ନାଳ ପାର୍‌ ହେଉଥିଲେ ୪ ଶିଶୁ, ହଠାତ୍‌ ମାଡ଼ି ଆସିଲା ପାଣି…

ଚାମ୍ବା: ପାଣି ସୁଅରୁ ଉଦ୍ଧାର ହେଲେ ୪ ଶିଶୁ। ହିମାଚଳ ପ୍ରଦେଶର ଚାମ୍ବା ଜିଲ୍ଲାର ଭଟିୟାତ୍‌ ଅଞ୍ଚଳ ଦେଇ ଯାଇଥିବା ଏକ ନାଳରେ ହଠାତ୍‌ ପାଣି ମାଡ଼ି ଆସିବାରୁ ୪ଜଣ ଶିଶୁ ଫସି ଯାଇଥିଲେ। ପରେ  ସ୍ଥାନୀୟ ଲୋକଙ୍କ ସହାୟତାରେ ସେମାନଙ୍କୁ ଉଦ୍ଧାର କରାଯାଇଥିଲା।

ସୂଚନା ଅନୁସାରେ, ବୁଧବାର ଦିନ ଭଟିୟାତ୍‌ ଅଞ୍ଚଳର ୪ଜଣ ଶିଶୁ କୁଡ୍ଡୀ ଗାଁରେ ଥିବା ସମ୍ପର୍କୀୟଙ୍କୁ ଭେଟିବା ପାଇଁ ବାହାରି ଥିବାବେଳେ ଏଭଳି କିଛି ଘଟଣା ଘଟିଥିଲା। ଭଟିୟାତ୍‌ ଅଞ୍ଚଳ ଦେଇ ଯାଇଥିବା ନାଳରେ କମ୍‌ ପାଣି ଥିବାରୁ ଏହାକୁ ପାର୍‌ କରି ଗାଁରେ ପହଞ୍ଚିବା ପାଇଁ ସେମାନେ ନିଷ୍ପତ୍ତି ନେଇଥିଲେ। ଏହି ସମୟରେ ସମସ୍ତେ ନାଳ ପାର୍‌ ହେଉଥିବା ବେଳେ ହଠାତ୍‌ ପ୍ରବଳ ବର୍ଷା ହୋଇଥିଲା। ଫଳରେ ନାଳରେ ଜଳସ୍ତର ବଢ଼ି ଯାଇଥିଲା ଓ ଶିଶୁମାନେ ନାଳ ମଝିରେ ଫସି ଯାଇଥିଲେ।

ସାହାଯ୍ୟ ପାଇଁ ଶିଶୁମାନଙ୍କ ଚିତ୍କାର ଶୁଣି ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚି ସେମାନଙ୍କୁ ରସି ସାହାଯ୍ୟରେ ଉଦ୍ଧାର କରିଥିଲେ।

ନାଳରେ ପାଣି ପ୍ରଖର ସ୍ରୋତରେ ଆସୁଥିଲେ ମଧ୍ୟ ଲୋକମାନେ ସମସ୍ତେ ଏକାଠି ହୋଇ ଚାରି ଶିଶୁଙ୍କୁ ଉଦ୍ଧାର କରିଥିଲେ।

You might also like