ସାଢ଼େ ୮ କୋଟି ଚାଷୀଙ୍କ ବ୍ୟାଙ୍କ୍‌ ଆକାଉଣ୍ଟ୍‌କୁ ଗଲା ୧୭ ହଜାର କୋଟି ଟଙ୍କା

ନୂଆଦିଲ୍ଲୀ: ଦେଶରେ କୃଷି ଭିତ୍ତିଭୂମି ସଜାଡ଼ିବାକୁ ପ୍ରୟାସ। ଆଜି ୧ ଲକ୍ଷ କୋଟି ଟଙ୍କାର Agriculture Infrastructure Fund ଘୋଷଣା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଏହା ଦ୍ୱାରା ଦେଶରେ କୃଷି ଭିତ୍ତିଭୂମିର ବିକାଶ ସହ ଦେଶର ଗ୍ରାମୀଣ ଅର୍ଥବ୍ୟବସ୍ଥାର ଚିତ୍ର ବଦଳିବ ବୋଲି ଜଣାପଡ଼ିଛି। ଏହାସହ କରୋନା ମହାମାରୀ ବେଳେ ଏହି ଯୋଜନା ଦ୍ୱାରା କୃଷକମାନେ ବିଶେଷ ଭାବେ ଉପକୃତ ହୋଇପାରିବେ।

ଭିଡିଓ କନ୍‌ଫରେନ୍ସିଂ ମାଧ୍ୟମରେ ଏହି ଫଣ୍ଡ୍‌ର ଘୋଷଣା ସହ ପିଏମ୍- କିଷାନ ଯୋଜନାରେ ଚାଷୀଙ୍କୁ ସହାୟତା ରାଶି ମଧ୍ୟ ପ୍ରଦାନ କରିଛନ୍ତି ପ୍ରଧାନମନ୍ତ୍ରୀ ମୋଦି। ପିଏମ୍ କିଷାନ ଯୋଜନାରେ ଷଷ୍ଠ ପର୍ଯ୍ୟାୟ କିସ୍ତି ଟଙ୍କା ରିଲିଜ୍ କରାଯାଇଛି। ଦେଶର ସାଢ଼େ ୮ କୋଟି ଚାଷୀଙ୍କ ବ୍ୟାଙ୍କ୍‌ ଆକାଉଣ୍ଟକୁ ସିଧାସଳଖ ୧୭ ହଜାର କୋଟି ଟଙ୍କା ଟ୍ରାନ୍ସଫର କରାଯାଇଛି।

କୃଷି ସହ ଜଡ଼ିତ ଷ୍ଟାର୍ଟଅପ୍‌କୁ ପ୍ରୋତ୍ସାହନ ଦେଉଛନ୍ତି କେନ୍ଦ୍ର ସରକାର। ଦେଶରେ ସବୁଠୁ ଅଧିକ ସଂଖ୍ୟ କ୍ଷୁଦ୍ର ଚାଷୀ ଅଛନ୍ତି। ତେଣୁ କ୍ଷୁଦ୍ର ଚାଷୀଙ୍କ ଉନ୍ନତି ପାଇଁ ସରକାର ନିରନ୍ତର ପ୍ରୟାସ କରି ଆସୁଛନ୍ତି।

ମହାରାଷ୍ଟ୍ର ଓ ବିହାର ମଧ୍ୟରେ ଦେଶର ପ୍ରଥମ କିଷାନ ଟ୍ରେନ୍ ଚଳାଚଳ କରୁଛି। ଏହି ଟ୍ରେନ୍‌ ଚାଷୀ ଓ ଛୋଟ ବ୍ୟବସାୟୀଙ୍କ କୃଷି ଉତ୍ପାଦନ ପରିବହନର ଆବଶ୍ୟକତା ପୂରଣ କରିବା ସହ ଲୋକଙ୍କୁ ତାଜା କୃଷି ଉତ୍ପାଦିତ ସାମଗ୍ରୀ ଯୋଗାଇବା ତଥା ଚାଷୀଙ୍କୁ ଭଲ ଅର୍ଥ ରୋଜଗାର ଯୋଗାଇ ଦେବା ଏହାର ଲକ୍ଷ୍ୟ। କିଷାନ ଟ୍ରେନ୍ ଦ୍ୱାରା ଚାଷୀ ସହଜରେ ନିଜ ସାମଗ୍ରୀ ସହରକୁ ପରିବହନ କରି ଭଲ ଅର୍ଥ ରୋଜଗାର କରିପାରିବେ। ଗାଁରୁ କୃଷି ଉତ୍ପାଦିତ ସାମଗ୍ରୀ ସହରକୁ ଯିବାରେ ଆଉ ସହରରୁ ଅନ୍ୟ ଉତ୍ପାଦ ସବୁ ଗାଁକୁ ଆସିବ। ଏହାଦ୍ୱାରା ହିଁ ଆତ୍ମ ନିର୍ଭର ଭାରତ ଅଭିଯାନ ସଫଳ ହୋଇପାରିବ ବୋଲି ପ୍ରଧାନମନ୍ତ୍ରୀ କହିଛନ୍ତି।

ପଢ଼ନ୍ତୁ: ଚାଷୀଙ୍କ ପାଇଁ ଖୁସି ଖବର, ପ୍ରଥମଥର ପାଇଁ ଗଡ଼ିଲା ସ୍ୱତନ୍ତ୍ର ଟ୍ରେନ୍‌

You might also like