ମେ‘ ୧୫ରୁ ସ୍ପେଶାଲ ଟ୍ରେନ ପାଇଁ ଜାରି ହେବ ୱେଟିଂ ଟିକେଟ୍‌

ନୂଆଦିଲ୍ଲୀ: ସ୍ପେଶାଲ ଏସି ଟ୍ରେନ୍‌ ପାଇଁ ରେଲୱେ ପକ୍ଷରୁ  ଶୁକ୍ରବାରଠାରୁ ୱେଟିଂ ଟିକେଟ ବୁକିଂ ହେବ । ସେତିକି ନୁହେଁ, ରେଳ ଯାତ୍ରୀଙ୍କ ସୁବିଧା ପାଇଁ ବିଭାଗ ଆହୁରି ଅଧିକ ସ୍ୱତନ୍ତ୍ର ଟ୍ରେନ ଚଳାଚଳ ପାଇଁ ଯୋଜନା କରୁଛି, ଯେଉଁଥିରେ ସ୍ଲିପର କୋଚ ମଧ୍ୟ ରହିବ। ବର୍ତ୍ତମାନ ଦିଲ୍ଲୀରୁ ଅଲଗା ଅଲଗା ସହରକୁ ୧୫ ସ୍ୱତନ୍ତ୍ର ଟ୍ରେନ ଚାଲୁଛି ଯେଉଁଥିରେ ସ୍ଲିପର କୋଚ ନାହିଁ।

ମେ’ ୧୫ ତାରିଖ ଅର୍ଥାତ୍‌ ଶୁକ୍ରବାରଠାରୁ ଆପଣ IRCTC ୱେବସାଇଟ୍‌ କିମ୍ବା ଆପ୍‌ରେ ଟିକେଟ ବୁକିଂ କରିବାକୁ ଯଦି  ଚାହୁଁଛନ୍ତି ତେବେ ୱେଟିଂ ଟିକେଟ ମିଳିବ। ବର୍ତ୍ତମାନ ସୁଦ୍ଧା କେବଳ କନ୍‌ଫର୍ମ ଟିକେଟ ବୁକିଂ ହେଉଥିଲା। ଏହି ସ୍ପେଶାଲ ଟ୍ରେନ୍‌ରେ ୱେଟିଂ ଲିଷ୍ଟ ଟିକେଟ୍‌ ୨୨ ମେ’ କିମ୍ବା ଏହା ପରେ ଚାହୁଁଥିବା ଯାତ୍ରୀଙ୍କୁ ମିଳିବ। 3AC ରେ ସର୍ବାଧିକ ୧୦୦ ୱେଟିଂ ଟିକେଟ ଏବଂ 2ACରେ ୫୦ ଏବଂ ଏକ୍‌ଜ୍ୟୁକିଟିଭ କ୍ଲାସ ଏବଂ 1AC ରେ ସର୍ବାଧିକ ୨୦-୨୦ୱେଟିଂ ଟିକେଟ ଜାରି କରାଯିବ।

ତେବେ ଏଠାରେ କହି ରଖିବୁ, ୱେଟିଂ ଟିକେଟରେ ରେଳ ଯାତ୍ରା ପାଇଁ ଅନୁମତି ମିଳିବ ନାହଁ।  ଚାର୍ଟ ପ୍ରସ୍ତୁତ ହେବା ପୂର୍ବରୁ ଯେଉଁ ୱେଟିଂ ଟିକେଟ କନ୍‌ଫର୍ମ ହେବ ସେହିମାନେ ହିଁ ରେଳଯାତ୍ରା କରିପାରିବେ।

ରେଳବାଇ ପକ୍ଷରୁ ଏକଥା ସ୍ପଷ୍ଟ କରାଯାଇଛି, ଶେଷ ମୁହୂର୍ତ୍ତରେ କେତେକ ଯାତ୍ରୀ ଟିକେଟ କ୍ୟାନ୍‌ସଲ କରୁଛନ୍ତି। ଏହି କାରଣରୁ କାଲିଠାରୁ ୱେଟିଂ ଟିକେଟ ଜାରି କରାଯିବ। ଶେଷ ମୁହୂର୍ତ୍ତରେ ଯଦି କିଛି କନ୍‌ଫର୍ମ ଟିକେଟ କ୍ୟାନ୍ସଲ ହେବ ତେବେ ତାହା ସ୍ଥାନରେ ୱେଟିଂ ଟିକେଟକୁ କନ୍‌ଫର୍ମ କରାଯିବ। ଚାର୍ଟ ପ୍ରସ୍ତୁତ ପର୍ଯ୍ୟନ୍ତ ଯେଉଁ ଟିକେଟ କନ୍‌ଫର୍ମ ହୋଇ ପାରବ ନାହିଁ ତାହାର ଟଙ୍କା ରିଫଣ୍ଡ କରାଯିବ।

 

 

You might also like