‘କମ୍ବୋ-ଡ୍ରଗ୍‌’- କରୋନା ଆକ୍ରାନ୍ତଙ୍କ ପାଇଁ ଏକ ବରଦାନ

ନୂଆଦିଲ୍ଲୀ: ଗୁରୁତର କୋଭିଡ୍ ଆକ୍ରାନ୍ତଙ୍କ ପାଇଁ ବରଦାନ ପାଲଟିବ କି କମ୍ବୋ-ଡ୍ରଗ୍? ଇଣ୍ଟର୍ଫେରନ୍ ବିଟା-1B, ଲୋପିନାଭିର୍-ରିଟୋନାଭିର୍ ଏବଂ ରାଇବାଭାଇରିନର ମିଳିତ ପ୍ରୟୋଗ କରୋନା ଆକ୍ରାନ୍ତଙ୍କ ଠାରେ ଲାଭପ୍ରଦ ହେଉଥିବା ଏକ ପରୀକ୍ଷଣରୁ ଜଣାପଡ଼ିଛି ।

ଗୋଟିଏ ଆଣ୍ଟିଭାଇରାଲ୍ ଔଷଧ ଅପେକ୍ଷା ୩ ପ୍ରକାର ଔଷଧର ମିଳିତ ପ୍ରୟୋଗ ଲାଭପ୍ରଦ ହେଉଥିବା ଏକ ଅନ୍ତର୍ଜାତୀୟ ଜର୍ଣ୍ଣାଲ୍‌ରେ ପ୍ରକାଶ ପାଇଛି। ହଂକଂରେ ୧୨୭ ଜଣ କରୋନା ଆକ୍ରାନ୍ତଙ୍କଠାରେ ଏହି ଔଷଧ ପରୀକ୍ଷାମୂଳକ ପ୍ରୟୋଗ ହୋଇଥିଲା ।

କରୋନା ଲକ୍ଷଣ ପ୍ରକାଶ ପାଇବାର ସପ୍ତାହେ ଭିତରେ ଏହି ଟ୍ରିପଲ୍-ଡ୍ରଗ୍ କମ୍ବିନେସନ୍ ସେମାନଙ୍କୁ ଦୁଇ ସପ୍ତାହ ପାଇଁ ଦିଆଯାଇଥିଲା । ଏହା ଫଳରେ ସେମାନଙ୍କ ସ୍ୱାସ୍ଥ୍ୟାବସ୍ଥାରେ ଉନ୍ନତି ଘଟିଥିବା ଏବଂ ହସ୍ପିଟାଲରୁ ଅପେକ୍ଷାକୃତ କମ୍ ଦିନରେ ମୁକ୍ତି ମିଳିଥିବା ଦାବି କରାଯାଇଛି ।

ପୂର୍ବରୁ ୨୦୦୨ରେ ସାର୍ସ ରୋଗ ପାଇଁ ଏଚ୍ଆଇଭି ଆକ୍ରାନ୍ତଙ୍କୁ ଦିଆଯାଉଥିବା ଲୋପିନାଭିର୍-ରିଟୋନାଭିର୍ ଓ ହେପାଟାଇଟିସ୍-ସି ପାଇଁ ଦିଆଯାଉଥିବା ରାଇବାଭାଇରିନର ମିଳିତ ପ୍ରୟୋଗରୁ ଭଲ ଫଳ ମିଳିଥିଲା । ତେବେ ପରୀକ୍ଷଣରେ ଏହି କମ୍ବିନେସନ୍ ସହ ମଲ୍ଟିପଲ୍ ସ୍କ୍ଲେରୋସିସ୍ ପାଇଁ ବ୍ୟବହୃତ ଇଣ୍ଟର୍ଫେରନ୍ ବିଟା-1Bକୁ ମଧ୍ୟ କରୋନା ଆକ୍ରାନ୍ତଙ୍କ ଚିକିତ୍ସା ପାଇଁ ଯୋଡ଼ାଯାଇଥିଲା । ସାରା ବିଶ୍ୱରେ ଏହା ଏଧରଣର ପ୍ରଥମ ପରୀକ୍ଷାମୂଳକ ପ୍ରୟୋଗ ବୋଲି କୁହାଯାଉଛି।

You might also like