ରାଜସ୍ଥାନ ରାଜନୀତି; ବିଧାୟକଙ୍କୁ ନୋଟିସ୍ ପ୍ରସଙ୍ଗରେ ସୋମବାର ସୁପ୍ରିମକୋର୍ଟରେ ଶୁଣାଣି

ଜୟପୁର: ସାମ୍ବିଧାନିକ ସଂକଟ ଆଡ଼କୁ ମୁହାଁଉଛି ରାଜସ୍ଥାନ ରାଜନୀତି। ରାଜ୍ୟରେ ଚାଲିଥିବା ପଲିଟିକାଲ ଡ୍ରାମା ଏବେ ଅଦାଲତରୁ ଯାଇ ରାଜଭବନରେ କେନ୍ଦ୍ରୀଭୂତ ହୋଇଛି। କୋର୍ଟରୁ ଝଟକା ଖାଇ ମୁଖ୍ୟମନ୍ତ୍ରୀ ସଂଖ୍ୟା ଗରିଷ୍ଠତାର ପ୍ରମାଣ ଦେବାକୁ ଉଦ୍ୟମ କରୁଥିବାବେଳେ ରାଜ୍ୟପାଳ କିନ୍ତୁ ଅନୁମତି ଦେଉନଥିବା ଅଭିଯୋଗ କରିଛି କଂଗ୍ରେସ।

ଏପଟେ ବିଧାୟକମାନେ ଡେରା ପକାଇଥିବା ହୋଟେଲ ଫେୟାରମଣ୍ଟରେ ଏନେଇ ବିଧାୟକ ଦଳ ବୈଠକରେ ଆଲୋଚନା ହୋଇଛି। ଆବଶ୍ୟକ ପଡ଼ିଲେ ଏହି ପ୍ରସଙ୍ଗରେ ରାଷ୍ଟ୍ରପତିଙ୍କ ଦ୍ୱାରସ୍ଥ ହେବା ପାଇଁ ପ୍ରସ୍ତୁତ ହେବାକୁ ମୁଖ୍ୟମନ୍ତ୍ରୀ ଅଶୋକ ଗେହଲଟ୍‌ ଦଳର ବିଧାୟକମାନଙ୍କୁ କହିଛନ୍ତି।

ତା ସହିତ ରାଜ୍ୟ କ୍ୟାବିନେଟର ଏକ ବୈଠକ ବି ଆଜି ହୋଟେଲରେ ବସିଥିଲା। ଯେଉଁଥିରେ ବିଧାନସଭା ଅଧିବେଶନ ଡାକିବା ପାଇଁ ପ୍ରସ୍ତାବ ପାରିତ ହୋଇଛି। ଶାସକ ଦଳ ଏହି ପ୍ରସଙ୍ଗକୁ ନେଇ ଆଜି ପୁଣି ଥରେ ରାଜ୍ୟପାଳଙ୍କୁ ଭେଟିବାର ଅଛି।

ଏପଟେ ଆଜି ବିଜେପିର ଏକ ପ୍ରତିନିଧି ଦଳ ରାଜଭବନ ଯାଇ ରାଜ୍ୟପାଳଙ୍କୁ ଭେଟିଛନ୍ତି। ଗତକାଲି ରାଜଭବନ ଘେରିବାକୁ ଗେହେଲଟ ଦେଇଥିବା ଚେତାବନୀର ପ୍ରତିବାଦ କରି ରାଜ୍ୟପାଳଙ୍କ ଦ୍ୱାରସ୍ଥ ହୋଇଛି ବିଜେପି।

ବିଧାନସଭା ଅଧିବେଶନ ଡକାଇବା ପାଇଁ ରାଜ୍ୟପାଳଙ୍କ ଉପରେ ଶାସକ ଦଳ ଚାପ ପ୍ରୟୋଗ କରୁଥିବା ବିଜେପି କହିଛି। ସେପଟେ ବିଦ୍ରୋହୀ ବିଧାୟକଙ୍କୁ ବାଚସ୍ପତିଙ୍କ ନୋଟିସ୍ ପ୍ରସଙ୍ଗରେ ସୋମବାର ସୁପ୍ରିମ୍‌କୋର୍ଟରେ ଶୁଣାଣି ହେବ। ଶନିବାର କୋର୍ଟ ପକ୍ଷରୁ ଜାରି କରାଯାଇଥିବା ଲିଷ୍ଟିଂରେ ଦିନ ୧୧ଟାବେଳେ ଏହାର ଶୁଣାଣି ପାଇଁ ସ୍ଥାନିତ କରାଯାଇଛି।

You might also like