OSSC ବିରୋଧରେ ତେଜୁଛି ଅସନ୍ତୋଷ, କେବେ ଗିରଫ ହେବେ ବିରଞ୍ଚିଙ୍କ ଗଡ୍‌ଫାଦର ?

ଭୁବନେଶ୍ୱର: ଷ୍ଟାଫ୍ ସିଲେକ୍ସନ୍ କମିଶନ୍‌ରେ ନିଯୁକ୍ତି କେଳେଙ୍କାରୀକୁ ନେଇ ତେଜୁଛି ଅସନ୍ତୋଷ । କମିଶନ ସଦସ୍ୟଙ୍କ ବ୍ୟକ୍ତିଗତ ସଚିବ ପଦବୀରୁ ତଡ଼ା ଖାଇଥିବା କରିତକର୍ମା କୋଟିପତି ବିରଞ୍ଚି ସାହୁ କେବଳ ଜଣେ ନୁହଁନ୍ତି, ଦୀର୍ଘଦିନ ଧରି ଅନେକ ଲୋକଙ୍କ ସଂପୃକ୍ତିରେ ଏ ଦୁର୍ନୀତି ଚାଲିଥିବା ଅଭିଯୋଗ ଉଠିଛି । ଜଣଙ୍କ ପରେ ଜଣେ ଚାକିରି ଆଶାୟୀ ସାମ୍ନାକୁ ଆସି ବିଷୋଦଗାର୍ କରୁଛନ୍ତି । ତାସହ ବଖାଣୁଛନ୍ତି ନିଜ ବେଦନାଦାୟକ କାହାଣୀ । ଏସବୁ ଭିତରେ ଆଜି ବିରଞ୍ଚିଙ୍କ କୁବେରପଣର ସତ ଖୋଜିବାକୁ ଏବଂ ଆର୍ଥିକ କାରବାରର ଗୁମର ଖୋଲିବାକୁ ପ୍ରବର୍ତ୍ତନ ନିର୍ଦ୍ଦେଶାଳୟ ବା ଇଡି ଅଣ୍ଟା ଭିିଡ଼ିଛି ।

ଶିକ୍ଷିତ ବେକାରଙ୍କୁ ଚାକିରିର ଚକ୍‌ମା ଦେଖାଇ ଧଳାହାତୀ ପୋଷା ନୀତି ଆପଣାଇଛି କି ଓଡ଼ିଶା ଷ୍ଟାଫ୍ ସିଲେକ୍ସନ୍ କମିଶନ୍ ? OSSC ସଦସ୍ୟଙ୍କ ବହିଷ୍କୃତ ପିଏସ୍ ବିରଞ୍ଚି ନାରାୟଣ ସାହୁଙ୍କ ଭଳି ଆଉ କେତେ ଅଛନ୍ତି ମିଡିଲ୍‌ମ୍ୟାନ୍ ? କୋଟି କୋଟି ଟଙ୍କାର କାରବାର କରି ବିରଞ୍ଚିଙ୍କ କୁବେରପଣ ପଛରେ ଆଉ ସବୁ କିଏ ? ଭିଜିଲାନ୍ସର ଜାରି ରହିଥିବା ଖୋଳତାଡ଼ ଭିତରେ ମାମଲା ରୁଜୁ କରି ଏବେ ଏଣ୍ଟ୍ରି ମାରିଛି ପ୍ରବର୍ତ୍ତନ ନିର୍ଦ୍ଦେଶାଳୟ । ଆଶା କରାଯାଉଛି, ଇଡ଼ି ବିରଞ୍ଚିଙ୍କ ମନି ଲଣ୍ଡରିଂ ଏବଂ ଚାକିରି ଆଶାୟୀଙ୍କଠୁ ଅର୍ଥ ସଂଗ୍ରହ ପଛର ସତ ଉଗାରିବ । ସାଢ଼େ ୩ କୋଟି ଟଙ୍କାରୁ ଅଧିକ ସମ୍ପତ୍ତି ଠୁଳର ମୁଖ୍ୟ ଉତ୍ସ କଣ ? କେମିତି ଏବଂ କାହାକୁ ଅସ୍ତ୍ର କରି ପୁଳା ପୁଳା ଟଙ୍କା, ସୁନା, କୋଠାବାଡ଼ି ଅର୍ଜନ କରିଥିଲେ ବାବୁ ବିରଞ୍ଚି ? ଏ ରାକେଟ୍‌ରେ ଆଉ କିଏ ସବୁ ଅଛନ୍ତି ? ଏସବୁ ଦିଗକୁ ନେଇ ଖୋଳତାଡ଼ ହେବ ବୋଲି କହିଛନ୍ତି ଇଡ଼ି ଯୁଗ୍ମ ନିର୍ଦ୍ଦେଶକ ।

