ରାଜ୍ୟରେ ଲକ୍‌ଡାଉନ୍‌ ନିୟମ କୋହଳ ନିଷ୍ପତ୍ତିକୁ କେନ୍ଦ୍ର ସରକାରଙ୍କ ବିରୋଧ

ନୂଆଦିଲ୍ଲୀ: ଦେଶରେ କରୋନା ମୃତ୍ୟୁସଂଖ୍ୟା ୫୪୩କୁ ବୃଦ୍ଧି ପାଇଛି। ଗତ ୨୪ ଘଣ୍ଟାରେ ୨୪ ଜଣଙ୍କ ଜୀବନ ଯାଇଛି। ସେହିପରି ଆକ୍ରାନ୍ତଙ୍କ ସଂଖ୍ୟା ୧୭ ହଜାର ୨୬୫କୁ ବୃଦ୍ଧି ପାଇଛି। ୧୪ ହଜାର ୧୭୫ ଜଣଙ୍କ ଚିକିତ୍ସା ଚାଲିଥିବା ବେଳେ ୨ହଜାର ୫୪୭ ଜଣ ସୁସ୍ଥ ହୋଇଛନ୍ତି। ମହାରାଷ୍ଟ୍ରରେ ସର୍ବାଧିକ ୪ ହଜାର ୨୦୩ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୨୨୩ ଜଣଙ୍କ ମୃତ୍ୟୁ ହୋଇଛି।

ଦିଲ୍ଲୀରେ ୨ ହଜାର ୩ ଜଣ ଆକ୍ରାନ୍ତ ଥିବା ବେଳେ, ୪୫ ଜଣଙ୍କ ଜୀବନ ଯାଇଛି। ତୃତୀୟ ସ୍ଥାନରେ ରହିଛି ଗୁଜରାଟ ସେଠାରେ ୧ ହଜାର ୭୪୩ ଆକ୍ରାନ୍ତ ଚିହ୍ନଟ ହୋଇଥିବାବେଳେ, ୬୩ ଜଣଙ୍କ ମୃତ୍ୟୁ ଘଟିଛି। ରାଜସ୍ଥାନରେ ୧୪୭୮ ଆକ୍ରାନ୍ତ ଓ ୧୪ ଜଣଙ୍କ ମୃତ୍ୟୁ ଏବଂ ତାମିଲନାଡ଼ୁରେ ୧୪୭୭ ଆକ୍ରାନ୍ତ ଏବଂ ୧୫ଟି ମୃତ୍ୟୁ ଘଟିଛି।

୧୭ ନମ୍ବର ସ୍ଥାନରେ ରହିଛି ଓଡ଼ିଶା। ପଶ୍ଚିମବଙ୍ଗର ୭ ଜିଲ୍ଲା ଭଳି ମଧ୍ୟପ୍ରଦେଶର ଇନ୍ଦୋର, ମହାରାଷ୍ଟ୍ରର ମୁମ୍ବାଇ ଓ ପୁନେ, ରାଜସ୍ଥାନର ଜୟପୁର ବି ସ୍ଥତି ଅତି ଜଟିଳ ବୋଲି କେନ୍ଦ୍ର ଗୃହମନ୍ତ୍ରାଳୟ ପକ୍ଷରୁ କୁହାଯାଇଛି। ଅନ୍ୟପକ୍ଷରେ କେରଳ ଓ ଅନ୍ୟ କିଛି ରାଜ୍ୟ ଲକଡାଉନ ନିୟମ କୋହଳ କରିବାକୁ ନିଷ୍ପତ୍ତି ନେଇଥିବାରୁ ମନ୍ତ୍ରଣାଳୟ ତାର ଦୃଢ ବିରୋଧ କରିଛି।

ସେହିପରି ଓଡିଶାକୁ ପଶ୍ଚିମବଙ୍ଗ ଚିନ୍ତା। ରାଜ୍ୟରେ ପଶ୍ଚିବବଙ୍ଗ ଲିଙ୍କ ଥିବା କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ସୂଚନା ଚିନ୍ତାକୁ ଆହୁରି ବଢାଇ ଦେଇଛି। ପଶ୍ଚିମବଙ୍ଗର ୭ଟି ଜିଲ୍ଲା କୋଲକାତା, ହାଓ୍ୱଡା, ଉତ୍ତର ଚବିଶ ପ୍ରଗଣା, ଦାର୍ଜିଲିଂ, ଜଲପାଇଗୁଡି, କାଲିମପଙ୍ଗ ଓ ଓଡ଼ିଶାକୁ ଲାଗି ଥିବା ପୂର୍ବ ମେଦିନାପୁରରେ ସ୍ଥିତି ଅତି ସଂଗୀନ ଥିବା କେନ୍ଦ୍ର ଗୃହ ମନ୍ତ୍ରଣାଳୟ କହିଛି। ଏସବୁ ଜିଲ୍ଲାକୁ କେନ୍ଦ୍ରୀୟ ଟିମ୍ ଯାଇ ସ୍ଥିତି ଅନୁଧ୍ୟାନ କରିବ।

You might also like