ସହରୀ ଗରିବଙ୍କୁ ଶସ୍ତା ଘର ଉପହାର ଦେଲେ ମୋଦି, ତିଆରି ହେବ ଭୂମିକମ୍ପ ପ୍ରତିରୋଧକ ଘର

ବଦଳିବ ସହରୀ ଭାରତର ରୂପରେଖ, ୬ ରାଜ୍ୟକୁ ଲାଇଟ୍ ହାଉସ୍ ପ୍ରକଳ୍ପ

ନୂଆଦିଲ୍ଲୀ : ସହରୀ ଗରିବଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନୂଆବର୍ଷ ଉପହାର । ସହରୀ ଭାରତର ରୂପରେଖ ବଦଳାଇବା ପାଇଁ  ମୋଦିଙ୍କ ଗୁରୁତ୍ୱପୂର୍ଣ୍ଣ ପଦକ୍ଷେପ  । ଏକ ଭିଡିଓ କନଫରେନ୍ସିଂ ମାଧ୍ୟମରେ ୬ଟି ରାଜ୍ୟରେ ଲାଇଟ୍ ହାଉସ୍ ପ୍ରୋଜେକ୍ଟର ଭିତ୍ତି ପ୍ରସ୍ଥର ସ୍ଥାପନା କରିଛନ୍ତି  ପ୍ରଧାନମନ୍ତ୍ରୀ । ନୂଆବର୍ଷରେ ଏହା ପ୍ରଧାନମନ୍ତ୍ରୀଙ୍କ ପ୍ରଥମ କାର୍ଯ୍ୟକ୍ରମ  । ଏଲଏଚପି ଅନ୍ତର୍ଗତ କେନ୍ଦ୍ର ସରକାର ୬ଟି ସହର ଯଥା, ଇନ୍ଦୋର, ଚେନ୍ନାଇ, ରାଞ୍ଚି, ଅଗରତାଲା, ଲକ୍ଷ୍ନୌ ଏବଂ ରାଜକୋଟରେ ୧୦୦୦-୧୦୦୦ ରୁ ଅଧିକ ଘର ନିର୍ମାଣ କରିବାର ଯୋଜନା କରିଛନ୍ତି । ତେବେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ନିର୍ମାଣ ହେବାକୁ ଥିବା ଏହି ଘରଗୁଡ଼ିକ ଭୂମିକମ୍ପ ପ୍ରତିରୋଧୀ ହେବ । ସ୍ଥାନୀୟ ଜଳବାୟୁକୁ ଆଧାର କରି ଲୋକଙ୍କୁ ସୁରକ୍ଷିତ ଘର ପ୍ରଦାନ କରାଯିବ । ଏହି ଘରକୁ ମଜବୁତ ଭାବେ ତିଆରି କରାଯିବ ।

ଆଜି  ୬ଟି ରାଜ୍ୟର ୬ଟି ସହରରେ ଗ୍ଲୋବାଲ ହାଉସିଂ ଟେକ୍ନୋଲୋଜି ଚ୍ୟାଲେଞ୍ଜ-ଇଣ୍ଡିଆ (ଜିଏଚଟିସି-ଇଣ୍ଡିଆ) ଅଧୀନରେ ଥିବା ଲାଇଟ୍ ହାଉସ୍ ପ୍ରକଳ୍ପର ମୂଳଦୁଆ ପକାଇଛନ୍ତି  ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସବୁଜ ନିର୍ମାଣ ପ୍ରଯୁକ୍ତିବିଦ୍ୟା ବ୍ୟବହାର କରି ସହରୀ ଗରିବ ଲୋକଙ୍କୁ ଛାତ ଯୋଗାଇ ଦିଆଯିବ । ମାତ୍ର ୪ଲକ୍ଷ ୭୫ ହଜାର ଲକ୍ଷ ବିନିମୟରେ ଏହି ଯୋଜନା ଅନୁସାରେ ୪୧୫ ବର୍ଗଫୁଟର ଫ୍ଲାଟ୍ ସହରୀ ଗରିବଙ୍କୁ  ପ୍ରଦାନ କରାଯିବ ।


