କାବୁଲ: ଆଫଗାନିସ୍ତାନରେ ଗଣତନ୍ତ୍ର ଶାସନ ପ୍ରତିଷ୍ଠା ହୋଇ ନ ପାରେ । କାଉନସିଲ ମେମ୍ବରଙ୍କୁ ନେଇ ଗଠନ ହୋଇପାରେ ନୂଆ ସରକାର । ଏକ ଜାତୀୟ ଗଣମାଧ୍ୟମକୁ କହିଛନ୍ତି ସର୍ବୋଚ୍ଚ ତାଲିବାନ କମାଣ୍ଡର ୱାହିଦୁଲ୍ଲା ହାସିମୀ। କାଉନସିଲ ଦ୍ୱାରା ଚୟନ ହେବେ ବିଭିନ୍ନ ବିଭାଗର ମନ୍ତ୍ରୀ। ଏପଟେ ତାଲିବାନର ସର୍ବୋଚ୍ଚ ନେତା ହଇବତୁଲ୍ଲା ଅଖୁଣ୍ଡଜାଦା ଶାସନ ମୁଖ୍ୟ ରହିବା ନେଇ ସେ ସୂଚନା ଦେଇଛନ୍ତି ।
କାବୁଲରେ ପହଞ୍ଚିଛନ୍ତି ତାଲିବାନର ସହପ୍ରତିଷ୍ଠାତା ମୁଲ୍ଲା ବରାଦର ବରାବର। ଆଫଗାନିସ୍ତାନର ନୂଆ ରାଷ୍ଟ୍ରପତି ହେବା ନେଇ ଜଣାପଡିଛି । ଅନ୍ୟପକ୍ଷେ ରକ୍ତପାତ ଏଡାଇବା ପାଇଁ ପଦ ଛାଡିଥିବା ନେଇ ପୁଣି ଦୋହରାଇଛନ୍ତି ଅସରଫ ଘନି । ସେହିପରି ସେ ବିପୁଳ ପରିମାଣର ଟଙ୍କା ନେଇ ଦେଶ ଛାଡିଥିବା ଯେଉଁ ଚର୍ଚ୍ଚା ହେଉଥିଲା ତାହାକୁ ଖଣ୍ଡନ କରିଛନ୍ତି । ତାଙ୍କ ସୁରକ୍ଷାକର୍ମୀଙ୍କ ପରାମର୍ଶ ଅନୁଯାୟୀ, ସେ ଦେଶ ଛାଡିଥିବା କହିଛନ୍ତି । ତାଲିବାନ ଯୋଦ୍ଧା ତାଙ୍କୁ ଫାଶି ଦେବାକୁ ଚାହୁଁଥିବା ଜାଣିବା ପରେ ସେ ଦେଶ ଛାଡିଛନ୍ତି ବୋଲି କହିଛନ୍ତି।
ପୂର୍ବତନ ରାଷ୍ଟ୍ରପତି ମହମ୍ମଦ ନାଜିବୁଲ୍ଲାଙ୍କୁ ୧୯୯୬ମସିହାରେ ତାଲିବାନ କିଭଳି ଭାବେ ଟ୍ରାଫିକ ଲାଇଟ୍ରେ ଫାଶିରେ ଝୁଲାଇ ଦେଇଥିଲେ ସେନେଇ ମଧ୍ୟ ଉଦାହରଣ ଦେଇଛନ୍ତି । ସେମାନେ ରାଷ୍ଟ୍ରପତି ଭବନରେ ଗୋଟିଏ ରୁମରୁ ଅନ୍ୟ ରୁମ୍ ବୁଲି ବୁଲି ରାଷ୍ଟ୍ରପତିଙ୍କୁ ଖୋଜୁଥିଲେ । ତେଣୁ ରାଷ୍ଟ୍ରପତିଙ୍କୁ ଫାଶିଦେବା ଭଳି ଲଜ୍ଜାଜନକ ଘଟଣା ପୁନଶ୍ଚ ଘଟିବାକୁ ଯାଉଥିବା ବେଳେ ସେଥିରୁ ମୁକୁଳିଛନ୍ତି ।
ଆଫଗାନିସ୍ତାନର ରାଜଧାନୀ କାବୁଲ୍କୁ ତାଲିବାନ ଦଖଲ କରିବା ପରେ ଦେଶ ଛାଡ଼ି ପଳାୟନ କରିଥିବା ରାଷ୍ଟ୍ରପତି ଅସରଫ ଘନି ୟୁଏଇର ଶରଣ ପଶିଛନ୍ତି। ତାଙ୍କୁ ୟୁନାଇଟେଡ୍ ଆରବ ଏମିରେଟସ ତଥା ୟୁଏଇ ପକ୍ଷରୁ ଆଶ୍ରୟ ଦିଆଯାଇଛି । ୟୁଏଇ ବୈଦେଶିକ ମନ୍ତ୍ରାଳୟ ପକ୍ଷରୁ ଏହି ସୂଚନା ଦିଆଯାଇଛି। ମନ୍ତ୍ରାଳୟ କହିଛି ଯେ, ମାନବିକତା ଦୃଷ୍ଟିକୋଣରୁ ଆସ୍ରଫ୍ ଘନି ଏବଂ ତାଙ୍କ ପରିବାରକୁ ଶରଣ ଦିଆଯାଇଛି।