ପୋଡ଼ି ହୋଇ ବନ ସଂରକ୍ଷକଙ୍କ ମୃତ୍ୟୁ ଘଟଣାରେ ବଢ଼ୁଛି ସନ୍ଦେହ, ପତ୍ନୀଙ୍କୁ ପରିବାରର ଆଙ୍ଗୁଳି ନିର୍ଦେଶ

ପାରଳାଖେମୁଣ୍ଡି: ସନ୍ଦେହ ଘେରରେ ପାରଳାଖେମୁଣ୍ଡି ସହକାରୀ ବନ ସଂରକ୍ଷକ ସୌମ୍ୟରଞ୍ଜନ ମହାପାତ୍ରଙ୍କ ମୃତ୍ୟୁ । ଗତକାଲି ରାତିରେ ସରକାରୀ ବାସଭବନରେ ପତ୍ନୀଙ୍କ ସହ ଥିବା ବେଳେ ନିଆଁରେ ପୋଡ଼ି ହୋଇ ଗୁରୁତର ହୋଇପଡ଼ିଥିବା ସୌମ୍ୟରଞ୍ଜନଙ୍କ ଆଜି କଟକର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଛି । ହେଲେ ଏ ଘଟଣା ସମ୍ପର୍କରେ ତାଙ୍କ ନବ ବିବାହିତା ପତ୍ନୀ ପାଟି ଖୋଲିନଥିବା ବେଳେ ସେପଟେ ସୌମ୍ୟଙ୍କ ପରିବାର ଲୋକେ ଏ ଘଟଣା ପାଇଁ ବୋହୁକୁ ସନ୍ଦେହ ଘେରକୁ ଆଣିଛନ୍ତି ।

ସରକାରୀ ବାସଭବନରେ ସନ୍ଦେହଜନକ ଭାବେ ଜଳିଗଲେ ବନ ସଂରକ୍ଷକ । ପତ୍ନୀଙ୍କ ଉପସ୍ଥିତିରେ ନିଆଁରେ ପୋଡ଼ି ହୋଇ ଗୁରୁତର ହେବାର କେଇ ଘଣ୍ଟା ପରେ ଉଡ଼ିଗଲା ପ୍ରାଣ ବାୟୁ । ପାରଳାଖେମୁଣ୍ଡିସ୍ଥିତ ଏକ ସରକାରୀ କ୍ୱାର୍ଟରରେ ଗତକାଲି ରାତି ପ୍ରାୟ ୯ଟା ବେଳେ ଘଟିଥିଲା ଏହି ଅଘଟଣ ।  ACFO ସୌମ୍ୟରଞ୍ଜନ ମହାପାତ୍ର ହଠାତ ନିଆଁରେ ପୋଡ଼ି ହୋଇ ଯାଇଥିବା ନେଇ ପଡ଼ୋଶୀଙ୍କୁ ସୂଚନା ଦେଇଥିଲେ ପତ୍ନୀ । ପରେ ତାଙ୍କୁ ତୁରନ୍ତ ପାରଳାଖେମୁଣ୍ଡି ମେଡିକାଲ ଓ ପରେ ବ୍ରହ୍ମପୁର MKCG ମେଡିକାଲ କଲେଜକୁ ସ୍ଥାନାନ୍ତର କରାଯାଇଥିଲା । ହେଲେ ସେଠାରେ ଅବସ୍ଥା ଅଧିକ ଗୁରୁତର ହେବାରୁ ଆଜି ସକାଳୁ କଟକସ୍ଥିତ ଏକ ଘରୋଇ ମେଡିକାଲକୁ ସ୍ଥାନାନ୍ତର କରାଯାଇଥିଲା । ଶରୀରର ପ୍ରାୟ ୯୦ ଭାଗ ପୋଡ଼ିଯାଇଥିବାରୁ ମୃତ୍ୟୁ ସହ ପ୍ରାୟ ୧୨ ଘଣ୍ଟାର ସଂଘର୍ଷ କରି ଶେଷରେ ଚିକିତ୍ସାଧୀନ ଅବସ୍ଥାରେ ହିଁ ଆଖି ବୁଜିଦେଇଥିଲେ ସୌମ୍ୟରଞ୍ଜନ । 

