ଏବେ ପାକିସ୍ତାନକୁ ପାଣି ବନ୍ଦ

ନୂଆଦିଲ୍ଲୀ: ପୁଲଓ୍ୱାମା ଆତଙ୍କବାଦୀ ଆକ୍ରମଣକୁ ନେଇ ଭାରତ-ପାକିସ୍ତାନ ମଧ୍ୟରେ ସମ୍ପର୍କ ତିକ୍ତ ହେବା ପରେ ଭାରତ ତାର ଆଭିମୁଖ୍ୟକୁ ଆହୁରି କଠୋର କରିଛି।

ଭାରତର ପୂର୍ବ ଦିଗରେ ଥିବା ପାକିସ୍ତାନକୁ ପ୍ରବାହିତ ନଦୀଗୁଡ଼ିକରେ ଆଉ ପାଣି ନଛାଡ଼ିବାକୁ କେନ୍ଦ୍ର ସରକାର ନିଷ୍ପତ୍ତି ନେଇଥିବା କେନ୍ଦ୍ରମନ୍ତ୍ରୀ ନୀତିନ ଗଡ଼କରୀ ଟ୍ୱିଟ୍‌ କରି ସୂଚନା ଦେଇଛନ୍ତି। ପାକିସ୍ତାନ ବଦଳରେ ଏହି ପାଣିକୁ ଜମ୍ମୁ ଓ କଶ୍ମୀର ଓ ପଞ୍ଜାବକୁ ଯୋଗାଇ ଦିଆଯିବ ବୋଲି ଗଡ଼କରୀ କହିଛନ୍ତି।

ଶାହପୁର-କାଣ୍ଡିଠାରେ ରବି ନଦୀ ଉପରେ ଏକ ଡ୍ୟାମ୍‌ ପ୍ରସ୍ତୁତ ହେଉଛି। ନଦୀର ଯେଉଁ ଜଳ ଭାଗ ପାକିସ୍ତାନକୁ ଯାଉଥିଲା। ସେଇ ଜଳକୁ ୟୁଯେଏଚ୍‌ ପ୍ରୋଜେକ୍ଟ ମାଧ୍ୟମରେ ଗଚ୍ଛିତ ରଖାଯାଇ ଆମର ଜମ୍ମୁ ଓ କଶ୍ମୀରରେ ବ୍ୟବହାର ପାଇଁ ଛଡ଼ାଯିବ। ବଳକା ପାଣିକୁ ଅନ୍ୟ ରାଜ୍ୟଗୁଡ଼ିକୁ ଯୋଗାଇ ଦେବାକୁ ଦ୍ୱିତୀୟ ରବି ଓ ବ୍ୟାସ୍ ନଦୀକୁ ଛଡ଼ାଯିବ ବୋଲି ଗଡ଼କରୀ ଟ୍ୱିଟ୍‌ କରିଛନ୍ତି।

ସିନ୍ଧୁ ନଦୀ ଜଳବଣ୍ଟନ ଚୁକ୍ତି ଅନୁସାରେ ଭାରତ ପୂର୍ବରେ ପ୍ରବାହିତ ବ୍ୟାସ୍, ରବି ଓ ସତ୍‌ଲେଜ୍ ନଦୀର ଜଳ ବ୍ୟବହାର କରୁଥିବା ବେଳେ ପାକିସ୍ତାନ ପଶ୍ଚିମରେ ପ୍ରବାହିତ ସିନ୍ଧୁ, ଚେନାବ୍ ଓ ଝେଲମର ପାଣି ଉପରେ ହକ୍ ପାଇଛି। ତେବେ ଭାରତ ଏହି ନଦୀଗୁଡ଼ିକ ଉପରେ ଜଳବିଦ୍ୟୁତ୍ ପ୍ରକଳ୍ପ ନିର୍ମାଣ କରିପାରିବ ନାହିଁ କି ବ୍ୟବସାୟିକ ବ୍ୟବହାର କରିପାରିବ ନାହିଁ ବୋଲି ଚୁକ୍ତିରେ ବ୍ୟବସ୍ଥା ରହିଛି। ମାତ୍ର ପାକିସ୍ତାନ ଆତଙ୍କବାଦୀ କାର୍ଯ୍ୟକଳାପ ବନ୍ଦ କରିବାର ନାଁ ନେଉ ନଥିବାରୁ ଜଳବଣ୍ଟନ ଚୁକ୍ତିରୁ ଓହରି ଯିବା ଲାଗି ଭାରତ ବାରମ୍ବାର ଚେତାବନୀ ଦେଇଆସୁଛି।

You might also like