ଘରର ମୂଲ୍ୟ ୧୨ ଲକ୍ଷ ୫୯ ହଜାର ହୋଇଥିବା ବେଳେ ଗରିବ ଶ୍ରେଣୀର ଲୋକଙ୍କ ପାଇଁ କେନ୍ଦ୍ର ଦେବ ୭ ଲକ୍ଷ ୮୩ ହଜାର  । ବାକି ୪.୭୫ ଲକ୍ଷ ଲାଭାର୍ଥୀଙ୍କୁ ଦେବାକୁ ପଡ଼ିବ । ପ୍ରଧାନମନ୍ତ୍ରୀ ଆବାସ ଯୋଜନା ଅନୁସାରେ (ସହରୀ) ଏହି ଫ୍ଲାଟ୍ ଗୁଡ଼ିକ ବଣ୍ଟାଯିବ । ଏହି କାର୍ଯ୍ୟକ୍ରମ  ଅବସରରେ ପ୍ରଧାନମନ୍ତ୍ରୀ ଆର୍କିଟେକଚର୍, ପ୍ଲାନିଂ ଓ ନିର୍ମାଣ କ୍ଷେତ୍ର ସହ ଜଡିତ ସମସ୍ତ ବ୍ୟକ୍ତି ବିଶେଷଙ୍କ ସହ କଥା ହୋଇଛନ୍ତି ।


ଏହି କାର୍ଯ୍ୟକ୍ରମରେ ମୋଦି  ପ୍ରଧାନମନ୍ତ୍ରୀ ଆବାସ ଯୋଜନା (ସହରୀ) କାର୍ଯ୍ୟକାରୀ କରିବାରେ ଉତ୍କର୍ଷତା ଲାଭ କରିଥିବା ରାଜ୍ୟ ଗୁଡ଼ିକୁ ବାର୍ଷିକ ପୁରସ୍କାର ମଧ୍ୟ ପ୍ରଦାନ କରିଛନ୍ତି ।  ଗୃହ ଓ ନଗର ବ୍ୟାପାର ମନ୍ତ୍ରୀ , ତ୍ରିପୁରା, ଝାଡଖଣ୍ଡ, ଉତ୍ତରପ୍ରଦେଶ, ମଧ୍ୟପ୍ରଦେଶ, ଗୁଜୁରାଟ, ତାମିଲନାଡୁ ଏବଂ ଆନ୍ଧ୍ରପ୍ରଦେଶର ରାଜ୍ୟପାଳ ତଥା ମୁଖ୍ୟମନ୍ତ୍ରୀ  ଏହି  ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ ।

ପ୍ରଧାନମନ୍ତ୍ରୀ କହିଛନ୍ତି ୬ଟି ପ୍ରକଳ୍ପ ଦେଶରେ ଗୃହ ନିର୍ମାଣ ପାଇଁ ନୂତନ ଦିଗ ଦେଖାଇବ । ଏ ‘ନୂତନ ଶକ୍ତି, ନୂତନ ସଂକଳ୍ପ ଏବଂ ନୂତନ ସଂକଳ୍ପ ପ୍ରମାଣ କରିବା ପାଇଁ ଆଜି ଦ୍ରୁତ ଗତିରେ ଆଗକୁ ବଢିବା ଆବଶ୍ୟକ । ଘର ନିର୍ମାଣ ପାଇଁ ଦେଶ ନୂତନ ଜ୍ଞାନକୌଶଳ ଆପଣାଉଛି । ଏହି ପ୍ରକଳ୍ପ ବାସ୍ତବରେ ଲାଇଟହାଉସ୍ ପରି ।

 

 

You might also like