ଇଟାଲି: ଗୋଟିଏ ଦିନରେ ଚାଲିଗଲା ୪୭୫ ଜୀବନ
ରୋମ୍:ଚୀନ୍ର ବୁହାନର ପ୍ରାନ୍ତରେ ଆତଙ୍କ ଖେଳାଇବା ପରେ ଏବେ ଘାତକ କରୋନା ଭାଇରସ୍ ଇଟାଲିରେ ଆତଙ୍କ ଖେଳାଇଛି। ଏଠାରେ ଦିନକୁ ଦିନ ମୃତକଙ୍କ ସଂଖ୍ୟା ବଢିବାରେ ଲାଗିଛି। ଦେଶରେ ଏବେ ସୁଦ୍ଧା ୩୫,୭୧୩ ଜଣ ଆକ୍ରାନ୍ତ ହୋଇଥିବାବେଳେ ୨୯୭୮ ଜଣଙ୍କର ମୃତ୍ୟୁ ଘଟି ସାରିଲାଣି। ବୁଧବାର ଦିନ ୪୭୫ ଜଣଙ୍କର ମୃତ୍ୟୁ ଘଟିଥିବା ଜଣାଯାଇଛି।
ଇଟାଲୀର ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଗତ ୨୪ ଘଣ୍ଟାରେ ଇଟାଲୀରେ କରୋନା ଜନିତ ମୃତ୍ୟୁସଂଖ୍ୟା ୧୯% ବୃଦ୍ଧି ପାଇଛି। ଅନ୍ୟପକ୍ଷେ ବୁଧବାର ଏଠାରେ କରୋନା ଆକ୍ରାନ୍ତଙ୍କ ସଂଖ୍ୟା ୩୧, ୫୦୬ ଥିବା ବେଳେ ଗୁରୁବାର ଏହି ସଂଖ୍ୟା ୩୫, ୭୧୩ରେ ପହଞ୍ଚି ଯାଇଛି। ଅର୍ଥାତ ୧୩% ବୃଦ୍ଧି ପାଇଛି। ତେବେ ମୃତକଙ୍କ ମଧ୍ୟରେ ସବୁଠାରୁ ଅଧିକ ୮୦ରୁ ୧୦୦ ବର୍ଷ ବୟସ୍କ ଲୋକ ଅଛନ୍ତି।
୪,୦୨୫ ଜଣ ଲୋକ ସୁସ୍ଥ ହୋଇ ଘରକୁ ଫେରିଥିବା ବେଳେ ଏବେ ବି ୨୮,୭୧୦ ଜଣ ବିଭିନ୍ନ ହସ୍ପିଟାଲରେ ଚିକିତ୍ସିତ ହେଉଛନ୍ତି। ଏମାନଙ୍କ ମଧ୍ୟରୁ ୨୨୫୭ ଜଣଙ୍କ ଅବସ୍ଥା ଅତ୍ୟନ୍ତ ସଙ୍କଟାପନ୍ନ ରହିଛି। ତେବେ ଏଠାରେ ପରୀକ୍ଷା କରୁଥିବା ଲୋକଙ୍କ ସଂଖ୍ୟା କମ୍ ଥିବାବେଳେ ମୃତକଙ୍କ ସଂଖ୍ୟା ଅଧିକ ଥିବା ଜଣାଯାଇଛି। କାରଣ ଯେଉଁମାନେ କରୋନା ଆକ୍ରାନ୍ତ ହେଉଛନ୍ତି, ବିଶେଷ କରି ଯୁବବର୍ଗଙ୍କ ଶରୀରରେ ସାମାନ୍ୟ ପ୍ରଭାବ ଦେଖା ଦେଉଛି ସେମାନେ ଟେଷ୍ଟ କରାଇବାକୁ ଯାଉ ନାହାନ୍ତି କିମ୍ବା ସେମାନଙ୍କୁ ବିନା ଟେଷ୍ଟରେ ଫେରାଇ ଦିଆଯାଉଛି। ଫଳରେ ସେମାନଙ୍କ ମଧ୍ୟରୁ ଯେଉଁମାନଙ୍କର ପଜେଟିଭ ଅଛି ସେମାନଙ୍କଠାରୁ ଭାଇରସ ବ୍ୟାପୁଛି। ଏହି କାରଣରୁ ଅନ୍ୟ ଦେଶ ତୁଳନାରେ ଏଠାରେ ପଜେଟିଭ କେସ୍ କମ୍ ରହୁଥିବାବେଳେ ମୃତ୍ୟୁ ସଂଖ୍ୟା ଅଧିକ ରହୁଛି। ଏହାଛଡ଼ା ଏଠାରେ ଚିକିତ୍ସା ବ୍ୟବସ୍ଥାରେ ତ୍ରଟି ରହୁଥିବାରୁ ମୃତକଙ୍କ ସଂଖ୍ୟା ବୃଦ୍ଧି ପାଉଥିବା କୁହାଯାଉଛି।
ସୂଚନାଥାଉ କି, ଡିସେମ୍ବର ମାସରେ ଚାଇନାର ଉହାନ ପ୍ରଦେଶରେ ସୃଷ୍ଟି ହୋଇଥିବା କରୋନା ଭାଇରସ ଏଯାଏ ସାରା ବିଶ୍ୱରେ ୮,୯୬୯ ଜୀବନ ନେଇଥିବା ବେଳେ ୨,୧୯, ୩୩୨ ଜଣ ଏଥିରେ ଆକ୍ରାନ୍ତ ହୋଇଛନ୍ତି। ତେବେ ୮୫,୭୪୫ ଜଣ ଲୋକ ସୁସ୍ଥ ହୋଇ ଘରକୁ ଫେରିଛନ୍ତି। କରୋନାରେ ପ୍ରାଣ ହରାଇଥିବା ୮,୯୬୯ ଜଣଙ୍କ ମଧ୍ୟରୁ ଚାଇନାରେ ୩,୨୪୫ ଜଣଙ୍କ ଜୀବନ ଯାଇଛି।