ଜିତିଲେ ୧୬୫ କୋଟି, ହେଲେ ମନେ ପଡ଼ିଗଲା ବନ୍ଧୁଙ୍କୁ ଦେଇଥିବା କଥା….

ଅପୂର୍ବ ବନ୍ଧୁତ୍ୱ । କେଉଁ ପିଲାବେଳେ ପରସ୍ପରକୁ କଥା ଦେଇଥିଲେ ଆଉ ବାର୍ଦ୍ଧକ୍ୟରେ ସେହି କଥା ରଖିଛନ୍ତି। ପ୍ରମାଣିତ  କରି ଦେଇଛନ୍ତି ପ୍ରତିଶ୍ରୁତି କେମିତି ପାଳନ କରାଯାଏ । ଆଉ ଏକଥା ମଧ୍ୟ କହି ଯାଇଛନ୍ତି ସବୁ ମୂଲ୍ୟବାନ ସମ୍ପତ୍ତିଠାରୁ ବନ୍ଧୁତ୍ୱର ମୂଲ୍ୟ କେତେ ଅଧିକ !  ଲଟେରୀରେ ପାଇଥିବା ୧୬୫ କୋଟି ଟଙ୍କାରୁ ସାଙ୍ଗକୁ ଅଧା ଦେଇ ବନ୍ଧୁତ୍ୱର ଅପୂର୍ବ ନିଦର୍ଶନ ଦେଖାଇଛନ୍ତି ଟମ୍‌ କୁକ୍‌।

ଏଠି ଆମେ କହିବାକୁ ଯାଉଛୁ ଦୁଇ ସାଙ୍ଗ ଟମ୍‌ କୁକ୍‌ ଏବଂ ଜୋସେଫ ଫେନୀଙ୍କ କଥା। ଉଭୟ ଆମେରିକାସ୍ଥିତ Wisconsinର ବାସିନ୍ଦା।  ୧୯୯୨ ମସିହାରେ ପରସ୍ପରକୁ ହ୍ୟାଣ୍ଡସେକ କରି କଥା ଦେଇଥିଲେ , ଯିଏ  ଲଟେରୀ ଜିତିବ, ଅନ୍ୟକୁ ଅଧା ଦେବ। ଇତି ମଧ୍ୟରେ ବିତିଗଲାଣି ଦୀର୍ଘ ୨୮ ବର୍ଷ। ଦୁଇ ସାଙ୍ଗ ଏବେ ବାର୍ଦ୍ଧକ୍ୟରେ ଉପନୀତ। ହୁଏତ ଲଟେରୀ ଜିତିବା ଆଶା ଉଭୟ ଛାଡି ଦେଇଥିଲେ।

ହଠାତ୍‌ ଗତମାସରେ କୁକ୍‌ଙ୍କ ପାଖକୁ ଖବର ଆସିଲା ସେ ଏକ ଲଟେରୀ ଜିତିଛନ୍ତି। ପୁରସ୍କାର ସ୍ୱରୂପ ତାଙ୍କ ମିଳିବ ୨୨ ମିଲିୟନ ଡଲାର ଯାହାର ମୂଲ୍ୟ ଭାରତୀୟ ଟଙ୍କାରେ ୧୬୫ କୋଟି। ଟଙ୍କା ପାଇବା ପରେ କୁକ୍‌ ତୁରନ୍ତ ସାଙ୍ଗ  ଫେନିଙ୍କୁ ଫୋନ କରିଥିଲେ ଏବଂ ତାଙ୍କୁ ୮୦ କୋଟି ଟଙ୍କା ଦେବା ପାଇଁ କହିଥିଲେ।

ଫେନି ତ ପ୍ରଥମେ ବିଶ୍ୱାସ କରିପାରି ନ ଥିଲେ।  ପ୍ରଥମେ ତ ସେ ଭାବିଥିଲେ କୁକ୍‌ ଥଟ୍ଟା କରୁଛନ୍ତି। ହେଲେ କୁକ୍‌ କହିଥିଲେ-‘ବନ୍ଧୁ, କଥା ଦେଇଥିଲି, କଥା ରଖୁଛି।‘ କୁକ୍‌ଙ୍କ ଏହି କଥାରେ ଭାବପ୍ରବଣ ହୋଇ ପଡ଼ିଥିଲେ ଫେନି।

ଫେନି‌ ପୂର୍ବରୁ ଅବସର ନେଇ ସାରିଥିବାବେଳେ କୁକ୍‌ ଗତମାସରେ ଅବସର ନେଇଛନ୍ତି। ଏହି ଟଙ୍କା ପାଇବା ପରେ କୁକ୍‌ କହିଛନ୍ତି, ‘ଆମେ ଅବସର ନେଇ ସାରିଛେ। ପରସ୍ପର ସହ ସମୟ କଟାଇବାର ଏହା ପ୍ରକୃଷ୍ଟ ସମୟ। ଏବେ ଆମେ ନିଜ ପରିବାରକୁ ଯଥେଷ୍ଟ ସମୟ ଦେବା ଏବଂ ଏକାଠି ଭ୍ରମଣ କରିବା।

You might also like