Also Read

୧୦ ହଜାର ଟଙ୍କା ଲାଞ୍ଚ ନେବା ବେଳେ ଧରାପଡ଼ିଲେ ଡ୍ରେନେଜ୍ ଡିଭିଜନ ଅଧୀକ୍ଷଣ ଯନ୍ତ୍ରୀ

ସେନା ହେଲିକପ୍ଟର ଦୁର୍ଘଟଣା ପରେ ଚାଲିଛି ସର୍ଚ୍ଚ ଅପରେସନ, ଡ୍ୟାମ୍‌ରେ ବୁଡ଼ି ଯବାନଙ୍କୁ ଖୋଜୁଛି NDRF

ସ୍ୱର୍ଣ୍ଣ ପଦକ ଆଶା ଦେଖାଇଲେ ଭାରତୀୟ ରେସଲର ରବି ଦହିୟା, ଫାଇନାଲରେ କଲେ ଏଣ୍ଟ୍ରି

ବିରଞ୍ଚିଙ୍କ ଗିରଫଦାରି ପରଠୁ OSSC ଦ୍ୱାରା ହେଉଥିବା ନିଯୁକ୍ତି ପ୍ରକ୍ରିୟାରେ ସ୍ୱଚ୍ଛତାକୁ ନେଇ କ୍ରମାଗତ ଭାବେ ପ୍ରଶ୍ନ ଉଠାଇ ଚାଲିଛନ୍ତି ଚାକିରି ଆଶାୟୀ । କିଏ ଟଙ୍କା କାରବାରର କଥା କହୁଛନ୍ତି ତ ଆଉ କିଏ ବିଳମ୍ବିତ ନିଯୁକ୍ତି ପ୍ରକ୍ରିୟାକୁ ନେଇ ପ୍ରଶ୍ନ ଉଠାଉଛନ୍ତି ।

ସେହିଭଳି ଜଣେ ବ୍ୟକ୍ତି ହେଉଛନ୍ତି ନିହାର ରଂଜନ ଦାଶ । ୨୦୧୮ରେ OSSC ଦ୍ୱାରା ପୋଲିସ SI ପାଇଁ ପ୍ରକାଶିତ ବିଜ୍ଞାପନ ଆଧାରରେ ଆବେଦନ କରିଥିଲେ । ଇତି ମଧ୍ୟରେ ୩ ବର୍ଷ ହୋଇଗଲାଣି, ନିଯୁକ୍ତି ତ ଦୂରର କଥା, ପରୀକ୍ଷା ହିଁ ହୋଇନଥିବା ଅଭିଯୋଗ କରିଛନ୍ତି । ଖାଲି ଯେ SI ନିଯୁକ୍ତି ତା’ନୁହେଁ, ଗତ କିଛି ବର୍ଷ ଧରି ବିଭିନ୍ନ ପଦପଦବୀ ପାଇଁ ବିଜ୍ଞାପନ ପ୍ରକାଶ କରି ଅହେତୁକ ବିଳମ୍ବ ସହ କମିଶନ୍ ଆଶାୟୀଙ୍କ ଭବିଷ୍ୟତ ସହ ଖେଳ ଖେଳିଥିବା ଅଭିଯୋଗ ଆଣି ବର୍ଷୁଛନ୍ତି ଚାକିରି ଆଶାୟୀ । ଏପରିକି କିଛି ଆଶାୟୀ କମିଶନଙ୍କ ଅଫିସର ଦ୍ୱାରସ୍ଥ ହୋଇଥିବାବେଳେ ଆଉ କିଛି ଭିଜିଲାନ୍ସର ଦ୍ୱାରସ୍ଥ ହୋଇ ଚାକିରି ନାଁରେ ବିରଞ୍ଚି ସାହୁଙ୍କ ଟଙ୍କା କେଳେଙ୍କାରୀର ଗୁମର ଖୋଲିଛନ୍ତି ।

ନିଯୁକ୍ତି ପ୍ରକ୍ରିୟାରେ ଅନିୟମିତତାର ଏଭଳି ଲମ୍ବି ଚାଲିଥିବା ଅଭିଯୋଗ ଭିତରେ ଚାକିରି ଆଶାୟୀଙ୍କ ଟାର୍ଗେଟ୍‌ରେ OSSC । କେବଳ ଚାକିରି ଆଶାୟୀ ନୁହଁନ୍ତି, ଗତ ୩ ଦିନ ହେଲା ବିରଞ୍ଚିଙ୍କ ପଛରେ ଥିବା ବଡ଼ ବଡ଼ିଆଙ୍କୁ ଧରିବା ସହ ନିଯୁକ୍ତି କେଳେଙ୍କାରୀର ଖୁଲାସା ଦାବି କରି ଗର୍ଜନ କରୁଛନ୍ତି ଛାତ୍ର କଂଗ୍ରେସ ଏବଂ ବିଜେପି ଯୁବମୋର୍ଚ୍ଚା ସଦସ୍ୟ । ଗତ ୨ ଦିନ ଧରି ରାଜ୍ୟର ସମସ୍ତ ନିର୍ବାଚନ ମଣ୍ଡଳୀରେ ବିକ୍ଷୋଭ ପ୍ରଦର୍ଶନ କରିଛି ବିଜେପି ଯୁବମୋର୍ଚ୍ଚା ।