କର୍ଣ୍ଣାଟକ ରାଜନୀତି ; ରାତି ସାରା ବିଧାନସଭାରେ ବିଜେପି ବିଧାୟକଙ୍କ ଧାରଣା

ଆଜି ବହୁମତ ପ୍ରମାଣ ଦେବାକୁ ରାଜ୍ୟପାଳଙ୍କ ନିର୍ଦ୍ଦେଶ

ବେଙ୍ଗାଲୁରୁ : କର୍ଣ୍ଣାଟକ ରାଜନୀତିରେ ଜାରି ରହିଛି ହାଇଡ୍ରାମା। ଆଜି ଦିନ ସାଢ଼େ ଗୋଟାଏ ସୁଦ୍ଧା ଆସ୍ଥା ଭୋଟ କରାଇବାକୁ ରାଜ୍ୟପାଳ ବାଜୁଭାଇ ବାଲା ମୁଖ୍ୟମନ୍ତ୍ରୀ କୁମାରସ୍ୱାମୀଙ୍କୁ ଚିଠି ଲେଖି ନିର୍ଦ୍ଦେଶ ଦେଇଛନ୍ତି।

ଗତକାଲି ଆସ୍ଥାଭୋଟ କରାଇବା ପାଇଁ ରାଜ୍ୟପାଳ ଦେଇଥିବା ନିର୍ଦ୍ଦେଶକୁ  ନ ମାନି ବାଚସ୍ପତି ଆଜି ୧୧ଟା ଯାଏଁ ଗୃହ ମୁଲତବୀ ଘୋଷଣା କରିଥିଲେ।  ଗୃହ ମୁଲତବୀ ଘୋଷଣା କରିବା ପରେ ବାଚସ୍ପତିଙ୍କ ନିଷ୍ପତ୍ତିକୁ ତୀବ୍ର ପ୍ରତିବାଦ କରିବା ସହ ଆସ୍ଥା ଭୋଟ ନ ହେବା ଯାଏଁ ଗୃହ ନ ଛାଡ଼ିବାକୁ ବିଜେପି ବିଧାୟକମାନେ ଅଡ଼ି ବସିଥିଲେ। ଗୃହ ଭିତରେ ରାତି ସାରା ଧାରଣା ଦେଇଛନ୍ତି।

ଗତକାଲି ଆସ୍ଥା ଭୋଟ କରାଇବାକୁ ଦାବି କରି ବିଜେପି ବିଧାୟକ ଦଳ ରାଜ୍ୟପାଳଙ୍କ ହସ୍ତକ୍ଷେପ ଲୋଡ଼ିଥିଲେ। ଗତକାଲି ହିଁ ଆସ୍ଥା ଭୋଟ କରାଇବାକୁ ରାଜ୍ୟପାଳ ନିର୍ଦ୍ଦେଶ ଦେଇଥିଲେ। ରାଜ୍ୟପାଳଙ୍କ ନିର୍ଦ୍ଦେଶ ପରେ ଗୃହରେ ହଟ୍ଟଗୋଳ କରିଥିଲେ କଂଗ୍ରେସ ଓ ଜେଡିଏସ୍ ବିଧାୟକ। ଏହା ସହିତ ମେଣ୍ଟ ସରକାର ଭାଙ୍ଗିବା ପାଇଁ କଂଗ୍ରେସ ବିଧାୟକ ଶ୍ରୀମନ୍ତ ପାଟିଲ୍‌ଙ୍କୁ ଅପହରଣ କରି ମୁମ୍ବାଇର ଏକ ହସ୍ପିଟାଲରେ ଭର୍ତ୍ତି କରାଯାଇଥିବା ଅଭିଯୋଗ କରିଥିଲେ ବରିଷ୍ଠ ବିଧାୟକ ଡି କେ ଶିବକୁମାର। ପାଟିଲ ହସ୍ପିଟାଲରେ ଚିକିତ୍ସାଧୀନ ଥିବାର ଫଟୋ ଗୃହରେ ଦେଖାଇଥିଲେ। ଆଜି ଗୃହରେ କଣ ହେବ, ତା ଉପରେ ସାରା ଦେଶର ନଜର ରହିଛି।

You might also like