବିବାହ ପାଇଁ ପରିବାର ଲୋକେ ଉତ୍ସାହିତ ଥାଆନ୍ତି । ବର କନ୍ୟା ବି ବହୁତ କଥା ଭାବିଥାଆନ୍ତି । ପ୍ରତ୍ୟେକ ଦମ୍ପତି ନିଜ ବିବାହକୁ ସ୍ୱତନ୍ତ୍ର ଏବଂ ସ୍ମରଣୀୟ କରିବା ପାଇଁ କିଛି ନା କିଛି ଭିନ୍ନ ପଦ୍ଧତି ଅବଲମ୍ବନ କରନ୍ତି । ବିବାହର ପ୍ରସ୍ତୁତି ଜୋରସୋରରେ ଜାରି ରଖନ୍ତି । କେବଳ ଏତିକି ନୁହେଁ, କିଛି ନୂଆ କରିବା ଚକ୍କରରେ କେହି କେହି ନିଜ ବିବାହ କାର୍ଡକୁ ନୂଆ ଭାବେ କରିବା ପାଇଁ ଆକର୍ଷଣୀୟ ପ୍ରିଣ୍ଟ୍ କରୁଛନ୍ତି ।
ଠିକ୍ ସେହିପରି ଏକ ନିଆରା ବିବାହ କାର୍ଡ ଏବେ ସୋସିଆଲ୍ ମିଡିଆରେ ଭାଇରାଲ୍ ହେଉଛି । ଲେଖାକୁ ନେଇ ଏଇ କାର୍ଡଟି ଭିନ୍ନ ହୋଇଛି ।ବର୍ତ୍ତମାନ ସମୟରେ ସମୟ ସହ ତାଳ ଦେଇ ଚାଲିବାର ଏକ ବିଶେଷ ଉଦାହରଣ ଅଟେ । ଆସାମର ଜଣେ ଓକିଲ ନିଜ ବିବାହର ଏକ ନିଆରା କାର୍ଡ ଛପାଇଛନ୍ତି । ଯାହାକୁ ଦେଖି ସମସ୍ତେ ଆଶ୍ଚର୍ଯ୍ୟ ହେଉଛନ୍ତି । ଲୋକମାନେ କାର୍ଡକୁ ପଢିବା ପାଇଁ ସେତିକି ଆଗ୍ରହୀ ମଧ୍ୟ ଅଛନ୍ତି । ଅନେକ ଲୋକ ଏହାକୁ ପଢି ବହୁତ ଉପଭୋଗ କରୁଛନ୍ତି । କାରଣ ଉକ୍ତ ବିବାହ କାର୍ଡଟି କୌଣସି ସାଧାରଣ କାର୍ଡ ଭଳି ନୁହେଁ ।
Also Read
ଏହି ବିବାହ କାର୍ଡକୁ ଭାରତୀୟ ସମ୍ବିଧାନର ବିଷୟବସ୍ତୁ ଉପରେ ରଖାଯାଇଛି । ସାଧାରଣତ ଆପଣ ନିଶ୍ଚୟ ଦେଖିଥିବେ ଯେ ବିବାହ କାର୍ଡରେ ଅତିଥିମାନେ ବିବାହ ଉତ୍ସବରେ ଯୋଗଦେବାକୁ ଆବେଦନ କରନ୍ତି, କିନ୍ତୁ ଏହି କାର୍ଡରେ ଏହା ସମ୍ପୂର୍ଣ୍ଣ ବିପରୀତ ଅଟେ । ଯାହା କାରଣରୁ କାର୍ଡଟି ସୋସିଆଲ୍ ମିଡିଆରେ ଚର୍ଚ୍ଚାର ବିଷୟ ପାଲଟିଛି ।
ସୂଚନା ଅନୁସାରେ, ଓକିଲ ଜଣକ ନିଜ ବିବାହକୁ ଭିନ୍ନ ଏବଂ ସ୍ମରଣୀୟ କରିବା ପାଇଁ ସମ୍ବିଧାନ ଥିମ୍ ସହ ଏହି ବିବାହ ନିମନ୍ତ୍ରଣ ପତ୍ର ଛାପିଛନ୍ତି । କାର୍ଡରେ ବିବାହ ସମ୍ବନ୍ଧୀୟ ନିୟମ ଓ ଅଧିକାରମାନ ଲେଖାଯାଇଛି । ଏହାସହ କାର୍ଡରେ ଏକ ନ୍ୟାୟ ତରାଜୁର ଚିତ୍ର ମଧ୍ୟ ଅଛି ଯାହାର ଉଭୟ ପାର୍ଶ୍ୱରେ ବର ଓ କନ୍ୟାର ନାମ ଲେଖାଯାଇଛି ।
(ନିଆରା ବିବାହ କାର୍ଡ)ଏହି କାର୍ଡରେ ଲେଖାଯାଇଛି ଯେ, 'ବିବାହର ଅଧିକାର ହେଉଛି ଭାରତୀୟ ସମ୍ବିଧାନର ଧାରା ୨୧ ଅନୁଯାୟୀ ଜୀବନ ଧାରଣ କରିବାର ଏକ ଉପାଦାନ। ଏହି ମୌଳିକ ଅଧିକାରକୁ ବ୍ୟବହାର କରିବାର ସମୟ ହେଉଛି ୨୮ ନଭେମ୍ବର ୨୦୨୧ ରବିବାର । ' କାର୍ଡରେ ଆହୁରି ମଧ୍ୟ, ଲେଖାଯାଇଛି ଯେ, 'ମୁଁ ତୁମ ସମସ୍ତଙ୍କୁ ନିବେଦନ କରୁଛି ଯେ ଧାରା ୧୯ (i) (B) (ଶାନ୍ତିପୂର୍ଣ୍ଣ ଭାବରେ ଏବଂ ବିନା ଅସ୍ତ୍ରଶସ୍ତ୍ରରେ ଏକତ୍ରିକ ହେବାର ଅଧିକାର) ଅଧୀନରେ ଉପସ୍ଥିତ ରୁହନ୍ତୁ ।
କେବଳ ଏତିକି ନୁହେଁ କାର୍ଡରେ ଏହା ମଧ୍ୟ ଲେଖାଯାଇଛି, ଓକିଲମାନେ ଯେତେବେଳେ ବିବାହ କରନ୍ତି, ସେତେବେଳେ ସେମାନେ କେବଳ ବିବାହ ପାଇଁ ହଁ କହି ନଥାନ୍ତି ବରଂ ବିବାହର ନିୟମ ଓ ସର୍ତ୍ତକୁ ମଧ୍ୟ ସ୍ୱୀକାର କରିବା ସହ ମାନିଥାନ୍ତି ।
ବର୍ତ୍ତମାନ ଏହି ଅନନ୍ୟ ବିବାହ କାର୍ଡର ଫଟୋ ସୋସିଆଲ ମିଡିଆରେ ଖୁବ୍ ଭାଇରାଲ ହେବାରେ ଲାଗିଛି । ଲୋକମାନେ ଏହି କାର୍ଡକୁ ପଢି ବେଶ୍ ଉପଭୋଗ କରୁଛନ୍ତି ।