ସୌମ୍ୟରଞ୍ଜନ ସନ୍ଦେହଜନକ ଭାବେ ପୋଡ଼ିଯିବା ନେଇ ଖବର ପ୍ରଚାର ପରେ ଗତକାଲି ବିଳମ୍ବିତ ରାତିରେ ତାଙ୍କ କ୍ୱାର୍ଟରକୁୁ ଯାଇ ସରଜମିନ୍ ତଦନ୍ତ କରିଛି ପାରଳାଖେମୁଣ୍ଡି ପୋଲିସ । ପାରଳାଖେମୁଣ୍ଡି ଏସଡିପିଓ ଓ ଆଇଆଇସି ଘର ସର୍ଚ୍ଚ କରିବା ବେଳେ ଏକ କିରୋସିନ୍ ବୋତଲ ସହ ଅନ୍ୟ କିଛି ସାମଗ୍ରୀ ଜବତ କରିଛି । ପ୍ରାଥମିକ ତଦନ୍ତ ପରେ ପୋଲିସ ଏହାକୁ ଦୁର୍ଘଟଣା ବୋଲି କହିଛି । ତେଣେ ଘଟଣା ବେଳେ ଉପସ୍ଥିତ ଥିବା ସୌମ୍ୟରଞ୍ଜନଙ୍କ ପତ୍ନୀ କିନ୍ତୁ ଏ ବାବଦରେ ଆଦୌ ପାଟି ଖୋଲି ନାହାନ୍ତି । ସ୍ୱାମୀ କେମିତି ପୋଡ଼ିଲେ, ନିଆଁ କେଉଁଠୁ ଆସିଲା ଏବଂ ଏହା ଦୁର୍ଘଟଣା କି ଆଉ କିଛି ? ସେ ନେଇ ପଦୁଟିଏ ବି କହିନାହାନ୍ତି ।

Also Read

ବାଥ୍‌ରୁମ୍‌ର ବାସ୍ତୁଦୋଷ ବି ପରିବାର ପାଇଁ ହୋଇଥାଏ କାଳ

ରାଜ୍ୟରେ ଅଭାବ ରହିବନି ଟିକା, ମହଜୁଦ୍‌ ବାଦ୍ ପୁଣି ଆସିଲା କୋଭାକ୍ସିନ

ଏଥର ବି ବୋଲ୍‌ବମ୍ ଉପରେ ରୋକ୍ ଲଗାଇଲେ ରାଜ୍ୟ ସରକାର

ଏପଟେ ଏତେବଡ଼ ଘଟଣା ପରେ ବି ବୋହୁର ନିରବତା ନେଇ ତାଙ୍କ ଆଡ଼କୁ ଆଙ୍ଗୁଳି ଉଠାଇଛନ୍ତି ସୌମ୍ୟରଞ୍ଜନଙ୍କ ବାପା ଓ ମାମୁଁ । ଏପରିକି ସୌମ୍ୟରଞ୍ଜନ ପୂର୍ବରୁ ପତ୍ନୀଙ୍କ ଦ୍ୱାରା ନିର୍ଯାତନାର ଶିକାର ହେଉଥିବା ଅଭିଯୋଗ ବି ସାମ୍ନାକୁ ଆସିଛି ।

ବାଲେଶ୍ୱର ଖଇରା ଅଞ୍ଚଳର ସୌମ୍ୟରଞ୍ଜନ ୨୦୧୮ରେ ଓଡ଼ିଶା ଫରେଷ୍ଟ ସର୍ଭିସରେ କୃତକାର୍ଯ୍ୟ ପରେ ୨୦୨୦ରୁ ଗଜପତି ଜିଲ୍ଲାରେ ପୋଷ୍ଟିଂ ହୋଇଥିଲେ । ଆଜିକୁ ପ୍ରାୟ ବର୍ଷେ ହେବ ପାରଳାଖେମୁଣ୍ଡିସ୍ଥିତ ସରକାରୀ କ୍ୱାର୍ଟରରେ ରହିଆସୁଥିବା ବେଳେ ମାତ୍ର ୬ ମାସ ତଳେ ତାଙ୍କର ବିବାହ ହୋଇଥିଲା । ବିବାହ ପରଠୁ ପତି-ପତ୍ନୀ ସରକାରୀ କ୍ୱାର୍ଟରରେ ରହି ଆସୁଥିଲେ ।

ତେବେ ପତ୍ନୀଙ୍କ ସହ ଥିବା ବେଳେ ରୋଷେଇ ଘରେ ନଥାଇ ବି ନିଆଁ ଆସିଲା କେଉଁଠୁ ଏବଂ ସୌମ୍ୟରଞ୍ଜନ କେଉଁ ପରିସ୍ଥିତିରେ ପୋଡ଼ି ହୋଇ ଏତେ ଗୁରୁତର ହୋଇପଡ଼ିଲେ ତାହା ବଡ଼ ପ୍ରଶ୍ନବାଚୀ ସୃଷ୍ଟି କରିଛି । ଏସବୁ ଭିତରେ ପୋଲିସ୍ ମୃତ୍ୟୁ ପୂର୍ବରୁ ସୌମ୍ୟରଂଜନଙ୍କ ଜମାନବନ୍ଦୀ ରେକର୍ଡ କରିଥିବା ବେଳେ ସେ ପୋଲିସ୍ ଆଗରେ କଣ କହିଛନ୍ତି ସେନେଇ ସୂଚନା ସାମ୍ନାକୁ ଆସିନାହିଁ ।