କୁଳଭୂଷଣ ମାମଲାରେ ଓକିଲ ନିଯୁକ୍ତି ପାଇଁ ଅନୁମତି ଦେଲେ ଇସ୍‌ଲାମବାଦ ହାଇକୋର୍ଟ

ଇସ୍‌ଲାମବାଦ୍‌: ଗୁଇନ୍ଦାଗିରି ଅଭିଯୋଗରେ ପାକିସ୍ତାନରେ ମୃତ୍ୟୁ ଦଣ୍ଡାଦେଶ ପାଇ ଜେଲରେ ଥିବା ଭାରତର ପୂର୍ବତନ ନୈସେନା ଅଧିକାରୀ କୁଳଭୂଷଣ ଯାଦବ ମାମଲାରେ ନିଜର ପକ୍ଷ ରଖିବା ପାଇଁ ଭାରତ ଓକିଲ ଦେଇ ପାରିବ ବୋଲି ପାକିସ୍ତାନ କୋର୍ଟ ସୋମବାର ଅନୁମତି ଦେଇଛନ୍ତି। ସୋମବାର ଇସ୍‌ଲାମବାଦ୍‌ ହାଇ କୋର୍ଟ ପରିସରରେ ମିଡିଆକୁ ଏ ସମ୍ପର୍କରେ ସୂଚନା ଦେଇ ଆଟର୍ଣ୍ଣି ଜେନେରାଲ ଜାଭେଦ ଖାନ କହିଛନ୍ତି, ଭାରତ ଚାହିଁଲେ କୁଳଭୂଷଣ ମାମଲାରେ ଓକିଲ ରଖି ପାରିବ। ମାତ୍ର ଭାରତୀୟ ଓକିଲ ଦେଇ ପାରିବେ ନାହିଁ ବୋଲି ସ୍ପଷ୍ଟ କରିଛନ୍ତି।

ଆଟର୍ଣ୍ଣି ଜେନେରାଲ କହିଛନ୍ତି, ‘କୋର୍ଟ ଏକଥା ମଧ୍ୟ କହିଛନ୍ତି, ପାକିସ୍ତନା ଯଦି ଚାହିଁବ ତେବେ ଓକିଲ ବଦଳାଇପାରିବ। ଏଥିସହିତ ଭାରତ ସରକାର ଯଦି ସେମାନଙ୍କ ସହ ଆଲୋଚନା କରିବାକୁ ଚାହାନ୍ତି ତେବେ ସେଥିପାଇଁ ମଧ୍ୟ ତାଙ୍କୁ ଅନୁମତି ମିଳିବ।’

ତେବେ ଭାରତ ଏହି ମାମଲାରେ ଭାରତୀୟ ଓକିଲଙ୍କୁ ନିଯୁକ୍ତି ଦେଇପାରିବ କି ବୋଲି ଏକ ପ୍ରଶ୍ନରେ ଆଟର୍ଣ୍ଣି ଜେନେରାଲ କହିଥିଲେ, ଏହି ମାମଲାରେ ଭାରତ କେବଳ ପାକିସ୍ତାନ ଲୟାର ହିଁ ଦେଇପାରିବ,  ଯେଉଁମାନଙ୍କୁ କି  ପାକିସ୍ତାନରେ ପ୍ରାକ୍‌ଟିସ୍‌ କରିବା ପାଇଁ ଅନୁମତି ମିଳିଥିବ। କୌଣସି ଭାରତୀୟ ପ୍ରତିନିଧିଙ୍କୁ ଏହି ମାମଲାରେ ହସ୍ତକ୍ଷେପ କରିବାର ଅନୁମତି ନାହିଁ ବୋଲି ସେ କହିଥିଲେ।

ସୂଚନାଥାଉ କି, କୁଳଭୂଷଣଙ୍କ ମାମଲାରେ ଜଣେ ଓକିଲଙ୍କୁ ନିଯୁକ୍ତି ଦେବା ପାଇଁ ଜୁଲାଇ ୨୨ ତାରିଖରେ ପାକିସ୍ତାନ ପକ୍ଷରୁ ଇସ୍‌ଲାମବାଦ ହାଇକୋର୍ଟରେ ଏକ ପିଟିସନ ଦାଖଲ କରାଯାଇଥିଲା।

କୂଳଭୂଷଣଙ୍କ ସହାୟତା ଲାଗି ଭାରତ ପକ୍ଷରୁ କରାଯାଉଥିବା ପ୍ରତ୍ୟେକ ପ୍ରୟାସରେ ପାକିସ୍ତାନ ବାଧା ସୃଷ୍ଟି କରୁଛି। ଭାରତୀୟ ବୈଦେଶିକ ମନ୍ତ୍ରାଳୟର କହିବା ଅନୁଯାୟୀ, କାଉନସିଲର ଅଧିକାରୀଙ୍କୁ କୁଳଭୂଷଣଙ୍କ ଆଇନଗତ ଦସ୍ତାବିଜ ନେବାକୁ ଅନୁମତି ଦଆଯାଇନଥିଲା।

 

You might also like