ହାଇକୋର୍ଟରୁ ସୁପ୍ରିମ୍‌କୋର୍ଟ ପହଞ୍ଚିଲା ଟିକ୍‌ଟକ୍‌: ୧୫ରେ ଶୁଣାଣି

ନୂଆଦିଲ୍ଲୀ: ଭିଡିଓ ଶେୟାରିଂ ଆପ୍‌ ଟିକ୍‌ଟକ୍‌ ଉପରେ ବ୍ୟାନ୍‌ ଲଗାଇବା ମାମଲା ଏବେ ହାଇକୋର୍ଟରୁ ଯାଇ ସୁପ୍ରିମକୋର୍ଟରେ ପହଞ୍ଚିଛି। ଏହି ଘଟଣାରେ ମାଡ୍ରାସ ହାଇକୋର୍ଟ ଦେଇଥିବା ରାୟ ଉପରେ ସୁପ୍ରିମକୋର୍ଟ ଶୁଣାଣି କରିବାକୁ ରାଜି ହୋଇଛନ୍ତି। ମାଡ୍ରାସ୍‌ ହାଇକୋର୍ଟ ଏହି ଭିଡିଓ କ୍ରିଏଟିଂ ଆପ୍‌ ଉପରେ ବ୍ୟାନ୍‌ ଲଗାଇ ଦେଇଥିଲେ। ଏହା ବିରୋଧରେ ସୁପ୍ରିମକୋର୍ଟରେ ଏକଧିକ ଆବେଦନ କରାଯାଇଥିଲା। ଏଥିପାଇଁ କୋର୍ଟ ଏପ୍ରିଲ୍ ୧୫ ତାରିଖରେ ଏହା ଉପରେ ଶୁଣାଣି କରିବେ।

ଟିକ୍‌ଟକ୍‌ ଆପର ଆରମ୍ଭ କରିଥିବା ଚାଇନା କମ୍ପାନୀ ବାଇଟ୍‌ ଡ୍ୟାନ୍ସ ମାଡ୍ରାସ ହାଇକୋର୍ଟ ଦେଇଥିବା ରାୟ ବିରୋଧରେ ସୁପ୍ରିମକୋର୍ଟରେ ଆବେଦନ କରିଥିଲା। ଆଜି ପ୍ରଧାନ ବିଚାରପତି ଜଷ୍ଟିସ୍‌ ରଞ୍ଜନ ଗୋଗୋଇଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏହାର ଶୁଣାଣି କରିଛନ୍ତି। ଏହି ଖଣ୍ଡପୀଠରେ ଜଷ୍ଟିସ ଗୁପ୍ତା ଓ ଜଷ୍ଟିସ୍‌ ସଞ୍ଜୀବ ଖାନ୍ନା ରହିଥିଲେ। ଆବେଦନକାରୀ ଖଣ୍ଡପୀଠକୁ କହିଥିଲେ ଯେ “ ବର୍ତ୍ତମାନ ଟିକ୍‌ଟକ୍‌ ଆପ୍‌କୁ ଏକ ବିଲିୟନ୍‌ରୁ ଅଧିକ ଲୋକ ଡାଉନ୍‌ଲୋଡ୍ କରି ବ୍ୟବହାର କରୁଛନ୍ତି। ତେଣୁ ଏବେ ଏହାକୁ ବନ୍ଦ କରାଯିବ ଠିକ୍‌ ନୁହେଁ। କୋର୍ଟ ଏହାକୁ ଗ୍ରହଣ କରିବା ସହ ଏପ୍ରିଲ୍ ୧୫ରେ ଏହାର ଶୁଣାଣି ହେବ ବୋଲି କହିଛନ୍ତି।

ଏପ୍ରିଲ ୩ରେ ମାଡ୍ରାସ ହାଇକୋର୍ଟ ଟିକ୍‌ଟକ୍‌ରେ ପ୍ରସ୍ତୁତ ହେଉଥିବା ଭିଡିଓ ପର୍ଣ୍ଣୋଗ୍ରାଫି ଓ ପିଲାଙ୍କ ମାନସିକତା ଉପରେ ଖରାପ ପ୍ରଭାବ ପକାଉଥିବା କହିଥିଲେ। ଏଥିସହ ସେ କେନ୍ଦ୍ର ସରକାରଙ୍କୁ ଏଭଳି ଆପକୁ ବନ୍ଦ କରିବାକୁ ନିର୍ଦ୍ଦେଶ ଦେଇଥିଲେ।

 

You might also like