ତୀବ୍ର ହେଉଛି ମରାଠା ଆନ୍ଦୋଳନ: ମୁମ୍ବାଇ ବନ୍ଦ

ମୁମ୍ବାଇ: ମରାଠାମାନଙ୍କୁ ସଂରକ୍ଷଣ ଦାବିରେ ମହାରାଷ୍ଟ୍ରରେ ଚାଲୁଥିବା ଆନ୍ଦୋଳନ ଆଜି ମୁମ୍ବାଇରେ ପହଞ୍ଚିଛି। ଏହ ଆନ୍ଦୋଳନକୁ ତୀବ୍ର କରିବାକୁ ମରାଠା କ୍ରାନ୍ତି ମୋର୍ଚ୍ଚା ପକ୍ଷରୁ ଆଜି ମୁମ୍ବାଇ ବନ୍ଦ ଡାକରା ଦିଆଯାଇଛି। ଫଳରେ ମୁମ୍ବାଇରେ ଆଜି ଜନଜୀବନ ଠପ୍‌ ହୋଇଯାଇଛି। ବନ୍ଦ ଫଳରେ ଟ୍ରେନ୍‌ ଓ ବସ୍‌ ସେବା ପ୍ରଭାବିତ ହୋଇଛି। ମୁମ୍ବାଇ ସମେତ ନଭି ମୁମ୍ବାଇ ଏବଂ ଥାନେରେ ମଧ୍ୟ ଏହି ବନ୍ଦ ପ୍ରଭାବ ଦେଖିବାକୁ ମିଳିଛି।

ବିକ୍ଷୋଭକାରୀମାନେ ଯୋଗେଶ୍ୱରୀ ଏବଂ ଥାନେଠାରେ ରେଳ ଚଳାଚଳ ବନ୍ଦ କରିଥିଲେ। ସେହିପରି ଆନ୍ଦୋଳନକାରୀମାନେ ଇଷ୍ଟର୍ଣ୍ଣ ଏକ୍ସପ୍ରେସେୱେ ବନ୍ଦ ରଖିବା ଫଳରେ ମୁମ୍ବାଇର ଟ୍ରାଫିକ୍ ସେବା ପ୍ରଭାବିତ ହୋଇଛି। କେତେକ ସ୍ଥାନରେ ଆନ୍ଦୋଳନକାରୀମାନେ ବସ୍‌ ଭଙ୍ଗାରୁଜା କରିଥିବା ମଧ୍ୟ ସୂଚନା ମିଳିଛି। ଗତକାଲି ଏଇ ଆନ୍ଦୋଳନ ହିଂସାର ରୂପ ନେଇଥିଲା। ଆନ୍ଦୋଳନକାରୀଙ୍କ ସହ ପୁଲିସର ସଙ୍ଘର୍ଷ ଫଳରେ ଜନେ କନେଷ୍ଟବଲଙ୍କ ମୃତ୍ୟୁ ହେବା ସହ ଅନ୍ୟ ୯ ଜଣ ଆହତ ହୋଇଥିଲେ। ମହାରାଷ୍ଟ୍ର ଜନସଂଖ୍ୟାର ପ୍ରାୟ ୩୦ପ୍ରତିଶତ ମରାଠା ହୋଇଥିଲେ ମଧ୍ୟ ସେମାନଙ୍କୁ ସଂରକ୍ଷଣ ଦିଆଯାଉନାହିଁ। ତେଣୁ ସଂରକ୍ଷଣ ଦାବିରେ ମରାଠା କ୍ରାନ୍ତି ମୋର୍ଚ୍ଚା ପକ୍ଷରୁ ରାଜ୍ୟବ୍ୟାପୀ ଆନ୍ଦୋଳନ କରାଯାଉଛି। ସେପଟେ ଅନ୍ୟ ଏକ ସଙ୍ଗଠନ ସକଲ ମରାଠା ସମାଜ ପକ୍ଷରୁ ମଧ୍ୟ ଆଜି ବନ୍ଦ ପାଳନ କରାଯାଉଛି।

You might also like