ଆଫଗାନିସ୍ତାନରେ ଘମାଘୋଟ, କାନ୍ଦାହାର ଦୂତାବାସରୁ ୫୦ ଜଣଙ୍କୁ ଫେରାଇ ଆଣିଲା ଭାରତ

ନୂଆଦିଲ୍ଲୀ: ଆଫଗାନିସ୍ତାନ କାନ୍ଦାହାର ଦୂତାବାସର ପ୍ରାୟ ୫୦ ଜଣ କର୍ମଚାରୀଙ୍କୁ ଫେରାଇ ଆଣିଛି ଭାରତ । ଏୟାରଫୋର୍ସର ଏକ ସ୍ୱତନ୍ତ୍ର ବିମାନରେ ଗତକାଲି ଏହି କର୍ମଚାରୀଙ୍କୁ ନୂଆଦିଲ୍ଲୀ ଅଣାଯାଇଛି । ତାଲିବାନ ଓ ଆଫଗାନିସ୍ତାନର ସୈନ୍ୟଙ୍କ ମଧ୍ୟରେ କାନ୍ଦାହାର ନିକଟରେ ଘମାଘୋଟ ଯୁଦ୍ଧ ଚାଲିଥିବାରୁ ଏହି ପଦକ୍ଷେପ ନିଆଯାଇଛି ।

ଆଫଗାନିସ୍ତାନରୁ ଆମେରିକାର ସୈନ୍ୟ ଅପସାରଣ ପରେ ଧୀରେ ଧୀରେ ରାଜଧାନୀ କାବୁଲ ଆଡ଼କୁ ଅଗ୍ରସର ହେଉଛି ତାଲିବାନ । ଆଫଗାନିସ୍ତାନର ସୈନ୍ୟଙ୍କ ସହିତ ଘମାଘୋଟ ଯୁଦ୍ଧ ଚାଲିଥିବାରୁ ସେଠାରେ ସୁରକ୍ଷା ବିପନ୍ନ ହେବାରେ ଲାଗିଛି । ଏହି କାରଣରୁ କାନ୍ଦାହାର ଦୂତାବାସରୁ ନିଜ କର୍ମଚାରୀଙ୍କୁ ଫେରାଇ ଆଣିଛି ଭାରତ । ସେଠାକାର ସ୍ଥାନୀୟ କର୍ମଚାରୀଙ୍କୁ ନେଇ ଦୂତାବାସ ଚାଲିଛି ଏବଂ ଏହାକୁ ବନ୍ଦ କରିବାର ଯୋଜନା ଏବେ ନାହିଁ ବୋଲି ବୈଦେଶିକ ମନ୍ତ୍ରାଳୟ ପକ୍ଷରୁ କୁହାଯାଇଛି ।

Also Read

ଗାଁରେ ଆସୁନି ନେଟ୍‌ୱାର୍କ, ପାହାଡ଼ ଉପରେ ପାଠ ପଢ଼ୁଛନ୍ତି ପିଲା

ଦୁର୍ଘଟଣା ଜନିତ ମୃତ୍ୟୁ ରୋକିବା ଲାଗି ନିଜ ଟଙ୍କାରେ ଖାଲଖମା ମରାମତି କରୁଛନ୍ତି ବୃୃଦ୍ଧ ଦମ୍ପତି

ଉଦ୍ଧାର ହେଲେ ଅପହୃତ ବ୍ୟକ୍ତି, ଚାକିରି ନାଁରେ ଠକୁଥିଲେ

ଏହା ଏକ ସାମୟିକ ପଦକ୍ଷେପ ବୋଲି କହିଛନ୍ତି ମୁଖପାତ୍ର ଅରିନ୍ଦମ ବାଗଚି । କାବୁଲ ଦୂତାବାସକୁ ମଧ୍ୟ ବନ୍ଦ କରିବାର ଯୋଜନା ନାହିଁ ବୋଲି କୁହାଯାଇଛି । ତେବେ ତାଲିବାନର ପ୍ରଭାବ ବୃଦ୍ଧି ସହିତ ସୁରକ୍ଷା ବିପନ୍ନ ହେଉଥିବାରୁ ସତର୍କ ରହିବାକୁ ନିଜ ନାଗରିକଙ୍କୁ ପରାମର୍ଶ ଦେଇଛନ୍ତି ଭାରତ ସରକାର । ୨୦୦୧ ସେପ୍ଟେମ୍ବର ୧୧ ଆକ୍ରମଣ ପରେ ତାଲିବାନ ଉପରେ ଆକ୍ରମଣ କରିଥିଲା ଆମେରିକା ଓ ଏହାର ପ୍ରାୟ ୨୦ ବର୍ଷ ପରେ ଆଫଗାନିସ୍ତାନ ଛାଡ଼ୁଛି । ଏହି ଅଗଷ୍ଟ ସୁଦ୍ଧା ଆଫଗାନିସ୍ତାନରୁ ସଂପୂର୍ଣ୍ଣ ଭାବେ ଆମେରିକା ନିଜର ସୈନ୍ୟ ପ୍ରତ୍ୟାହାର କରିବ ।