ଗୋଚାଲାଣକାରୀ ଭାବି ପିଟି ପିଟି ମାରିଦେଲେ

ଜୟପୁର: ଘରକୁ ଦୁଇଟି ଗାଈ ନେଇ ଯାଉଥିଲେ। କିନ୍ତୁ ଲୋକଙ୍କ ନଜର ଥିଲା ଅଲଗା। ଭାବିନେଲେ ଗୋଚାଲାଣକାରୀ, ଆଉ ପିଟି ପିଟି ମାରିଦେଲେ।  ସୌଭାଗ୍ୟବଶତଃ ଅନ୍ୟ ଜଣେ ସେଠାରୁ ଖସି ପଳାଇବାରେ ସକ୍ଷମ ହୋଇ ନିଜ ଜୀବନ ବଞ୍ଚାଇ ପାରିଛନ୍ତି।

ସୂଚନା ମୁତାବକ, ରାଜସ୍ଥାନ ଅଲଓ୍ୱର ଜିଲ୍ଲା କୋଲ୍‌ଗାଁରେ ଆକବର ଖାନ୍‌ ନାମକ ଜଣେ ବ୍ୟକ୍ତି ରାତିରେ ନିଜ ସହଯୋଗୀଙ୍କ ସହିତ ଘରକୁ ଦୁଇଟି ଗାଈ ନେଉଥିଲେ। ତେବେ ତାଙ୍କୁ ଗୋଚାଲାଣକାରୀ ଭାବି ସ୍ଥାନୀୟ ଲୋକେ ଆକ୍ରମଣ କରିଥିଲେ। ଯେଉଁଥିରେ ଆକବର ଖାନ୍‌ଙ୍କ ମୃତ୍ୟୁ ହୋଇଛି। ଏହାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖା ଦେଇଛି। ଘଟଣାକୁ ତୀବ୍ର ନିନ୍ଦା କରିଛନ୍ତି ମୁଖ୍ୟମନ୍ତ୍ରୀ ବସୁନ୍ଧରା ରାଜେ। ଏହାସହ ଘଟଣାରେ ସମ୍ପୃକ୍ତ ଅଭିଯୁକ୍ତମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି।

ପ୍ରାୟ ବର୍ଷେ ତଳେ ଏହି ଅଲଓ୍ୱର ଜିଲ୍ଲାରେ ପେହଲୁ ଖାନ୍‌ ନାମକ ଜଣେ ବ୍ୟକ୍ତିଙ୍କୁ ଏଭଳି ମିଛ ଗୋଚାଲାଣ ଅଭିଯୋଗରେ ପିଟି ପିଟି ମାରି ଦିଆଯାଇଥିଲା।  କିଛି ଦିନ ତଳେ ସୁପ୍ରିମକୋର୍ଟ ମଧ୍ୟ ଏଭଳି ଘଟଣା ଉପରେ ଉଦ୍‌ବେଗ ପ୍ରକାଶ କରି କଡ଼ା କାର୍ଯ୍ୟାନୁଷ୍ଠାନ ନେବାକୁ କହିଥିଲେ। ଏହା ସହିତ ସଂସଦରେ ନୂଆ ଆଇନ କରିବାକୁ ପରାମର୍ଶ ଦେଇଥିଲେ। ୪ ବର୍ଷ ଭିତରେ ଏମିତି ପିଟି ପିଟି ୪୫ ଜଣଙ୍କୁ ହତ୍ୟା କରାଗଲାଣି।

You might also like