ଜୋ ବାଇଡେନଙ୍କ ଘୋଷଣା; ‘ହୁ’ ସହ ପୁଣି ମିଶିବ ଆମେରିକା

ୱାଶିଂଟନ୍‌: ଚୀନ ସମର୍ଥନର ଅଭିଯୋଗ ଆଣି ବିଶ୍ୱ ସ୍ୱାସ୍ଥ୍ୟ ସଂଗଠନ(ହୁ) ଠାରୁ ଅଲଗା ହୋଇଥିଲେ ଡୋନାଲ୍ଡ ଟ୍ରମ୍ପ, କିନ୍ତୁ ରାଷ୍ଟ୍ରପତି ଭାବେ ନର୍ବାଚିତ ହେବା ପରେ ହୁ ସହ ମିଶି କାମ କରିବାକୁ ଘୋଷଣା କରିଛନ୍ତି ନବନିର୍ବାଚିତ ଜୋ ବାଇଡେନ। ଆସନ୍ତା ବର୍ଷ ଜାନୁଆରୀ ୨୦ ତାରିଖରେ ବାଇଡେନ୍‌ ରାଷ୍ଟ୍ରପତି ଭାବେ ଶପଥ ନେବେ। ଏହାପରେ ବିଶ୍ୱ ସ୍ୱାସ୍ଥ୍ୟ ସଂଗଠନ(ହୁ) ସହ ମିଶି‌  ପୁଣିଥରେ ବିକାଶ ପଥରେ କାର୍ଯ୍ୟ କରିବେ ବୋଲି ସେ‌ ଘୋଷଣା କରିଛନ୍ତି।

ଏନେଇ ବାଇଡେନ କହିଛନ୍ତି ଯେ ବିଶ୍ୱରେ ବଢ଼ିଚାଲିଥିବା କରୋନା ସଂକ୍ରମଣକୁ ପ୍ରତିହତ କରିବା ପାଇଁ  ଆମେ ‘ହୁ’ ସହିତ ମିଶି କାମ କରିବାକୁ ପ୍ରସ୍ତୁତ। ତା ସହିତ ଚୀନ୍‌ ଯେମିତି ସୀମା ଭିତରେ ରହିବ ସନେଇ ମଧ୍ୟ ଦୃଷ୍ଟି ଦିଆଯିବ। ଚୀନ୍‌ ସମ୍ପର୍କୀୟ ଏକ ପ୍ରଶ୍ନର ଉତ୍ତର ଦେଇ ଏପରି କହିଛନ୍ତି ବାଇଡେନ। ସେ ଆହୁରି ମଧ୍ୟ କହିଛନ୍ତି ଯେ କାହାକୁ ମନଇଛା କିଛି କରିବା ପାଇଁ ଦିଆଯିବ ନାହିଁ। ଆବଶ୍ୟକ ପଡ଼ିଲେ କଠୋର ନିଷ୍ପତ୍ତି ନିଆଯିବ।

ଇଲେକ୍ସନ କ୍ୟାମ୍ପେନିଂ ସମୟରେ ବାଇଡେନ୍‌ ଚୀନ୍‌କୁ ନେଇ ବୟାନ ଦେଇଥିଲେ। କରୋନା ଭାଇରସ୍‌କୁ ନେଇ ଚୀନ୍‌ର ଅନିୟମିତତା ପାଇଁ ସେ ଚୀନ୍‌କୁ ସଜା ଦେବାକୁ କହିଥିଲେ। ଏଥିରେ ସେ ଆର୍ଥିକ ପ୍ରତିବନ୍ଧ ସହ ଟ୍ୟାକ୍ସ ବୃଦ୍ଧି କରିବାକୁ କହିଥିଲେ।

ଗତ ଏପ୍ରିଲ୍‌ ମାସରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଅସନ୍ତେଷ ପ୍ରକାଶ କରି ‘ହୁ’ ଠାରୁ ଅଲଗା ହୋଇଯାଥିଲେ। ଏବଂ ‘ହୁ’ କୁ ପାଣ୍ଠି ଯୋଗାଣ ବନ୍ଦ କରିଦେଇଥିଲେ। ଚୀନ୍‌ର ପକ୍ଷ ନେଇ ‘ହୁ’ କାମ କରୁଥିବା ସେ ଅଭିଯୋଗ କରିଥିଲେ।

ତେବେ ନିର୍ବାଚନ ପୂର୍ବରୁ ଚୀନ ଉପରେ ଗରମ ଦେଖାଉଥିବା ବାଇଡେନ୍‌ଙ୍କ ସ୍ୱର ଏବେ ନରମ ପଡ଼ିଛି। ସେ‌ ବର୍ତ୍ତମାନ ଚୀନ୍‌କୁ ସଜା ଦେବାକୁ ଚାହୁଁ ନ ଥିବା କହିଛନ୍ତି। କିନ୍ତୁ ଚୀନ୍‌କୁ ବୁଝାଇବାକୁ ଚାହୁଁଛନ୍ତି ଯେ ଅନ୍ୟ ଦେଶ ଭଳି ସେ ମଧ୍ୟ ଆଇନ୍‌-କାନୁନ୍‌ର ପାଳନ କରିବା ଉଚିତ୍‌। ନଚେତ୍‌ ଏହାର ପରିଣାମ ଖରାପ ହେବ ବୋଲି ବାଇଡେନ୍‌ କହିଛନ୍ତି।

You might also like