ଘରକୁ ଫେରିବା ପାଇଁ ପାଳି କରି ବଳଦ ସାଜିଲେ ବାପା, ମା’ ଓ ପୁଅ

ଇନ୍ଦୋର: ଲକ୍‌ଡାଉନର ଅନେକ ଦୃଦୟସ୍ପର୍ଶୀ ଦୃଶ୍ୟ ଦେଖିବାକୁ ମିଳୁଛି। ବିଶେଷକରି ଅସହାୟ ଶ୍ରମିକଙ୍କ ଘରବାହୁଡ଼ା ଦୃଶ୍ୟ ଅତ୍ୟନ୍ତ ହୃଦୟଥରା। ଏମିତି ଏକ ଦୃଶ୍ୟ ଆଜି ଦେଖିବାକୁ ମିଳିଛି ଇନ୍ଦୋରରେ। ଇନ୍ଦୋର ବାଇପାସର ଏକ ଭିଡିଓ ଭାଇରାଲ ହୋଇଛି। ଘରକୁ ଯିବା ପାଇଁ ପରିବାରର ସଦସ୍ୟଙ୍କୁ  କିପରି ବଳଦ ସହ କାନ୍ଧ ମିଳାଇ ଶଗଡ ଟାଣିବାକୁ ପଡ଼ୁଛି ତାହା ଏହି ଭାଇରାଲ ଭିଡିଓରେ ଦେଖିବାକୁ ମିଳିଛି।

ଏହି ପରିବାର ମହାରାଷ୍ଟ୍ରରୁ ବଳଦଗାଡ଼ିରେ ରାଜସ୍ଥାନ ସ୍ଥିତ ତାଙ୍କ ଘରକୁ ଯାଉଛନ୍ତି। ଏହି ଶଗଡ଼ରେ ପରିବାରର ୩ ଜଣ ଲୋକ ବାହାରିଥିଲେ ଗାଁକୁ ଯିବା ପାଇଁ। ହେଲେ ରାସ୍ତାରେ ଗୋଟିଏ ବଳଦ ମରିଯିବା ପରେ ଘରକୁ ଯିବାର ସମସ୍ୟା ବଢିଗଲା। କାରଣ ଗୋଟିଏ ବଳଦ ଶଗଡ଼ ଗାଡିକୁ ଟାଣିବ କେମିତି ?

ଶେଷରେ ପରିବାର ସଦସ୍ୟଙ୍କୁ ବଳଦ ହେବାକୁ ପଡ଼ିଲା। ଅର୍ଥାତ୍‌ ପ୍ରତ୍ୟେକ ସଦସ୍ୟ ପାଳି କରି ଅନ୍ୟ ବଳଦଟି ସହ କାନ୍ଧ ମିଳିଇ ଶଗଡ଼ ଟାଣଲେ। ଉପରେ ଟାଣ ଖରା। ପାଦେ ଚାଲିବାକୁ ଇଚ୍ଛା ହେଉ ନ ଥାଏ। ତଥାପି ସେମାନେ ଶଗଡକୁ ଟାଣି ଟାଣି ଚାଲୁଛନ୍ତି।  ବାପା ଥକି ପଡିଲେ ମା’,  ପୁଣି କେତେବେଳେ ମା’ ଥକି ପଡ଼ିଲା ପୁଅ ଟାଣୁଛି ଶଗଡ ।

ତେବେ ଏହି ଭାଇରାଲ ଭିଡିଓ ବିଷୟରେ ଜିଲ୍ଲା ପ୍ରଶାସନ ପାଖରେ କିଛି ଖବର ନାହିଁ।

You might also like